“Akea n ai Arom,” Ibukin Kakorakoraia Kairake, Turai 2022.
Nakomai, Iriirai
Etita
Akea riki n Ai arom
Te Uea e katauraoa Etita ibukin ana mwakuri ae kakawaki, ao E karaoia naba anne ibukim.
Karaoa te bwai teuana ngkai n akea baireana. Tera nako are ko tangiria! Ioa baim ietan atuum, , mino n te mronron, ao takaruai tabeua taeka aika aki boo ma aongia n aron taeka aika, “I tangira te kariki bwanaana.”
A bane n tia? E raoiroi. Ko a tibwa tia ni katia te bwai teuana ae e tuai man kakaraoaki mai imwaaina. Ae e kamimi n tangina, tera ae ko a tibwa ni karaoia-e ngae ngke ko nang tibwa iangoa te bwai teuana ma ko aki karaoia—e tuai ni karaoaki n aekan raoi anne n te rongorongo ni kabane. Tiaki n te tabo are ko mena iai, tiaki n te tai raoi aio, ao tiaki mairoum.
Te kamarurung ae uarereke man aki boo a aongina e kaota te bwai ae e kakawaki: akea temanna ae aekakim raoi, akea naba n te aro ae ko mena inanona. Akea naba ibuakoia tarim ma mwaanem. Nikabane te aonnaba, akea riki ae iai aekakin tarena aika iroum, konabwai, iraorao, utu, bwai n tangira n tamnei, ao oin am taratara.
N aekan Etita n te O Tetamenti, ko bon onoti n tau n tain ”te aeka n tai ae ai aron aei” (Etita 4:14) are a na iai mwiina ibukin te tamaroa ni maiuia ni kabane ake ko kinaia.
Iai bwaai aika a kakawaki aika ko na karaoi!
Man te Akea ana Karo nakon te Kakannato
Ngkai ko kamatebwaia te O Tetementi n te namakaina aio ae kanoan Nakomai, Iriirai, ko na reiakina taekan te ataeinnaine ae e kakateke ae te Iutaia ae arana Etita. N te taina n ana tai n ataei, e tiku n akea ana karo Etita ao e kaikawaaki iroun kaain ana utu, Moretekai. E ikawairake n te tai are a tauaki Iutaia bwa buure irouin te aba teuana.
Ngke te ataeinnaine ae akea ana karo ae maeka n te aba ae kamiimi, bon akea n ana kantaninga bwa n te tai teuana e na riki bwa te uea n aine. Ma anne raoi te bwai ae e riki (taraa Etita 2). E rineaki bwa buun te Uea, Aatueruti.
Ma n te bongina e aitara ma te kakaewenako ae e kakamaaku: ana aomata Etita, Iutaia, a mena n te kaanganga ae e karina ae te kamaunanakoaki. Buuna, are te Uea, ngke e a tia n ongora taeka ni ibuobuoki mairouia ana kauntira aika ana taan rabakau, e kanakoa te kaetieti bwa ni kabane Iutaia n te mwakoro a na bane ni kamateaki n te tai are e na baireia.
Ngkai, a mwaiti aomata ni maeka n te kaawa. A mwaiti naba Iutaia ni maeka n te kaawa. Ma ti temanna te Uea n Aine ae Etita. Ao bon tii ngaia te aomata ae e kona ni katoka te kaangaanga ae e kakamaaku aio.
N aekan te Uea n Aine ae Etita, bon ti temanna naba ngkoe. Bon tii ngkoe ae ko kona ni karaoi bwaai aika ko kona ni karaoi—bwaai aika e kainnanoiko te Uea bwa ko na karaoi. Bwaai aika a kona ni katei kawai nakon kamaiuan te botan aomata ae mwaiti.
Kaeka nakon Tataro
E rarabwa bwa e karako am tai n aitara ma te bwai teuana ae e karuanikai ma ni kakamaaku n aron are e kaitara ma ngaia Etita. Ma tiaki nanona bwa oin tabem n te maiu aei e aki manena.
