“Mi Save se Bae Mi Luk Hem Bakegen,” Blong Ol Yut Oli Kam Strong, Julae 2022.
Stamba Toktok Ia mo Mi
Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud Kworom
Mi Save se Bae Mi Luk Hem Bakegen
“Bae mi kwalifae blong kasem ol blesing blong tempol mo blong kasem glad we i stap oltaem long gospel.”
Mi biliv se Lod i bin givim ol famli long yumi, blong mekem se yumi save help blong mekem wanwan long yumi i kam strong moa, mo blong yumi sapsapotem yumi. Mo tu, Lod i givim ol famli long yumi blong yumi no stap yumiwan. Be, taem we papa blong mi i pasawe, mi filim se mi stap miwan. Papa blong mi mo mi, mitufala i kolkolosap long mitufala, mo mi lusum eksampol blong hem we i stap oltaem. Mi filim se i no gat nara samting blong mekem, be krae nomo.
Be long wan naet, mi disaed blong talem wan prea. Insaed long hat blong mi, mi filim Spirit i talem long mi se mi mi no stap miwan. Mi save plan ia blong fasin blong sevem man. From Atonmen blong Jisas Kraes, bambae mi luk papa blong mi bakegen. Save ia, se ol famli oli save stap tugeta blong oltaem, i impoten tumas long mi. Mo mi save se mifala save stap olsem wan famli we i no save finis from se papa mo mama blong mi oli sil insaed long tempol.
Taem mi kasem 12 yia, mi stap plan blong go long tempol blong mekem baptaes long bihaf blong ol dedman; we bae i fas taem blong mi. Be afta, ol tempol oli klos from wol sik ia. Mi stap luk fored blong stap insaed long tempol blong fas taem blong filim glad ia we i stap insaed long hem.
Taem we brata blong mi i bin sil long waef blong hem, mi bin stap aotsaed long tempol. Be iven we mi stap aotsaed, mi filim wan gudgudfala filing insaed long hat blong mi. Mekem se, mi stap tingting nomo se bae mi filim olsem wanem taem bae mi stap insaed. Famli blong mi i talem long mi se tempol i wan ples we yumi save stap glad long plan ia blong God we i stret gud, we Hem i rere blong yumi.
Mi bin lanem tu aot long ol tijing blong ol profet se mi save mekem ol tabu kavenan insaed long tempol. Evri kavenan we yumi stap mekem insaed long tempol i impoten tumas long laef. Mi bin kasem tempol rekomen blong mi, mo mi no save wet blong yusum. Mo mi save se, wan dei, taem mi sil long fiuja waef blong mi, bambae mi save gat famli blong miwan we i no save finis.
Hem we i stap raet i stap laef long Kuliakan, Meksiko.