“Latalata Atili Atu i le Atua,” Mo le Malosi o le Autalavou, Iuni 2022.
O le Autū ma A’u
Ua faasoa mai e le autalavou auala o loo latou ola ai i upu o Autū a Tamaitai Talavou ma le Korama a le Perisitua Arona
Latalata Atili Atu i le Atua
“Ma lo‘u loto atoa, manatu, mafaufau, ma le malosi atoa, o le a ou alofa i le Atua, ma tausi a’u feagaiga.”
O lo‘u uso o le tagata muamua lea o lo’u aiga na auai i le Ekalesia. O ia o se faataitaiga maoae ia te a’u. I ni nai tausaga talu ona uma ona papatisoina o ia, sa amata ai loa ona faalogologo lo‘u aiga atoa i faifeautalai. Sa ou filifili e auai i le Ekalesia aua ou te iloa e moni Iesu Keriso ma o Lana Ekalesia moni lenei. Ina ua uma ona ou papatiso, sa ou lagonaina e pei ua ou toefanau i se olaga fou. Sa ou folafola atu i le Atua o le a ou tausia Ana poloaiga. Afai tatou te mananao e toe foi atu i le Tama Faalelagi, e manaomia ona tatou usitai i Ana poloaiga.
E fesoasoani le Agaga Paia ia i tatou e tausia poloaiga, e pei o le usiusitai i o tatou matua. Ou te fiafia matou te o e tietie uila ma a’u uo. Ua fai mai o‘u matua ia aua nei o mamao tele, ae o au uo e fiafia e o i tietiega uumi. I se tasi taimi na valaaulia ai a’u e a‘u uo ou te alu i se tietiega umi, ae sa ou lagonaina e lē tatau ona ou alu. Sa o a‘u uo i la latou tietiega ma sa lavea se tasi o i latou. Sa iu ina toe malosi o ia, ae sa ou fiafia sa ou faalogo i le Agaga ma usitai i o‘u matua.
Ou te taumafai e lagona le latalata atu i le Atua i aso uma. E fesoasoani tusitusiga paia e uunaia au e fai le mea sa’o. E taumafai lo‘u aiga e tatalo faatasi i aso uma. Ou te fiafia foi e vali ma tusi ata. Ou te fiafia e tusi le ata o le Faaola. Ou te manao ia te Ia ia faatasi pea ma a’u.
Ou te iloa e alofa le Tama Faalelagi ia te a’u, ma ou te alofa foi ia te Ia. Ona ua faamanuiaina tele a’u e le Tama Faalelagi, o lea ou te manao ai e alu i se misiona. Ou te manao e aoao atu isi e uiga i le Tama Faalelagi ma mea Na te faia mo i tatou.
E mafai ona tatou lagonaina le fiafia mai le talalelei, ma e mafai foi ona tatou faasoa atu i isi.
E alaala le tusitala i New Delhi, Initia.