Sam Strong Samting

I Kam long David A. Edwards

Ol Magasin blong Jos

I luk se, ol smol mo simpol samting, oli ol strong samting.

Tekem se yu gat wan helt problem we i no save go lus. Wan i kam talem long yu se i gat wan man i save mekem yu kam oraet bakegen. Hem i stap longlongwe, be yu raet i go long hem, mo afta, yu travel i go blong yu save luk hem, mo harem se bae hem i talem wanem.

Taem yu kasem haos blong hem, wokman blong hem i kamaot, i talem se bos blong hem i talem se yu go swim long wan reva kolosap.

Wokman i tanem raon, i gobak, mo yu yu harem se i nogud. Yu tingting se: “?Mi wokbaot longwe i kam, blong harem hemia?”

Ol Samting we Wan I Wantem se I Hapen

Hemia wanem i bin hapen long Neman. Hem i wan kapten blong Siria—wan man we plante oli respektem hem, mo hem i gat fulap responsabiliti. Be hem i gat leprosi, wan nogud sik blong skin.

Nomata se hem i no wan Man Isrel, hem i bin harem abaot profet Elisa, from wan yangfala wokwoman we i blong Isrel i tokbaot long hem. Neman i bin bilivim testemoni blong hem abaot Elisa mo God ia blong Isrel. Mekem se hem i go luk Elisa. Taem we Neman i kasem hom blong Elisa, Elisa i bin sendem wan mesenja, we i talem long Neman blong hem i go swim long Jodan reva seven taem, blong hem i kam oraet.

Pikja

Neman i stap lisin long wokman

Pikja droing i kam long Corey Egbert

Neman i kros. Hem i ting se bae hem i luk Elisa, mo Elisa bae i putum han blong hem stret long ples we sik ia i stap long hem, bae i prea long God, mo bae i hilim sik ia long wan merikel. Hem i bin tingting tu se i gat sam nara reva we oli gud moa long homples blong hem, we bae hem i save go swim long hem.

Neman i bin ting se sam samting bae oli hapen. Hem i bin ting se Elisa bae i kamaot mo luk hem. Maet hemia i from se Neman i gat wan hae posisen, mo hem i stap kasem samfala respek fasin. Hem i ting se bae i gat wan ansa we i wan merikel i hapen, o wan moa bigfala samting i hapen blong stretem problem blong hem, bitim wanem hem i bin kasem. Mebi i olsem from ol stori we hem i bin harem abaot Elisa. Mekem se, eksperiens we hem i bin gat, i mekem hem i kros smol.

Fasin blong Gat Tingting I Stap Daon

Be, stori blong Neman, i no stop ia. Wan long ol wokman blong hem, i givim hem sam waes advaes:

“Masta, sapos profet ya i talem long yu blong yu mekem wan strong samting, bambae yu save mekem, be samting ya we hem i talem i isi nomo. ?From wanem yu no save go swim olsem we hem i talem, blong bodi blong yu i kam gud bakegen?” (2 King 5:13).

Neman i luksave se wokman ia i talem tru samting. Sapos profet i bin askem hem blong mekem wan strong samting, bae hem i mekem. ?From wanem bae yumi no mekem wan samting we i simpol nomo? Hem i putum tingting blong hem i stap daon. Neman i go swim seven taem long Jodan reva mo i kam oraet.

Pikja

Neman i stap swim long Jordan reva

Ol Smol mo Simpol Samting

Wanwan taem Lod i save askem blong wan man o woman blong mekem ol “strong samting.” Be, Lod i no wok long wei ia oltaem. Plante taem, Hem i yusum “ol smol mo simpol samting” blong mekem “ol bigfala samting” oli hapen insaed long laef blong yumi (Alma 37:6).

Samtaem, wanem we yumi wantem luk i hapen, o hae tingting blong yumi, i mekem yumi ting se wei blong Lod i simpol tumas, o i smol tumas blong yumi givim taem from (luk long 1 Nifae 17:40–41). Be Lod i save helpem yumi blong yumi winim ol filing ia mo yumi putum tingting blong yumi i stap daon. Hem i lavem yumi, mo Hem i wantem blesem yumi, mo helpem yumi blong kam moa olsem Hem (luk long Moses 1:39).

Hemia oli samfala eksampol nomo blong ol smol mo simpol samting we Lod i askem yumi blong mekem blong kam kolosap moa long Hem, mo kasem ol blesing blong Hem.

Prea mo ridim ol skripja evri dei (luk long 2 Nifae 32:3, 9).
Taem we yu sin, sakem sin (luk long Doktrin mo Ol Kavenan 1:31–32).
Go long Jos mo tekem mo kakae sakramen evri wik (luk long Moronae 6:5–6).
Pem taeting (luk long Malakae 3:8–10).
Folem Tok blong Waes (luk long Doktrin mo Ol Kavenan 89).
Mas stap ones (luk long Doktrin mo Ol Kavenan 51:9).
Mas kaen (luk long Efesas 4:32).
Givim seves long ol narawan (luk long Matiu 25:34–40).

Maet bae yu save tingbaot plante moa.

So, taem yu kam fesem wan samting we i smol mo simpol, luklukgud. Maet i wan gaedlaen insaed long buklet, Blong Ol Yut Oli Kam Strong, o sam kaonsel insaed long wan toktok blong konfrens, o wan samting we bisop blong yu i bin askem yu blong go mekem. Nomata se hem i wanem, tingbaot Neman, mo jes mekem. Maet i smol, be ol blesing bae oli bigwan.