“Tempol mo Wokbaot blong Yu blong Taem we I No Save Finis,” Blong Ol Yut Oli Kam Strong, Julae 2022.
Tempol mo Wokbaot blong Yu blong Taem we I No Save Finis
Yumi gat blesing ia blong oli soem rod long yumi insaed long haos blong Lod.
foto i kam long Noel Maglaque
Yu pat blong wan wokbaot. Hem i stat longtaem finis taem yu bin stap laef wetem Papa long Heven, olsem spirit boe o gel blong Hem. Naoia, yu stap long wol ia, mo spirit blong yu i stap long wan haos we i bodi blong mit mo bun blong yu, blong lanem evri samting we i nid blong lanem, blong mekem se, wan dei, yu gobak long Papa long Heven, mo yu naf blong kasem evri blesing we Hem i gat long ol pikinini blong Hem. Sam long ol samting we oli moa bigwan we bae yu lanem long wokbaot ia we i no save finis, oli stap insaed long ol tempol blong Jos Ia blong Jisas Kraes blong ol Lata-dei Sent.
Ol Tempol raon long Wol
Taem mi bon i kam long wol long 1928, i gat seven tempol nomo i stap. Naoia, yumi gat ol naesfala tempol we oli stap olbaot long wol. !Mo bae i gat moa yet i kam! Ol tempol oli tekem glad mo paoa we yumi nidim blong wokbaot ia we i no save finis.
I no gat wan nara bilding long wol ia—iven ol bilding we oli naes we oli naes—we i gat wanem we ol tempol oli gat. Sevya i talem long Pita se bae hem i kasem paoa mo atoriti blong mekem se “wanem samting we yu yu blokem long wol ya, bambae God we i stap long heven, hem tu bambae i blokem, mo wanem samting we yu yu letem long wol ya bambae hem tu i letem olsem” (Matiu 16:19). !Hemia wan bigfala toktok! Oli stap dediketem mo setem apat ol tempol tru long paoa blong prishud, blong i stap olsem wan ples blong mekem ol tabu odinens insaed long hem. Ol odinens ia, oli wok mo oli laef long tugeta saed blong vel.
Glad Ia blong Gat Ol Famli we Oli No Save Finis
Waef blong mi, Barbara, i ded kolosap fo yia nao. Be from se mitufala i go insaed long haos blong Lod, mo mitufala i bin sil olsem wan hasban mo waef tru long paoa blong prishud,mitufala i joen tugeta wetem seven pikinini blong mitufala, 43 apupikinini, mo ova long 100 smol apupikinini, blong evri taem we i no save finis. !Tempol hem i wan naesfala samting! Glad i fulumap hat blong mi from se famli blong mi bae i stap tugeta blong oltaem. Mo i semmak tu long famli blong yu.
Taem yu kasem yia we mi gat, bae yu no intres tumas blong gat fulap mane, o stap draevem wan flas trak. Be samting we bae i moa sas long laef blong yu, bae i famli blong yu—i no famli ia nomo we yu gat long ples ia, be tu, famli we yu gat long ol taem we oli no save finis.
Paoa blong Trutok we I Kambak
Yu save se huia yu—wan boe o wan gel blong God we i no gat limit blong hem. Yu save se yu kam wea i kam, from wanem yu stap long ples ia, mo wanem i stap long fored long wol ia we i stap kam.
Mi mi sapraes tumas se, ol trutok ia, oli kam from risal blong wan yang boe we i bin nildaon mo i bin prea long wan bus blong ol tri. Papa mo Pikinini, Tufala i bin kamaot long Josef Smit mo, step afta step, ol blesing blong gospel ia oli bin kambak.
Mi mi gat wan strong filing blong talem tangkyu from Josef Smit. Andastaning blong yumi we oli putumbak, abaot plan blong God, stamba rol blong Atonmen blong Jisas Kraes, mo hamas ol famli mo ol tempol oli impoten, evri samting ia, i bin stat wetem hem. Bambae yumi gohed blong bildim ol tempol, mo gohed blong anaonsem ol niuwan taem we bigfala mesej we i gogohed, blong Restoresen, i kavremap wol ia.
