Ol Kwestin mo Ol Ansa

“?Olsem wanem nao mi disaed se taem ia nao i stret taem blong givim seves long wan misin?”

“Kolosap 40 yia i pas, taem mi stap tingting long jalenj ia blong go long wan misin, mi filim se mi no naf mo mi no rere. Mi tingbaot se mi stap prea: ‘Papa long Heven. ?Olsem wanem bae mi go givim seves long wan misin taem mi save smol samting nomo?’ Mi bin biliv long Jos, be tu, mi bin filim se save blong mi long saed blong spirit i bin smol tumas. Taem mi bin stap prea, filing ia i bin kam: ‘Yu no save evri samting, !be yu save inaf!’ Glad toktok ia i givim mi strong paoa long tingting blong tekem nekis step ia blong go long misin fil.

Elda Neil L. Andersen blong Kworom blong Olgeta Twelef Aposol, Oct. 2008 general conference (Ensign o Liahona, Nov. 2008, 13).

Lod I Openem Rod Oltaem

“Papa blong yumi long Heven i gat wan wok blong yumi mekem. Taem yumi stap ridim toktok blong Hem, mo ol toktok blong wokman blong Hem we Hem i bin jusum, yumi save gat tras ia blong save wanem nao bae Hem i mekem yumi mekem. Yumi save se bae Lod i mekem wan rod i open blong yumi mekem ol samting we Hem i bin askem yumi blong mekem (luk long 1 Nifae 3:7). Oltaem bae Hem i stap ia blong yumi sapos yumi traehad blong stap obei long ol komanmen blong Hem.”

Manuela O., 15 yia, Gana

Bae yu neva filim se yu rere 100%

Mi mi wan profesonol man we i stap mekem ski long wef, mo mi mas lego hemia blong mi save filim tru glad ia we i kam blong stap givim seves long wan misin. Mi bin wet kasem taem we mi rili filim se mi mi rere blong go, mo mi kasem blesing from hemia. Hem i wan desisen bitwin yu mo Papa blong yu long Heven. Bae yu neva filim se yu rere 100%. Blong sendem ol misin pepa blong yu, oltaem i wan step blong fet, be hem i wan gudfala step tumas.”

Jordan C., 22 yia, Kalifonia, YSA

Lod Bae I Mekem Yu Rere mo Bambae I Givim Paoa long Yu

“Oltaem yu save askem samting long Lod tru long prea. Lod i givim paoa long olgeta we Hem i singaotem blong oli kam ol misinari. Taem we papa blong mi i ded, mi bin gat kamfot tru long testemoni blong mi abaot plan ia blong fasin blong sevem man. Be i gat plante pipol long wol ia we oli stil no save abaot plan ia blong Papa long Heven. Mi save se Lod i stap rere ol pipol blong mi tijim olgeta.”

Felipe F., 17 yia, Brasil

Raetemdaon Ol Kwaet Toktok blong Spirit

“Taem we mi bin stap prea se bae mi givim seves long wan misin o no, mi bin raetemdaon ol kwaet toktok blong Spirit we mi bin kasem long ol toktok, miusik, o ol fren blong mi. Taem we mi filim se tingting blong mi i slak, taem mi stap rere from misin blong mi, bae mi gobak mo ridim ol samting we Spirit i talem long mi. Mi givim ol pepa blong mi i go, mo mi trastem Lod. Taem yu muv fored wetem fet, yu no save se bae i wokaot olsem wanem, be bae yu luk han blong God long ol desisen we bae yu mekem.”

Bryanna M., 19 yia, Oregon, YSA

Kasem Petriakel Blesing blong Yu

“Stat long taem we mi bin kasem petriakel blesing blong mi, mi bin save se mi sapos blong serem gospel. Mi stap rere from wan misin naoia taem mi stap serem gospel wetem ol fren blong mi. Iven sapos mi filim se blong go givim seves long wan fultaem misin i no stret long mi taem bae mi kam bigwan, be mi stil save serem gospel long ful laef blong mi.”

Elise D., 14 yia, Florida, YSA

Askem Lod mo Ol Narawan

“Maet mi gat 14 yia nomo, be mi bin stap askem kwestin ia long miwan. Taem we taem bae i kam blong mi mi tekem desisen se bae mi givim seves o no, bambae mi prea long Lod blong helpem mi faenem ansa blong mi. Mo tu, bae mi toktok long ol pipol we oli stap kolosap moa long mi, we i ol famli blong mi, bisop, mo ol fren blong mi.”

Jordan V., 14 yia, Nevada, YSA

Lod Bae I Givim Yu Wan Ansa

“Olsem oltaem mi bin wantem blong givim seves long wan misin, be mi mi save se hemia i no wan isi desisen. Sapos yumi wok strong wetem strong tingting blong stap stadi ol skripja, mo oltaem prea long Papa long Heven, mi save se bambae Hem i lidim yumi. Trastem Lod. Bambae Hem i talem long yu raet taem blong yu yu go givim seves long wan misin. Gohed blong lukaotem wan ansa, mo bambae yu kasem ansa ia mo bae yu filim se yu yu rere from.”

Nicolle R., 14 yia, Brasil

Rere long Saed blong Spirit, long Tingting, mo long Bodi

“Prea wetem wan tru tingting mo tingting hevi long ol skripja abaot desisen blong yu. Gat wan open tingting long wanem we Spirit i save talem kwaet o jes talem nomo long yu. Mo, taem yu stap wet, yu save go long evri sakramen miting, seminari, Sandei Skul klas, mo Yang Woman klas o Aronik Prishud kworom miting. Mo tu, yu save rere long saed blong tingting mo long saed blong bodi.”

Addison H., 14 yia, Yuta, YSA

Ol ansa ia oli blong help mo blong gat tingting mo defren lukluk, be oli no ol ofisol toktok we oli kam long Jos abaot doktrin blong Jos.

?Wanem Nao Yu Stap Tingting blong Mekem?

“?Olsem wanem bae mi mi wan eksampol long ol memba blong famli blong mi sapos oli gat hadtaem blong stap laef folem ol tijing blong Jisas Kraes?”

Sendem ansa mo foto blong yu bifo long namba 15 Ogis 2022.

Imelem mifala long [e-mail]. O, go long ftsoy.ChurchofJesusChrist.org mo klik long “Submit Your Work.” Saen In wetem Jos Akaon blong yu, mo afta, jusum “For the Strength of Youth” anda long “Choose Magazine.” Klikim “Add File” blong jusum fael mo foto blong yu, mo afta, klik long “Submit” blong sendem fael blong yu i kam long mifala.

Bae oli save jekem mo oli save katemaot sam pat blong ol ansa blong oli stret gud mo oli klia blong man i andastanem.