I No Gat Wan Narawan Olsem Yu

I Kam long David Dickson

Ol Magasin blong Jos

Lod i stap mekem Esta i rere from impoten wok ia blong hem, mo Hem i stap mekem i semmak long yu.

Mekem eni kaen samting naoia. !Eni samting nomo! Saksakem han antap long hed blong yu, tantanem yu long sekol, o singsingaot long sam krangke toktok olsem: “!Mi laekem banana bred!”

?Evri samting i finis? Gud. Yu jes mekem wan samting we yu neva bin mekem bifo. Yu harem se i saon defren, be wanem we yu jes mekem—iven sapos yu jes tingting long wan samting be yu no bin mekem—oli neva bin mekem stret olsem long ful histri. I no hapen olsem long ples we yu stap long hem, i no hapen long stret taem ia, mo i no yu i mekem.

Smol fani aksen ia i haelaetem wan impoten poen: i no gat wan narawan we i stret olsem yu, we i stap long stret semmak situesen olsem yu. Iven ol brata mo sista blong yu. Long ful wol, i no gat wan i gat evri stret kombaen talen, save blong mekem samting, frensip, famli, presen long saed blong spirit, mo lukluk olsem we yu yu gat.

Olsem Esta long OlTesteman, kwaliti we yu gat i blong yuwan long “hadtaem” olsem ia (Esta 4:14) blong yu save mekem wan bigfala gud jenis long laef blong evriwan we yu save olgeta.

!Yu gat ol impoten samting blong mekem!

Stat long Taem Hem i Smol we I No Gat Papa mo Mama kasem Taem Hem I Kam Kwin

Taem yu stap stadi long OlTesteman long manis ia, olsem pat blong Kam Folem Mi, bambae yu lanem abaot wan gudfala yang woman we i Jiu, we nem blong hem i Esta. Long wan taem long yangfala laef blong hem, Esta i bin stap hemwan we i no gat papa mo mama, mo wan nara memba blong famli, Modekae, i bin lukaotgud long hem. Hem i bin groap long wan taem we Ol Jiu oli prisena blong wan nara kantri.

Olsem wan gel we i no gat papa mo mama, we i laef long wan nara ples, maet hem i neva ting se bae, wan dei, bae hem i kam wan kwin. Be hemia nao stret i bin hapen (luk long Esta 2). Oli bin jusum hem blong hem i stap olsem wan waef blong king, Sekses.

Be wan dei, hem i fesem wan nogud jalenj: ol pipol blong Esta, Ol Jiu, oli stap long denja ia se bae oli kilimded olgeta evriwan. Hasban blong hem, we i king, afta we hem i lisin long kaonsel blong ol advaesa blong hem, i bin putumaot wan ofisol toktok we i talem se evri Jiu long siti ia, bae oli kilimded olgeta long wan deit we hem i bin putum.

Naoia, i gat plante pipol oli bin stap laef long siti ia. Mo tu, i gat plante man Jiu we oli stap stap laef long siti ia. Be, i gat wan Kwin Esta nomo. Mo hemwan nomo i save mekem wan samting blong stopem nogud disasta ia.

Semmak olsem Kwin Esta, yu, i gat wan nomo. Yu nomo yu yu wan we i save mekem ol samting we yu save mekem—ol samting we Lod i nidim yu blong mekem. Ol samting we oli save lidim plante pipol blong sevem laef blong olgeta.

Ol Ansa long OI Prea

Tangkyu tumas, i no gat janis se bae yu yu fesem ol samting we i bigwan mo mekem man i fraet olsem we Esta i bin fesem. Be hemia i no minim se stamba tingting blong laef blong yu i no impoten tumas.

Semmak olsem Esta, oli bin lidim yu, mo oli bin mekem yu yu rere blong yu kam huia yu tedei. Mo wok ia blong mekem yu yu rere, bae i gohed taem yu stap folem Jisas Kraes. Yu, yu save kam ansa blong evri dei prea blong plante pipol.

Yes i tru, iven wetem evri talen mo samting we yu save mekem, oltaem i moa gud blong askem help long saed blong spirit folem rod ia, semmak olsem we Esta i bin mekem.

Fet, Strong Tingting, mo Yu

Esta i bin save se hem i mas traem, mo sevem ol pipol blong hem. Hem i bin save tu se hem i nidim moa fet mo sapot blong ol pipol blong hem taem hem i bin stap lukaotem help we i kam long God. “Plis, yu go singaot olgeta man ples blong yumi we oli stap long taon ya, oli kam wanples. Bambae yufala i stap prea from mi gogo kasem tri dei mo tri naet we yufala i no kakae, mo yufala i no dring. Mo mi wetem ol gel blong wok blong mi, bambae mifala tu i mekem sem samting. Nao long namba tri dei ya, nating we i agensem loa, be bambae mi mas go luk king. Mo sapos i min se mi mi mas ded from, be bambae i mas olsem.” (Esta 4:16).

Taem we laef i kam had, olgeta we oli fetful oli tanem olgeta i kam strong moa long God. Esta i nidim evri help we hem i save kasem. Hem i no bin help nomo taem hem i bin toktok long hasban blong hem blong hem i tekemaot ofisol toktok ia, be tu, hem i bin putum laef blong hem long denja taem hem i go luk king we king i no bin singaotem hem long fas ples (we hemia i agensem loa, iven blong kwin).

?Yu kasem hamas fet mo strong tingting hem i gat? I gud blong ridim wan moa ves: “Mo sapos i minim se mi mi mas ded from, be bambae i mas olsem,” Esta i talem. Ol toktok ia, Sadrak, Mesak, mo Abednego oli bin talem long King Nebukadnesa, taem we oli no bin wantem blong wosip long pikja ia we oli wokem long gol.

Iven taem we king i tok strong long olgeta se bae hem i sakem olgeta long bigfala faea from oli no obei, oli bin talem strong nomo: “Sapos i tru we bambae yu sakem mitrifala i go long bigfala faea ya, be God ya we mitrifala i wok blong hem, hem i save sevem mitrifala, mo i save tekemaot mitrifala long paoa blong yu.

“Be sapos hem i no sevem mitrifala, nating nomo. Be yu yu mas save se bambae mitrifala i no save mekem wosip long ol god blong yu, mo bambae mitrifala i no save bodaon long aedol ya we yu stanemap.” (Daniel 3:17–18, oli ademap italik).

“Be sapos no” mo “i minim se mi mas ded, i mas olsem” oli ol strong toktok we oli soemaot fet. Kaen toktok olsem we i gat paoa, i kamaot olsem i nomata wanem risal blong hem. Strong paoa long tingting blong Esta, i mekem se, long en !hem i sevem ol pipol blong hem! Iven we, long stat hem i bin save se, semmak olsem we Sadrak, Mesak mo Abednego oli bin save, se nomata ol risal blong jusum fet oli no wan semmak ansa oltaem, be blong mekem samting we i raet, oltaem i raet joes.

I luk se bae yu fesem ol taem, long laef blong yu, we, blong jusum wan rod we i stret mo gud, bae i wan had desisen. I no gat wan long yumi i fri long ol tes blong laef long wol ia. Be, long ples ia tu, yu save jusum blong stap olsem Esta. Jusum stret mo gud fasin; letem ol risal afta oli kam folem.

Long en, i gat wan yu nomo, moa i no gat narawan moa—mo “hadtaem” blong yu blong mekem wol ia i kam wan moa gud ples, hem i naoia nao.