“Te Tembora ao Mwanangam ae Ake Tokina,” Ibukin Kakorakoraia Kairake, Turai 2022.
Te Tembora ao Mwanangam ae Akea Tokina
Ti rangi ni kakabwaiaaki ni kairaki inanon ana auti te Uea.
Rawetamnei iroun Noel Maglaque
Iai te mwananga ae ko mena inanona. E moa ma ngkoa ngke ko maeka ma te Tama are i Karawa n aroia Natina mwaane ao aine aika tamnei. Ngkai ko mena iaon te aonaaba ma tamneim ae kawakinaki raoi inanon te rabwata n reiakin ni kabane ake a kainnanoaki bwa n te bong teuana ti na okira Tamara are i Karawa ao n tau ibukin kakabwaia ni kabane ake a tia n katauii ibukiia Natina. Tabeua bwaai aika a nangi ni kakawaki aika ko na atai n te mwananga ae akea tokina aio a mena n ana tembora Ana Ekaretia Iesu Kristo Ibukiia Aika a Itiaki ni boong aika Kaitira.
Tembora ni katobibia te Aonaaba
Ngke I bungiaki n 1928, iai ti itiua te tembora. Ngkai ao iai ara tembora aika a kakateke ni kabuta te aonaaba. Ao a na iai riki! A uota te kukurei ao te korakora are ti kainanoia taian tembora ibukin mwanangara ae akea tokina.
Akea riki kateitei iaon te aba—riki kateitei aika a rangi n rianako tamaroaia— n ai aron tamaroan tembora. Te Tia Kamaiu e tuanga Betero bwa e na anganaki te korakora ao te mwaaka n te aro” bwa terana are e kabaeaki iaon te aba e na kabaeaki naba i karawa” (Mataio 16:19). Anne te rongorongo ae bubura! A katabuaki taian tembora ao ni kamatoaaki man mwaakan te nakoanibonga bwa te tabo ni karaoi otenanti aika a tabu. Otenanti aikai a rangi ni korakora iaon te rabuna aika uaitera.
Kakukurein te Utu ae Akea Tokina
Buu, ae Barbara, e motirawa aua te ririki n nako. Ma ibukina tia rin n ana auti te Uea ao ni kabaeaki bwa buumwane, buuaine man mwaakan te nakoanibonga, ti kabaeaki ni kabane ma natira aika itiman, 43 tibura, ao ae riaon 100 tibutorura, ibukin te maiu ae akea tokina. E rangi ni kakukurei te tembora! E kaonaki nanou n te kimwareirei ibukina bwa a na manga ikotaki au utu n akea tokina. Ao am utu a konaa naba.
Ngkana ko a roko n rorou, ko na aki nano ni kan karawata am mwane ke ni kabuta te kaa ae e rangi n tamaroa. Te kabanea ni kakawaki ni maium bon am utu—ti aki tii am utu ae a reke ikai ma am utu naba n te maiu are akea tokina.
Mwaakan te Koaua ae Kaokaki
Ko ataia bwa antai ngkoe—te nati te mwaane ao te aine iroun te Atua ma ami konabwai ae akea tiana. Ko ataia bwa ko roko maia, tera bukin rokom ikai,ao tera aika imwaain te aonaaba are e na roko.
I nangi ni kukurei bwa koaua aika a roko n rimwian te bwai ae riki ae e kamimi iroun te ataeinmwaane are e katorobubua ao n tataro n te buakonikai. Te Tama ao te Nati a kaoti nakon Iotebwa Timiti ao, teutana imwin teutana, a kaokaki kakabwaia ibukin te euangkerio.
E korakora au namakin ni kakaitau ibukin Iotebwa Timiti. Ara atatai are e kaokaki ibukin ana babaire te Atua,oin taben Iesu Kristo n ana Mwakuri ni Kamaiu, ao kakawakiia utu ao taian tembora a bane ni moanaki mairouna. Ti na reitinako ni katei taian tembora ao ni katanoatai aika a boou bwa te rongorongo ae kakannato, ae reitinako ni Kaokan te Euangkerio ae kaona aon te aba.
