“Stap Rere from Ol Kavenan blong Tempol,” Blong Ol Yut Oli Kam Strong, Julae 2022.
Stamba Toktok Ia mo Mi
Ol yut oli serem olsem wanem oli stap laef folem ol toktok we oli stap long Stamba Toktok blong Ol Yang Woman, mo hemia blong Aronik Prishud Kworom
Stap Rere from Ol Kavenan blong Tempol
“Bae mi … mekem mo kipim ol tabu kavenan, mo kasem ol odinens mo ol blesing blong tabu tempol.”
Foto i kam long Temple Crowd Sourcing; skae i kam long Getty Images
!Mi laekem blong go long tempol! Tangkyu from se i gat tempol, mi save gat wan famli we i no save finis, save help blong mekem Isrel i kam tugeta, mo kasem ol kwaet toktok blong Spirit, mo kasem kamfot.
Taem famli blong mi i muv i go long niu haos blong mifala, mi talem tangkyu se i bin stap kolosap long tempol. Mi save lukluk gud tempol taem mi stanap long windo blong bedrum blong mi. Evri dei, taem mi luk tempol, mi tingbaot se mi mas rere blong mekem ol kavenan we oli no save finis.
Hem i rili impoten blong stap rere from ol kavenan we yu stap mekem insaed long tempol, mo blong helpem ol pipol long narasaed long vel, blong olgeta tu, oli mekem kavenan ia. Mi bin stap rid abaot tempol, mo traem blong stap rere folem hamas mi save mekem, blong mi save mekem moa kavenan. Brata blong mi i jes kasem endaomen blong hem, mo i bin wan spesel eksperiens long hem. Taem mi luk hamas hem i hapi, i mekem mi mi luksave se mi bin wantem olgeta blesing ia tu.
Be, iven we mi gat wan tempol i stap stret aotsaed long windo blong mi, mi no wantem tekem hemia se i nating nomo. Mekem se mi traem blong laef long wan wei we bae mi oltaem stap klin inaf blong go long tempol.
Taem we tempol i bin klos long taem blong wol sik ia, mi bin gat fet se bae i no klos blong wan longfala taem. Afta, mi bin save gobak long tempol blong fas taem, mo i bin wan spesel eksperiens evriwan. Mi bin fraet smol from se mi no bin go ia blong wan longfala taem. Be taem mi wokbaot i go insaed, mi filim se hemia i stret ples blong mi. Mi save filim Spirit.
Mi gat wan strong testemoni abaot ol tabu ples, mo mi no save wet blong mekem moa kavenan wetem Papa blong mi long Heven.
Hem we i raet, i stap long Aedaho, YSA.