“Pe O Le A E Tali Atu ea i le Valaau a le Alii?,” Mo le Malosi o le Autalavou, Iuni 2022.
Sau, Mulimuli Mai ia te A’u
Pe O Le A E Tali Atu ea i le Valaau a le Alii?
O le a valaauina oe e le Alii e faia mea tetele i le taimi nei ma i le lumanai.
I le faitau afe o tausaga ua mavae, sa aoao ai e se taulealea e igoa ia Samuelu ona tiute i le malumalu mai se ositaulaga e igoa ia Eli. I se tasi po, a o moe Samuelu, sa ia faalogoina se tasi o valaau atu ia te ia. I le taimi muamua, sa manatu Samuelu na valaau Eli ia te ia, o lea sa ia tamoe atu ai ia Eli ma fai atu, “O a‘u lenei; aua na e valaauina a’u” (1 Samuelu 3:5). Sa lei valaauina e Eli ma sa ia toe auina atu Samuelu e moe.
Sa toe faalogo Samuelu i le valaau ma toe alu atu faalua ia Eli, ma le taunuuga lava e tasi.
Ina ua uma ona faalogo Samuelu i le valaauga ma alu atu ia Eli i le taimi lona tolu, sa iloa e Eli ua valaauina Samuelu e le Alii. Sa fai atu Eli ia Samuelu e toe foi i lona moega. Afai e toe valaau mai le Alii, na fai atu Eli ia te ia e fai atu, “Fetalai mai, Le Alii e; aua ua faalogo lau auauna” (1 Samuelu 3:9).
Sa toe valaauina e le Alii, ma sa usitai Samuelu i le fautuaga a Eli. Ona faaali atu lea e le Alii Lona finagalo ia Samuelu (tagai 1 Samuelu 3:11–14). E ui lava ina sa talavou Samuelu, ae sa silafia o ia e le Alii ma sa i ai se galuega mo ia e fai.
E pei o Samuelu, ua ia te oe le avanoa e aoao ai, malamalama, ma iloa le Alii ma Lana afioga ina ia mafai ona faaali mai Lona finagalo ia te oe. O le a valaauina oe e le Alii e faia mea tetele i le taimi nei ma i le lumanai.
Pe o le a e tali atu ea?
Ata na tusia e Robert Barrett
Ia Naunau e Faatino
A o lei oo i le aafiaga a Samuelu ma le Alii, “E lei iloa lava e Samuelu le Alii, sa lei faaalia foi ia te ia le afioga a Ieova” (1 Samuelu 3:7; faaopoopo le faamamafa).
Ou te fiafia lava i le upu lei i lenei fuaiupu. Atonu e lei iloa e Samuelu le Alii, ae o le taimi lava na ia tali atu ai i le valaau a le Alii, sa ia “tuputupu ae, ma sa faatasi le Alii ma ia, ma sa leai se tasi o upu [a le Alii] na pa’u i le eleele” (1 Samuelu 3:19).
Ou te fiafia e faafesootai le tala a Samuelu i le Mataupu Faavae ma Feagaiga 107:99, lea e fai mai: “O le mea lea, ia tuu atu nei i tagata taitoatasi e galue i le tofi ua tofia ai o ia, i le filiga atoa” (ua faaopoopo le faamamafa) aoao lona tiute, ma galue i le tofi ua tofia ai o ia, i le filiga atoa” (ua faaopoopo le faamamafa). Tatou te aoao ma tuputupu ae e ala i le faia, ae lē o le tutu i autafa. Sei o tatou aoaoina mea e finagalo le Alii tatou te faia ona faatino lea!
O le tatalo ia iloa le mea e fai e taua. E tatau ona e tatalo e lē aunoa, ae e tatau foi ona e naunau e tu i luga o ou vae ma fai se mea. E mafai ona fesoasoani le Agaga Paia ia faigofie atili ia te oe pe a e agai i luma.
O Mea Laiti e Saunia ai Oe
A o avea a’u ma se tiakono, sa ou tufaina le faamanatuga ma aoina taulaga anapogi. Ma sa ou faatulagaina ni nofoa mo fonotaga ma toe ave i lalo. O nei tiute na foliga mai na faatauvaa ia te a’u. A o ou toe tepa i tua i le taimi nei, ua mafai ona ou iloa o i latou o le amataga lea o la‘u auaunaga i le Ekalesia. O nei mea iti na saunia ai a‘u mo le aso o le a valaauina ai a’u e le Alii e faia nisi mea se tele.