Ol trutok we oli putumbak, speseli ol trutok we yumi stap lanem tru long ol odinens blong tempol, oli mekem yumi lukluk laef long wan defren lukluk, mo hemia i givim yumi paoa blong helpem yumiwan long wokbaot blong yumi we i no save finis.
Mekem Tempol I Kam Wan Pat blong Laef blong Yu
Maet i had long yu blong yu tingting se, wan samting we yu save mekem tedei, bae i mekem samting i defren bigwan, long ol yia we oli stap kam, o iven afta long laef ia. Be tingbaot wokbaot ia we i no save finis we yu stap long hem naoia. Taem yu bin baptaes, mo kasem konfemesen, yu bin tekem ol impoten step long wokbaot ia.
Yu save helpem olgeta we oli ded blong oli muv fored i go long wokbaot blong olgeta taem oli mekem ol baptaes mo konfemesen blong olgeta insaed long tempol. Mi bin mekem hemia plante taem, taem we mi gat sem yia olsem yu. Mi tingbaot wan taem we mi bin baptaesem ova long 60 pipol. !Mi no save pulum gud win blong mi bitwin ol baptaes ia!
!Sapos yu gat wan janis blong go long tempol, yu mekem! Go plante taem, sapos yu save mekem. Plis, yu no letem yu fasfas long ol samting we oli save tekem fulap taem blong yu, mo i save pulumaot yu long wanem we i ril mo i no save finis. Iven sapos yu stap laef longwe long wan tempol, lukluk nomo long wan samting mo mekem yu yu rere naoia blong yu kam klin inaf blong go insaed long tempol.
Rere Naoia blong Kasem Ol Tempol Blesing blong Yu
Wan long ol fas odinens blong tempol we yu kasem blong yuwan, hem i endaomen. Hemia i wan presen we i paoa blong prishud we i stap blong evri pikinini blong God i yusum. Yumi stap yusum paoa ia taem yumi kasem ol odinens mo stap kipim ol kavenan we yumi mekem insaed long tempol evri dei long laef blong yumi.
Yu save rere from endaomen blong yu mo ol nara odinens blong tempol taem yu tingting hevi, stap prea, mo stap lanem samting abaot tempol. Sapos ol papa mo mama blong yu, o ol bubu blong yu oli bin go long tempol, tokbaot wetem olgeta se hemia i wan bigfala blesing. Ol bisop mo ol lida blong yu, bae oli save helpem yu tu. Mi hop tu se bambae yu faenem ol gudfala fren we bae oli sapotem yu. Bambae yu glad taem dei ia bae i kam, we bae yu go insaed long tempol, mo bae yu rere blong kasem evri gudfala promes mo blesing we Lod i wantem blong givim long yu.
Kraes I Stap Tijim Ol Disaepol blong Hem, i kam long Justin Kunz
Wokbaot Ia I Stap Gohed
Stamba tingting biaen long laef ia, i blong mekem yumiwan i rere from nekis laef. Bigfala plan blong Papa long Heven i no finis long taem yumi ded, from se, spirit blong yu, i neva ded. Hem i stap go long spirit wol mo i gohed blong stap laef, blong givim seves, mo i stap wet long Laef Bakegen long Ded. Nao bae evri ni bae i bendaon mo evri tang i konfes se Jisas Hem i Kraes (luk long Aesea 45:23). From Atonmen mo Laef Bakegen long Ded blong Hem, bodi mo spirit blong yumi bae i joen bakegen, mo wokbaot blong yumi bae i gohed i go kasem ol taem we oli no save finis. !Hemia bae i wan bigfala blesing blong yumi evriwan!
Afta we oli talem mo mekem evri ting, evri samting we i gat risal blong hem long taem we i no save finis, mo evri samting we i impoten, i lukluk nomo long laef mo long misin blong Jisas Kraes. Save blong yu mo bilif blong yu long Hem bae i gro i kam bigwan taem we yu stap givim seves insaed long tempol. Bambae yu filim lav ia blong Hem we i no gat en, mo bae yu filim glad mo paoa blong spirit truaot long laef blong yu.