“Stap Rere from Dubae Tempol,” Blong Ol Yut Oli Kam Strong, Julae 2022.
Stap Rere from Dubae Tempol
Ol yut long Dubae mo long Kata oli serem lav we oli gat long tempol, mo bigfala glad we oli gat se bae oli bildim wan tempol kolosap long olgeta.
Ol foto blong Sajaan oli kam long Carla Nacario
Oli ol sot simpol toktok nomo, be oli jenisim laef blong yu taem we wan profet blong God i talem olgeta. Long taem blong jeneral konfrens, ol memba blong Jos raon long wol oli lisin, mo wantem harem tumas ol niu anaonsmen blong tempol. Mo long Sajaan mo Gwen, taem we Presiden Russell M. Nelson i bin talem ol toktok ia: “Dubae, Yunaeted Arab Emiret,” long Epril 2020 jeneral konfrens, tufala yut ia i bin save se laef blong tufala bae i neva semmak bakegen.1
Mitim Sajaan blong Dubae
Saajan we i gat twelef yia, i neva stanap long fored mo luk wan tempol.
“Mama blong mi, i gat wan gol oltaem blong go long tempol,” Saajan i talem. “Lav blong hem from tempol, i pasem i go long evriwan. Naoia, gol blong mi long laef i blong visitim tempol.”
Saajan i bon long India, be taem papa mo mama blong hem i divos, hem i muv wetem mama blong hem i go long Yunaeted Arab Emiret. “Mama blong mi i wok had tumas. Hem i olsem wan supa hiro long mi. Iven long taem blong hadtaem, hem mi neva givap.
Mama mo bubuwoman blong Saajan i joenem Jos long India sam yia bifo Saajan i bon i kam long wol. Oli ridim Buk blong Momon mo oli bin save se i wan ansa long ol prea blong olgeta. Saajan i bin groap long jos wetem mama blong hem, mo hem i jes baptaes, afta we hem i stap wet long raet blong papa blong hem.
“Blong baptaes, i wan long ol bes joes we mi bin mekem,” hem i talem. “Mo taem mi kasem presen we i Tabu Spirit, mi filim i wom mo i glad insaed.”
Naoia Saajan i stap pasem sakramen long wod blong hem mo i stap rere blong go insaed long tempol. Hem i bin kasem tempol rekomen blong hem, mo hem i no save wet blong go insaed long Dubae Yunaeted Arab Emiret Tempol taem we bae i finis.
“Taem mi harem se oli bin anaonsem tempol ia, miwan mi filim se tempol ia i blong mi,” Saajan i talem. “Hem i wan ansa long ol prea blong mifala. !Mi bin sek from se bae oli bildim stret long ples we mi stap laef long hem! Bambae mi save tekem wan tren i go stret long tempol, mo go longwe plante taem olsem we mi wantem. Mi glad tumas tu from Bengaluru Tempol we bae ol bubu blong mi bae oli save go visitim.”
Sajaan i glad tumas se ol bubu blong hem oli save gat Bengaluru India Tempol kolosap long olgeta.
Saajan i wantem mekem ol tempol wok blong ol nara bubu blong hem tu.
“Mi stap mekem miwan i rere blong mekem se bae mi klin inaf blong go insaed long tempol. Mi wantem blong mekem wanem we mi save mekem blong helpem evri bubu blong mi. Mi gat wan gudfala janis blong givim seves long Lod mo mekem ol samting we oli blong kingdom blong God.”
Mitim Gwen blong Kata
Ol foto blong Gwen oli kam long Christina Smith mo oli yusum wetem gladhat blong famli blong hem
Long ol fas 18 yia blong laef blong hem, Gwen i bin stap laef long faef defren kantri: Skotlan, Angola, Inglan, Kasakstan, mo Kata. Wok blong papa blong hem i tekem olgeta raon long wol, be laswan, i go long Medel Is.
Ol nara bigfala brata mo sista blong Gwen, oli muvaot, mekem se hem i stap laef long Kata wetem mama mo papa blong hem. Wan long fevret eksperiens blong hem i blong travel wetem ol yut blong wod, i go long tempol long Kiev Yukren Tempol. I no gat wan tempol we i stap kolosap, mekem se Ol Sent long Medel Is, oli mas flae blong visitim ol tempol long ol nara kantri.
“Mi bin glad tumas from trip blong mifala, mo mi bin wantem blong tekem sam nem blong famli i go,” hem i talem. “Evri dei, bae mi faenem ol nem blong famli long fon blong mi, taem we mi stap go mo kambak long skul. Mi faenem abaot 200 nem. !Mi filim se mi rere gud blong go!
Be i gat wan smol problem we hem i no bin save rere from.
Wan wol sik.
Plen blong Gwen i lan long Yukren long Maj 2020—stret long taem ia we oli stat blong harem se Kovid-19 vaeres i stap goraon. Wetem help blong heven, oli go kasem tempol, mo oli bin save mekem ol baptaes blong ol famli nem we Gwen i rere long olgeta.
“I gat merikel, i folem wan merikel, folem nara merikel,” hem i talem. “Taem mifala i stap draev i go long tempol, mi bin wari long wol sik ia. Be, insaed long tempol, mi filim plante pis mo kamfot. Mo mifala i bin save flae i gobak long Kata stret bifo ol boda oli klos.”
Be mama blong Gwen, we i go visitim wan long ol brata o sista blong Gwen long Yunaeted Stet blong Amerika, i no bin save gobak long Kata. Gwen mo papa blong hem, oli stap long kwarantin long hom taem we papa blong hem i kasem KOVID. “Blong wan smol taem, hem i bin sik tumas, mo i no save muv plante,” Gwen i talem. “Mi filim se mi bin stap miwan. Mama blong mi i no stap, mo mi no save olsem wanem blong kuk gud, be mi save rusum bred mo jis nomo.
Be Gwen i bin gat wan spesel eksperiens taem hem i stap gat jos long hom wetem papa blong hem.
“Mi filim se i olsem se ol pipol ia we mi bin tekem nem blong olgeta i go long tempol oli bin stap wetem mi mo papa blong mi,” hem i talem. “Mi nomo filim se mi stap miwan. Hem i wan gudfala mo kwaet eksperiens. Blong go visitim tempol bifo wol sik ia, i bin wan blesing.”
Dubae Yunaeted Arab Emiret Tempol, oli bin anaonsem jes wan manis afta long tempol trip blong hem long Yukren. !Gwen i glad tumas! Mo hem i save hamas hemia i minim long ol pipol long eria blong hem.
“Mi save se i gat ol pipol insaed long eria blong mi we oli no save pem tikit blong go long wan nara tempol long Yurop. Oli bin wet blong oli sil olsem ol famli we oli no save finis. Hemia i soem long mi se wok blong kam tugeta i rili stap hapen. Yumi stap mekem rod i rere blong Kraes i kambak bakegen.”
Ol Blesing blong Tempol
Wan samting we Gwen mo Saajan i gat we i semmak, i we tempol i stap blesem laef blong tufala finis. Presiden Nelson i talem: “Ol tempol oli nambawan pat blong Restoresen blong ful gospel blong Jisas Kraes. Long gud fasin mo bigfala hat blong Hem, God i stap tekem ol blesing blong tempol oli kam kolosap moa long ol pikinini blong Hem long evri ples.”2