O nisi taimi tatou te manatu ai o aafiaga faaleagaga po o uunaiga e tatau ona ofoofogia pe tupu i se sitaili tele, ofoofogia, e pei o le faia o se miti po o le faalogoina o se leo. Ae o le tele lava o taimi, ia te a’u lava ia, o aafiaga ma le Agaga o ni mafaufauga ma ni manatu laiti e faia ai se mea pe aapa atu ai i se tasi. O le a oo mai nisi aafiaga ma le Agaga pe a e faatinoina na uunaiga. O lea, afai e te maua sina uunaiga e fai se mea lelei ma lagona lelei, fai loa! O le a lē tuuina atu e le Alii ia te oe ni mea tetele e fai seia mafai ona e faalogo ma faatino mea iti.
E Faatuatuaina Oe e le Alii
A o avea a’u o se epikopo, sa ou vaaia se alii talavou o lau uarota o alualu i luma o se tiakono, aoao, ma se ositaulaga. Ona ia saunia lea e auauna atu i se misiona. Sa matamuli ma filemu o ia, ma sa sau o ia mai se aiga sa lē toaaga tele i le talalelei.
O le Aso Sa o le a ia lauga ai a o lei alu i lana misiona, sa ou fesili atu ai pe ua saunia lana lauga.
“Ioe!” o lana tala lea. Sa ia tatalaina se faila manila ma faaali mai ia te a’u lana lauga.
“E matagofie lena,” na ou fai atu ai. “Ae ou te manao e fai se faataitaiga. Ae a pe a e tautala mai i lou loto?”
“E te manao ou te faia le a le mea?” o lana tala lea.
“Ou te faatuatuaina oe,” o lau tala lea. “Tau lava o le tautala mai i lou loto. Ou te iloa o le a e faia ni mea maoae i lenei sauniga. O le a ou i ai i ou autafa pe a e manaomia a’u.
Sa ia tuuina mai ia te a’u lana lauga. O le a le galo lava ia te a’u lona popole e pei ona saunoa ai isi failauga i ona luma. Ae ina ua oo i le taimi e lauga ai o ia, sa ia tu i luga ma tuuina atu se sāvali mamana. Sa maua le faapotopotoga atoa e lenei taulealea matamuli lea na avea ma failauga mo le Alii.
Na oo mai le vavega moni ina ua uma le sauniga. O ana uo e toatolu o e sa ta‘u mai muamua ia te a’u o le a latou lē auauna atu i ni misiona na o mai ia te a’u ma ni mata ua faatumulia i loimata. Sa fai mai i latou taitoatasi, “Ou te fia alu i se misiona.” O le molimau a lenei alii talavou na faatalitonuina ai i latou e tatau ona latou auauna atu. O i latou uma e toatolu sa auauna atu i ni misiona faamanuiaina. O lenei alii talavou ua avea nei ma se tamā ma o loo auai pea i le talalelei a Iesu Keriso. Sa ia fesoasoani foi e toe aumai le toatele o tagata o lona aiga i le Ekalesia.
O lenei aafiaga ua faamanatu mai ai ia te a’u e faatuatuaina e le Alii le autalavou o le Ekalesia. Ua tele atu auala ua tuuina atu e le Alii ia te oe nai lo se isi lava taimi muamua e faamaonia ai ua Ia faatuatuaina oe. Ou te lei latalata lava i le saunia mo avanoa ua e maua a o ou matua e pei o oe! Ae ou te iloa ua e saunia e fesoasoani e fausia le Ekalesia i soo se mea lava e te nofo ai.
Ata na tusia e Ben Sowards
O le a lē Tuua Lava Na o Oe.
A o e tali atu i le valaau a le Alii i lou olaga atoa, ua ia te oe le folafolaga o le a lē tuua lava na o oe. O le a taitai oe e le Alii. Atonu e manaomia lou tuputupu a‘e teisi atu, e pei ona ou faia, e vaai ai pe na faapefea ona taialaina oe e le Alii. Mo se faataitaiga, e taiala oe e le Alii e ala i le perofeta ma aposetolo. O le siufofoga o le Alii e lē o se tagata ese ia i latou. Na te taialaina foi oe pe a e faitau i tusitusiga paia.
Ua faamanuiaina oe i meaalofa, taleni, ma tomai e faia ai mea silisili. E tatau ona avatu ai ia te oe le talitonuga mautinoa e tali atu i le valaau a le Alii ma avea ma tagata ua Ia silafia e mafai ona avea ai oe.