“Givim Seves wetem Ful Hat blong Yu mo wetem Wan Hapi Hat,” Blong Ol Yut Oli Kam Strong, Julae 2022.
Givim Seves wetem Ful Hat blong Yu mo wetem Wan Hapi Hat
Long wan taem we i bin gat wan janis blong givim seves long Food Bank of Mexico (wan bigfala kampani blong storem kaekae), trifala yang woman (wetem mi), wan yang man blong yut grup blong mifala, mo 10 moa, i disaed blong go tekpat.
Long fas ples, mi no save se bae mifala i go mekem wanem. Be i no longtaem, ol pipol long kampani ia oli eksplenem se bae mifala i seperetem ol kaekae we oli save go nogud mo olgeta we oli save stap longtaem, i go insaed long ol sopingbag, blong mekem ol paket blong givim long ol pipol we oli gat nid. Grup blong mifala i serem wok, mo afta, mifala i stat blong fulumap ol bag ia. !Mifala i mas wok kwik olsem wan tim, mo fulumap moa long 500 bag!
Aot long eksperiens ia, mi bin lanem se, iven sapos yumi no gat fulap samting blong givim,yet yumi save helpem ol narawan we oli no gat tumas samting. Smol smol i go, yumi evriwan i save help long ol defren wei. Mi save we yumi gat blesing taem yumi givim seves.
Mi rili laekem blong givim seves long bank blong Kaekae ia. Sapos mi gat wan moa janis blong mekem hemia bakegen, !bae mi go mekem! I bin naes blong save gat janis ia blong givim seves long ol narawan. Sapos yu gat janis blong givim seves, !mekem! Mo mekem wetem ful hat blong yu, mo mekem wetem wan hapi hat.
Hem we i raet i stap long Meksiko Siti, Meksiko.