“Te Mwaaka are Ti Aranna bwa te Akoia,” Ibukin Kakorakoraia Kairake, Turai 2022.
Maium Buokana
Te Mwaaka are Ti Aranna bwa te Akoi
Ana akoi te Atua e kona ni buokiira, n aki tabe bwa aekakira kaangaanga ake ti kaitara mangaai.
Tamnei iroun Getty Images
I ira ana taunimate temanna kaain ara uoote ngkoa are e mate man te bakabure imwiin rawawatan ana iango inanon te tai ae maan. E uruaki nanou ngke I rotaki n te nanokawaki ma raoraona ao ana utu ibukin buan maiuna.
Rawawatan te iango ao tabeua kaangaanga ni marurungin te iango e aki bebete arona ao ni kaangaanga ibukiia aomata ake a rootaki iai ao ibukiia ni kabane ake a tangiriia. Te rongorongo ae raoiroi man te euangkeiro bwa Kristo e anga te kantaninga ao te buoka rinanon Ana bwaintangira n akoi.
Te kamatebwai ae a irekereke iai 600 kairake n ikawai i Brigham Young University e kaotia bwa naake iai aia atatai n ana akoi Iesu Kristo e karako rawawatan aia iango, kakain nanoia, te aki kororaoi, ao te maama.1 Tera aia atatai kairake n aomata aikai n te akoi are karaoa te bitaki ae moan te kakawaki inanon maiuia?
E Tangiriira te Atua n Akea Tiana
N te kamatebwai, tabeman aomata a kakoaua bwa te Atua ao Iesu Kristo a tangiriia ao ni buokiia tii ngkana a tia ni kororaoi. E korakora riki korakaia aomata akanne nakoia naake a ataia bwa te Atua ao Iesu Kristo a tangiriia n akea tiana ao a memena irarikiia n taainako.
N te taetae n Imatang, te taeka ae akoi e mwaiti nanona. E kona n nanonaki bwa te kakateke, akoi, ke mwamwannano. N te taetae n Ebera, te taeka anne e nanonaki bwa te inanonano ke bon te anganano ma te nanoanga. Tao aei e kabwarabwara bwa bukin tera ngkai Kiritian rinanon tienture a kabongana te taeka ae akoi ni kabwarabwara te nanonaki iroun te Atua, anganano n ibuobuoki, ao te tangira.
Te Atua e Tangiria ni Kan Buokiira
Aika Itiaki ni Boong Aika Kaitira a ataia bwa te akoi nanona n rawata riki nakon anuan te Atua. Te akoi e kabwarabwara naba bwa E kanga ni kabaeaki mangaira ngkai ti kataia n riki n Ai arona (tara Moronaai 10:32). Beretitenti Dieter F. Uchtdorf, ngke ngaia te Kauoman ni Kauntira n te Moan Beretitentii, e kamataata bwa te akoi bon “te buoka mai ieta ao te entaumente n te korakora are ti rikirake man kabwakara n aomata ao n tianaki n arora ae ngkai nakon te aomata ae kairetataaki.”2
N te kamatebwai are e taekinaki mai imwaaina, kairake n aomata are a noora te Atua ao Kristo bwa a tauraoi, anganano, ao ni kona ni buokiia ake a karako aia kaangaanga ni marurungin aia iango nakoia naake a namakinna bwa a bon tiku ibon irouia.
E Kawarira te Atua n Taabo ake Ti Mena Iai
Angiina aomata a namakinna bwa e kaangaanga rokon ana ibuobuoki te Atua ibukina bwa tao a bon tuai tau n karekea. Te koaua bwa, te akoi bon te bwaintangira. Tiaki n ae ko na karekea te bwaintangira. Ko na tii man am rinerine ao e na reke iroum.
N te kamatebwai, e bon karako te korakai ma marurungin te iango irouia naake ataia bwa e buokiira te Atua n taabo ake ti mena iai n aki tabe bwa tera baika ti a tia ni karaoi. E reirei Unimwaane D. Todd Christofferson man te Kooram n Abotoro n te Tengaun ma Uoman, “ti aki kainnanoia bwa e na reke tian ara konabwai tabeua ke te tamaroa imwaain ae e na buokiira te Atua—te ibuobuoki ae tabu e kona n riki bwa ara bwai ni katoa aoa n te bong koraki, n aki tabe bwa ti mena iaa ni kawain te ongotaeka.”3
N ana taunimate raoraou, I kakaitau ibukin kakoaua ake a kaotaki ibukin te kantaninga ao te kamaiuaki are e tauraoi ibukiia ni kabane rinanon ana Mwakuri ni Kamaiu Iesu Kristo. Ni koauana, Kristo bon katokan kaangaanga nako ao bon oin te kimwareirei ni koaua.