O le Autu ma A’u

Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona

Ola i O’u Tulaga Faatonuina

“A o ou taumafai e agavaa mo le faaeaga.”

Saunia e Joy Yamada

Ata na pueina e Christina Smith

Ua ou maitauina i la’u aoga o nisi tagata e masani ona saili mo le aloaiaina i mea uma latou te faia. Ae ou te manao ia i ai le mafaufau e faia se mea ona e sa’o nai lo le maua ai o se faalauiloaga. Ou te iloa e taua le filifili o le mea sa‘o ma tausi poloaiga. I lou lava olaga, ou te matua fiafia lava sa ou tumau i ou tulaga faatonuina, aua ua matuai faamanuiaina ai au i se taimi umi lava.

E na o le tasi lava le isi tagata o le Ekalesia i la‘u aoga. Ou te taumafai e avea ma se faataitaiga i a‘u uo aua ou te fai ma sui o le Ekalesia. Ou te manao ia latou iloa o le talalelei e avea ai a’u ma se tagata fiafia.

Ou te faalogo i upu palauvale i la‘u aoga i taimi uma. E oo lava i nisi o o‘u faiaoga e palalauvale. Ae ou te filifili e ola i tulaga faatonuina uma o le Ekalesia tusa lava pe faigata ona tausia. O isi tulaga faatonuina e pei o le Upu o le Poto po o le faia o lavalava tauagafau e faigofie atu ona ou tausia. Ou te iloa o le mulimuli i le Upu o le Poto o le a ou saogalemu ai. Ua ou atiina ae foi la‘u sitaili ina ia mafai ona ou maua i taimi uma se mea e ofuina e tauagafau ma manaia le sitaili. Ou te lē tau ositaulagaina lau sitaili e ola ai i ou tulaga faatonuina.

O nisi taimi atonu e te feagai ma faafitauli o loo taumafai e taofia oe mai le ausiaina o se mea lelei, ae e mafai ona e filifili ia fiafia. Sa i ai ou tofotofoga. Ae ou te taumafai ia i ai se vaaiga lelei i na taimi. E fesoasoani le talalelei ia te a’u e faia lena mea.

Ou te fiafia e faamalositino. Sa ou faia le taaloga tāfiti i lo‘u olaga atoa. Ae sa ou taofia ona sa i ai ni o‘u manuaga. Sa faigata ia te a’u ona taofi aua sa ou alu atu mai le faamalositino i le tele o itula i le vaiaso i le selo itula i le vaiaso. Sa lē mafai ona ou faamalositino i le auala sa ou masani ai, o lea sa ou filifili ai e taumafai le tamoe. Ou te fiafia e tamoe i le aai. O le tamoe e fesoasoani foi e faaitiitia ai lo‘u atuatuvale.

E lē faigofie i taimi uma le avea ma se tagata o le Ekalesia, ae e lē o tuua na o oe. Fai mea uma e te mafaia e faatumauina ai se uiga lelei ma le mautinoa!

E nofo le tusitala i Niu Ioka, ISA.