Koaua aika a kaokaki, ai moarara riki koaua ake ti reiakin rinanon taian otenanti n te tembora, e karekea te taratara n te maiu ao anganiira te mwaaka ni buokiira ni mwanangara ae akea tokina.
Karaoa te Tembora bwa Mwakoron Maium
E na kona ni matoa aron iangoana iroum bwa te bwai teuana are ko kona ni karaoia n te bong aei e na karaoa te bitaki ae bubura n ririki ma ngkai ke imwiin te maiu aei. Ma uringa te mwananga ae akea tokina ae ko mena inanona. Ngke ko bwabetitoaki ao man kamatoaaki, ko anai mwaneka aika a kakawaki n te mwananga aio.
Ko kona ni buokiia naake a tia n mate ni waakirake iaon aia mwananga man karaoan bwabetito ao kamatoa ibukiia inanon te tembora. I karaoa aei n te tai ae bati ngke rorou ngkoe. I uringnga teuana te tai I bwabetitoaki ibukiia ae raka iaon 60 aomata. I a kuri n aki kona n rawea ikeu imarenan au bwabetito!
Ngkana e reke am tai n nako n te tembora, karaoia! Kabatiaa nanakom n aron ae ko konaa. Taiaoka tai baerua ni bwaai aika a kona n anaa am tai ao man uotikonako man baika a koaua ao n akea tokina. E ngae ngke ko maeka n raroanako man te tembora, kabanea nanom iai ao katauraoiko ngkai bwa ko na tau n rin n te tembora.
Katauraoiko Ngkai ibukin Am Kakabwaia man te Tembora
Teuana te moan otenanti n te tembora ae ko karekea i bon ibukim bon te entaumente. Aei ana bwaintangira te nakoanibonga are e tauraoi nakoia nikabane natin te Atua. Ti karekea te mwaaka aei man reken taian otenanti ao kawakinan berita aika tabu ake ti karaoi n te tembora ni katoa bongin maiura.
Ko kona ni katauraoiko ibukin am entaumente ao tabeua otenanti n tembora n iangoia raoi, tataro, ao n reiakina taekan te tembora. Ngkana am karo ke tibum a tia n nakon te tembora, taetae ma ngaia n maroroakina mimitongin te kakabwaia anne. Am bitiobi ma tabeman taan kairiiri a na buokiko naba. I kantaningaia naba bwa ko na kona n karekeia raraom aika a raoiroi ake a na boutokaiko. Ko na kukurei ngkana e roko te bong ibukim n rin n te tembora ao ko tauraoi ni butimwai ni kabane berita aikana tamaroa ao kakabwaia are e kan anganiko te Uea.
Kristo ngke e Reireiniia Ana Reirei,iroun Justin Kunz
E Reitinako te Mwananga
Oin bukin te maiu aei bwa ti na katauraoira ibukin are imwiina. Ana babaire Tamara are i Karawa ae moan te korakora e aki toki n te mate, ibukina bwa e aki mamate tamneim. E na nako n te aonaaba n tamnei n reitinako n reiakinaki, ni beku, ao ni kakantaninga te Mangauti. Ngkanne, a na bane bubuaniwae ni katorobubua ao a na bane naba newe n taetae n tuea bwa Iesu bon te Kristo (taraa Itaia 45:23). Ibukin ana Mwakuri ni Kamaiu ao Mangautina, a na manga ikotaki rabwatara ao tamneira, ao e na reitinako mwanangara n akea tokina. Bon te kakabwaia ae mimitong ibukira ni kabane!
Ngkana a bane n tia n taekinaki ao ni karaoaki, bwaai ni kabane ma mwiia ae akea tokina ao ae a kakawaki a na katuruaki iaon maiun ao ana mwakuri Iesu Kristo. Rabakaum ao am onimaki Irouna e na rikirake ngkai ko mwakuri n te tembora. Ko na namakina ana tangira ae akea tiana ibukim ao n namakina te kimwareirei ao te mwaaka n tamnei ni kabuta maium.