“Kamimiin Mwaakan te Kakaitau,” Ibukin Kakorakoraia Kairake, Turai. 2022.
Kamimiin Mwaakan te Kakaitau
E aki tii tamaroa te kakaitau—e kona ni bita maium.
E taku Beretitenti Russell M. Nelson: “Warekan ara kakabwaia e rangi n tamaroa riki nakon warekan ara kaangaanga. … [Te kakaitau] e katauraoi nakoira taratara aika a rianako aroia n oin raoi tibwangara ao kakukurein te maiu.”1
E bon koaua! Bwainakin te kakaitau e uoti kakabwaia aika a mwaiti. Te kakaitau e kona ni buokiko bwa ko na kukurei riki ao ni marurung riki, ni kanakoraoa aron matuum, kakorakora marurungin am iango ao rabwatam, ao ni buokiko ni karekea te kaantaninga ae tamaroa ma te nanoanga nakoia aomata. Korakoran mwaitin am kakaitau, e na kanakoraoa riki arom ni kaitarai kakaewenako inanon te maiu aei. N tokin te tai, bwainan te kakaitau e kona ni kaaniko ma te Atua, are bon te tia angaanga bwaai ni kabane aika a raraoi (taraa Iakobo 1:17).
Iroun Ester Carneiro Ponciano mai Brazil, korean rinanin bwaai ake e kakaitau iai e anganna te kukurei ao ni buokia ni karekea te korakora ao te ninikoria inanon taai ni kaangaanga.
Rinanin Anna Kakaitau Ester
1 Te Euangkerio
Kamataata n te korobanna iroun Emily Davis
Ngkai I kamatebwai booki aika tabu, tataro ni katoa bong, iriiran te tieminari, ao te nanako n taromauri, I namakina te unga n nano bwa na kataia n tamaroa riki. Te euangkerio e uota te kantaninga ae a kan roko boong aika tamaroa. E bon karekea te kukurei ae akea tokina.
2 Au Utu
Iai onoman inanon au utu, ngaia are e teimatoa n onrake ara auti! E babane ara tai n ikoikotaki n takakaro, n nakonako itinaniku, kuuka, ao ni kamatebwai Nakomai, Iriirai. Au utu bon au tabo ni katantan. I kona n ae bon tii ngai ma ngaiia. Ti aki kororaoi, ma ti bon rangi ni kukurei. I rangi ni kukurei bwa iai aomata ae I kona n onimakiniia.
3 Raoraou
Butin te aoraki aei e aki kona n urua au reitaki ni koaua ma raoraou. Ngkana ti aki kona n ikotaki iroura, ti teimatoa ni kunei kawai ni memena i bon imarenara. Ti kukurei ni ngangare ao ni uaia n anene. I tangiria n tibwauai taai ake a kukurei ma raoraou. I kakaitau ibukiia n tatabemaniia nako.
4 Mwakuri ni kamarurung
N te tai ae nako, te kamarurung bon akea ibuakon baike I kakaitau iai. I aki rang kukurei n taekan te mwakuri ni kamarurung. Imwiina I kataia ni bwabwatika ao ni kunea bwa e a reke tangirana.! Ngkana I buti n au bwatika, I namakina te kukurei. Kanga I namakinna bwa te aonaaba ae katobibiai bon te tabo ae tamaroa. E anganai au tai n iango, n tarai baika a riki, ao n namakina ana tangira Tamara are i Karawa. Ngkana I raraoma ke n nanokawaki, e buokai bwa na rau. Ngkana I toka iaon au bwatika, I kona n noora tenga tabun bukini bwaai bwa ti na kukurei ao ni kakaitau.
5 Katangitang
Te katangitang e uota te kukurei nakoiu ae moan te korakora. E na bon kaokoro au aonaba n akea te katangitang. I a kaman tatangira te anene ao te ongogongora n te katangitang ngke I rangi ni uarereke. Iai mwaakan te katangitang n eutirakeira, ao e kona naba n anganiira te rau. I tatangira te ongoongora n aia katangitang kairake man te Ekaretia.
Te Kakaitau e Uota te Kukurei ni Koaua
Ngkana I taraa maiu ma te mata ni kakaitau, I noora te Uea inanon maiu n taainako, e ngae ngkana tao iai kaangaanga. I a tia ni kunea bwa bwaai aika a bon tau a kona n uota te kukurei ae moan te korakora. Ngkana ko taratara nako ao nooria bwa tera ae rangi ni kakawaki, ko kona naba ni kunea te kimwareirei.
Tera ae Ko Kakaitau Iai?
Te bwai ae kamanga ni karaoan kanoan nako te kakaitau bwa n te tai are ko waakinna iai, e a kaangaanga ae ko na katokia. Kataia! Karekea am tai ni korea kanoan am kakaitau. Iangoi kawai ake ko kona ni kaota am kakaitau nakon Tamara are i Karawa ao aomata ibukin bwaintangira aikai. Ko na kunea bwa mwaitin baike ko korei, a na mwaiti riki bwaai aika ko kona n iangoi ni kakaitau ibukiia!