“Gudgudfala Paoa blong Fasin blong Talem Tangkyu,” Blong Ol Yut Oli Kam Strong, Julae 2022.
Gudgudfala Paoa blong Fasin blong Talem Tangkyu
I no wan naes samting nomo blong stap talem tangkyu—hem i save jenisim laef blong yu.
Presiden Russell M. Nelson i bin talem: “Blong stap kaontem ol blesing blong yu, i moa gud moa bitim blong stap kaontem ol problem blong yu. … [Fasin blong talem tangkyu] i givim yumi wan lukluk we i go longwe moa, long saed blong stret stamba tingting blong laef, mo glad blong laef ia.”1
!I tru! Blong stap talem tangkyu, i tekem plante blesing oli kam. Fasin blong talem tangkyu i save helpem yu blong yu hapi moa mo yu helti moa; i helpem yu blong yu slip gud moa, i mekem helt blong yu long tingting mo long bodi i kam strong moa, mo i helpem yu blong yu stap gat hop, mo yu gat lav mo sore long ol nara man. Moa yu save talem tangkyu, moa bae yu save dil wetem ol jalenj blong laef. Long en, fasin blong stap talem tangkyu bae i save tekem yu i go kolosap moa long God, we Hem nao i givim evri gudfala samting (luk long Jemes 1:17).
Long Ester Carneiro Ponciano blong Brasil, blong stap raetem wan lis blong ol samting we hem i talem tangkyu from, i mekem hem i hapi mo i stap helpem hem blong gat paoa mo strong paoa long tingting long ol taem we oli had.
Tangkyu Lis blong Esta
1 Gospel
Ol pikja droing oli kam long Emily Davis
Taem mi stap stadi ol skripja, prea evri dei, go long seminari, mo go long jos, mi filim insperesen blong traehad blong kam gud moa. Gospel i tekem hop ia i kam, se bae i gat ol moa gud dei we bae oli stap kam yet. I tru nomo se i givim wan hapines we i no save finis.
2 Famli blong Mi
Mi gat sikis pipol insaed long famli blong mi, mekem se !haos blong mifala i fulap oltaem! Mifala i spendem taem tugeta blong plei ol bod gem, stap wokbaot aotsaed, stap kuk, mo stap stadi long Kam Folem Mi. Famli blong mi i sefples blong mi. Mi no nid blong priten taem mi stap wetem olgeta. Mifala i no stret evriwan, be mifala i hapi tumas. Mi talem tangkyu blong gat ol pipol we mi save trastem oltaem.
3 Ol Fren
Iven wan wol sik i no bin save brekem ol tru frensip blong mi. Taem mifala i no save luk mifala fes tu fes, be mifala i stil faenem ol wei blong stap wetem wanwan long mifala. Mifala i laekem blong laf mo singsing tugeta. Mi laekem blong serem sam taem wetem ol fren blong mi. Mi talem tangkyu from wanwan long olgeta.
4 Eksasaes o Muvmuv
Sam taem i pas, bae mi no putum eksasaes long tangkyu lis blong mi. Mi no laekem tumas blong stap eksasaes. Afta, mi traem ron long baeskel, !mo mi faenem se mi laekem! Taem mi ron long baeskel blong mi, mi hapi. Mi filim se wol raon long mi i wan moa gud ples. I givim mi moa taem blong tingting, lukluk long kriesen, mo filim lav blong Papa long Heven. Taem mi wari, o mi no glad, hemia i helpem mi blong tingting i stap kwaet. Taem mi ron long baeskel blong mi, mi save luk plante taosen risen blong stap hapi mo stap talem tangkyu.
5 Miusik
Miusik i mekem mi mi hapi bigwan. Wol blong mi bae i no semmak sapos i no gat miusik. Mi laekem singsing mo lisin long miusik stat we mi yangfala finis i kam. Miusik i gat paoa blong leftemap yumi, mo tu, i save mekem yumi filim pis. Mi rili laekem blong lisin long yut miusik blong Jos.
Fasin blong Talem Tangkyu I Tekem Tru Glad I Kam
Taem mi stap luk long laef blong mi wetem ol ae blong talem tangkyu, mi luk olsem wanem Lod i stap long evri taem insaed long laef blong mi, i nomata hamas ol samting oli had. Mi bin luksave se ol samting we oli simpol i save tekem bigfala hapines i kam long yumi. Taem yu lukluk raon mo luk wanem i rili mata, yu save faenem tru glad tu.
?Wanem Nao Yu Yu Talem Tangkyu From?
Fani samting taem we yu mekem wan tangkyu lis, i we, taem yu stat, i had blong stop. !Yu traem! Tekem smol taem blong raetemdaon tangkyu lis blong yuwan. Tingting long sam wei we yu save soem tangkyu blong yu long Papa long Heven mo ol narawan, from ol presen ia. Maet bae yu faenem se, moa yu raetemdaon samting, !moa samting bae yu tingbaot blong yu talem tangkyu from!