“Paoa Ia we Yumi Singaotem Gladhat,” Blong Ol Yut Oli Kam Strong, Julae 2022.
Help long Laef
Paoa Ia we Yumi Singaotem Gladhat
Gladhat blong God i save helpem yumi, i nomata wanem jalenj yumi stap fesem.
Foto i kam long Getty Images
Mi bin go long fenerol blong wan foma memba blong wod, we i tekemaot laef blong hem afta wan longfala taem we hem i fesem sik ia blong tingting i fasfas. Hat blong mi i harem nogud taem mi stap wetem ol fren blong hem mo famli, mo krae sore from hem i lus.
Sik blong tingting i fasfas mo ol jalenj blong helt long tingting, oli bigwan tumas mo i had blong ol pipol we oli stap fesem, mo blong evriwan we i lavem olgeta. Gudfala nius, i we, gospel blong Kraes i givim hop mo help tru long presen ia blong Hem, we i gladhat.
Wan stadi, we i tekem kolosap 600 yang adalt long Brigham Yang Yunivesiti i bin soem se olgeta we oli bin andastanem gladhat blong Jisas Kraes oli bin gat ol smol level blong sik blong tingting i fasfas, tingting i wari, wantem mekem samting i stret gud oltaem, mo sik blong stap sem.1 ?Wanem nao ol yang pipol ia oli bin andastanem abaot gladhat, we i bin mekem plante samting i defren insaed long laef blong olgeta?
God I Lavem Yumi Gogo I No Gat En
Long stadi ia, sam pipol oli bin biliv se God mo Jisas Kraes bae oli lavem mo helpem olgeta nomo sapos oli stret evriwan finis. Olgeta pipol ia, oli bin gat moa hadtaem bitim ol narawan we oli bin andastanem se God mo Jisas Kraes, Tufala i lavem olgeta gogo i no gat en, mo Tufala i stap ia oltaem blong olgeta.
Long Inglis, toktok ia, grace, i gat plante defren mining. Hem i save minim, blong luk naes we i no flas tumas, blong stap kaen, o fasin blong mekem gud fasin. Long Hibru, toktok ia i minim, wan givhan wok, o wan gudwok we oli mekem wetem lav mo sore. Maet, hemia nao i eksplenem se from wanem ol Kristin Man, truaot long plante handred yia, oli bin yusum toktok ia, grace, o gladhat, blong tokbaot givhan wok, o gudwok we i kam long hat, mo lav.
God I Wantem Helpem Yumi
Ol Lata-dei Sent oli andastanem se gladhat i minim moa bitim wan gud kwaliti fasin blong God. Gladhat tu i wantem blong tokbaot olsem wanem Hem i stap mekem samting wetem yumi taem yumi traehad blong kam moa olsem Hem (luk long Moronae10:32). Presiden Dieter F. Uchtdorf, we i bin Seken Kaonsela long Fas Presidensi long tetaem ia, i bin eksplenem se, gladhat, i “tabu help mo presen blong paoa we yumi gro aot long hem long bodi we i no strong mo i no save mekem tumas, i go long wan bodi olsem hemia blong wan god.”2
Long stadi ia we oli jes tokbaot, ol yang pipol we oli bin luk God mo Kraes olsem Tufala Man we Tufala i rere, mo wantem, mo save helpem olgeta, oli no gat tumas sik long tingting olsem olgeta ia we oli bin filim se oli stap olgetawan.
God I Mitim Yumi long Ples we Yumi Stap long Hem
Plante pipol tumas oli filim se help blong God i wan samting we oli no save kasem from se oli no wok strong blong kasem. Trutok, i we, gladhat i wan presen. Yu no nid blong wok blong winim wan presen. Yu nidim blong jusum blong kasem presen ia nomo.
Long stadi ia, i no bin gat tumas hadtaem long saed blong sik long tingting long medel blong olgeta we oli bin andastanem se God i stap helpem yumi i nomata weaples yumi stap long hem, mo i nomata wanem yumi bin mekem. Elda D. Todd Christofferson blong Kworom blong Olgeta Twelef Aposol i bin tijim: “Mo yumi no nid blong kasem wan mak blong paoa o mekem gud samting bifo God i givhan—help we i kam long heven i save blong yumi long evri aoa blong evri dei, nomata weaples nao yumi stap long hem long rod blong stap obei.”3
Long fenerol blong fren blong mi, mi bin talem tangkyu from ol strong testemoni we oli talem abaot hop mo hiling we i stap long evriwan tru long Atonmen blong Jisas Kraes. I tru. Kraes i ansa blong evri problem mo i stamba blong tru glad ia.