N ai aron Etita, ko a tia ni kairaki ao ni katauraoaki bwa antai ngkoe ngkai. Ao te katauraoi anne e na reitinako ngkai ko iriira Iesu Kristo. Ko kona n riki bwa te kaeka nakon aia tataro aomata ni katoa bong.
Ao eng, e ngae ma am tarena ao am konabwai ni kabane, e rangi n tamaroa n taainako te bubuti ibukin te buoka mairoun te tamnei inanon kawaim n aron are e karaoia Etita.
Te Onimaki, te Kabureaki, ao Ngkoe
E ataia Etita bwa e na riai ni kataia ni kamaiuia ana aomata. E ataia naba e kainnanaoa karakan te onimaki ao te boutoka mairouia ana aomata ngkai e ukora te buoka mairoun te Atua. “Nako, bootia I Iutaia ni kabaneia ake a mena i Tutian, ao kam na aki mamatam ibukiu,”e taku Etita nakoia ana koraki, “ao tai amwarake ao tai mooi i nanon tenibong, ni bong ma ni ngaina: ao Ngai ma au nikiranroro ti na aki mamatam n te aro naba aei.; ao N na rin n te aro anne nakon te uea, n te aro ae kaokoro ma te tua: ao ngkana tao N na mate, ao N na mate” (Etita 4:16).
Etita, iroun James L. Johnson
Ngkana e a matoa te maiu,a rairaki riki nakon te Atua taan onimaki. E kainnanoi ni kabane buoka Etita ake e kona ni karekei. E aki ti kainnanoa te buoka n taetae ma buuna n taekan ana kaetieti, ma e na kabuanibwai maiuna tii man kawarakin te Uea n akean weteana moa (are e ekanako te tua, e ngae ngkana te uea n aine).
E reke iroum ana bure ao ana onimaki? E riai manga warekana kaua: “Ngkana N na mate, N na boni mate,” e taku Etita. A mwaneweaki taeka aika a korakora aikai irouia Tiateraka, Metiaka ao Abeteneko nakon te Uea are Nebukaneta ngke a rawa n taromauria katotongan te uea te koora.
E ngae ngke e kakamaakuia bwa e na tewenakoia nakon te nnenikanaiai ae uramwaakaa are e kabuebue ibukin te aki ongo n ana taeka, a taku ma te korakora . “Ngkana tao arona, ao e kona Atuara ae ti toro Irouna ni kamaiuira man te nnenikanaiai ae uramwaaka te ai iai, O te Uea.
“Ma ngkana tao e aki, ao ke e ataki aei iroum ngke, O te uea, bwa tina aki toro irouia antim, ao tina aki taromauria te boua are te koora are ko kateia” (Taniera 3:17–18, e kainanoaki katuruturuana).
“Ma ngkana tao e aki” ao “Ngkana tao N na mate, ao N na mate” bon taeka n onimaki aika kamimi. Te aeka n onimaki ae korakora aei e konaa n noraki n aki tabe bwa tera mwiina ae na riki. Ninikorian Etita n tokin te tai e a kamaiuia ana botan aomata! E ngae n anne, e ataia n tokin te tai, n aron Tiateraka, Metiaka ao Abetenoko, bwa e ngae ngke rinean te onimaki e aki konaa n ataaki mwiina bwa tera, karaoan te bwai ae riai bon ngaia te rinerine ae e eti.
E na kona n reke n oin maium ike ko rinea te kawai ae raoiroi e bon konaa ni matoatoa. Akea ibuakora ae e inaomata man angin taian kakatai n te rabwata. Ma ikai naba ko kona n rineia n riki bwa kanga Etita. Rinea te raoiroi, kariaia bwa e na iai mwiina ae na riki.
Ao n tokina, ai bon ti ngkoe e na bon iai—ao am “tai ae aron aei” ni karika te aonaaba bwa e na tamaroa riki ae ngkai.