“Katauraoi ibukin teTembora i Dubai,” Ibukin Kakorakoraia Kairake, Turai 2022.
Katauraoi ibukin te Tembora i Dubai
A tibwa aia tangira ao kukureia kairake mai Dubai ao Qatar ibukin te Tembora ibukin katean teuana irarikiia.
Tamnein Saajan iroun Carla Nacario
Bon tii taeka aika a bebete, ma a bita maium ngkana e taekinaki iroun ana burabeti te Atua. N tain te maungatabu ni kabuta, a ongora ma te kariaria kaain te Ekaretia ni kabuta te aonaaba ibukin katanoata ibukin tembora aika boou. Ao ibukin Sajaan ao Gwen, n te tai are Beretitenti Russell M. Nelson e atong taeka aika, “Dubai, United Arab Emirates,” n Eberi 2020 n te maungatabu ni kabuta, a ataia kairake aika uoman aikai bwa maiuia e na aki tiku n arona.1
Kaitibo ma Saajan mai Dubai
Saajan ae tebwi ma uoua ana ririki e bon tuai man noora te tembora.
“Iai ana kouru tinau n taainako bwa e na nanako n te tembora,” e taku Saajan. “E bati ana tangira ibukin te tembora. Ngkai au kouru n te maiu aio bon kawaran te tembora.”
E bungiaki Saajan i Inria, ma ngke a raure ana karo, e mwaing ma tinana nakon te United Arab Emirates. “E rangi ni mwakuri korakora tinau. Kanga ai aron te kabanea n ninikoria nakoiu. E ngae ngkana inanon taai aika a kanganga, e aki kona n taenikai.”
Tinan Saajan ao tibuna te unaine a kaaina te Ekaretia i Inria tabeua te ririki imwaain bungiakina. A wareka ana Boki Moomon ao a ataia bwa bon kaekaan aia tataro. E ikawairake Saajan n nanako n taromauri ma tinana, ao e a tibwa bwabetitoaki imwiin tataningaan ana kariaia tamana.
Reken bwabetitoau bon teuana mai buakon taian rinerine ae tamaroa ae I a tia ni karaoia,” e taku. “Ao ngke I butimwaea ana bwaintituaraoi te Tamnei ae Raoiroi, I namakina te abuee ao te kukurei inanou.”
Ngkai e a kabuta te toa Saajan ibukin ana uoote ao e a kakatauraoia n rin n te tembora. E a reke ana beeba ni kariaia nakon te tembora, ao e ingainga nanona n taningaa te rin n te Tembora i Dubai United Arab Emirates ngkana e a tia.
“Ngke I ongo bwa a katanoata te tembora, I namakinna i bon irou bwa bon ibukiu,” e taku Saajan. Bon kaekaan ara tataro. I kubanako ibukina bwa a na kateia n te tabo are ti bon maeka iai! I kona n toka n te turein nakon te tembora ao n nanako n taainako n aron are I tangiria. I kukurei naba ibukin ana Tembora Bengaluru Inria are a na kona ni kawaria tibu.”
E kukurei Sajaan ibukiia tibuna bwa e na iai te Tembora i Bengaluru Inria ae kaan irarikiia.
E tangiria Saajan ni karaoi mwakuri n te tembora ibukiia naba ana bakatibu ake tabemwaang.
“I katauraoai bwa I aonga n tau n rin n te tembora. I kan karaoa ae I kona ni karaoia ni buokiia au bakatibu ni kabane. E a reke tibwangau ae kakukurei ni beku ibukin te Uea ni karaoi bwaai ake a kaineti ma abanuean te Atua.”
Kaitibo ma Gwen mai Qatar
Tamnein Gwen iroun Christina Smith ao mairouia ana utu
Inanon 18 te ririki ni maeuna , e a tia Gwen ni maeka n nimaua aaba aika a kakaokoro: Scotland, Angola, Engiran, Kazakhstan, ao Qatar. E a tia ana mwakuri tamana n uotiia nakon taabo ni kabuta te aonaaba, ma n ana mwakuri ae ngkai a roko n aaba ake n te Middle East.
A bane n tia ni mwaing nako tarin ao mwaanen Gwen’, ngaia are e a maeka ngkai i Qatar ma tinana ao tamana. Teuana mamaten nanona n maeuna bon te mwananga ma kairake n ana uoote nakon te tembora i Kiev Ukraine. Akea te tembora ae kaan, ngaia are Aomata Aika Itiaki n aban te Middle East a na riai kiba ni kawarii taian tembora n aaba ake tabeua.
“I rangi ni kukurei ni mwanangara, ao I uotii araia au utu, e taku. “Ni katoa bong N na bae ni kunei araia ara utu iaon au tareboon iaon kawaira nakon ao oki man te reirei. I kunei 200 taian ara. I namakina ae I a tauraoi te nako!”
Ma iai te kaangaanga ae uarereke ae e aki kona n tauraoi nako iai.
Butin te aoraki ni kabuta te aonaaba.
E tikurikaaki ana wanikiba Gwen i Ukraine ni Maati n 2020—bon te tai are a moanna n ongo riki taekan butinakon manin te aoraki ae te COVID-19. Ma te ibuobuoki mai karawa, a roko n te tembora ao ni karaoi mwakuri ni bwabetito ibukin araia utu ake e a tia ni katauraoi Gwen.
“Iai kakai teuana imwiin teuana i mwiin teuana,” e taku. “Ni butira nakon te tembora, I bon raraoma ibukin te aoraki. Ma ngke tia roko inanon te tembora I bon tii namakina te rau ao te kabebeteaki. Ao tia manga kiba n oki nako Qatar imwaain raoi kainan taian matabaiawa”
Ma tinan Gwen, are e nako ni kawara temanna mwaanen ke tarin Gwen n te United States i Amerika, e aki reke okina nako Qatar. Gwen ao tamana a kawakinaki ni mweengaia ngke e reke tamana n te aoraki ae te COVID. “N te tai ae uarereke e bon rangi n aoraki ao e aki kona ni bati ni kakamwakuri,” e taku Gwen. I rangi n namakinna te maroaa. E a bon tuai oki tinau, ao I aki ataia bwa N na kanga ni karaoa te amwarake ae mwaiti irarikin riki ae tii te kariki ae kanoaki ma te tiiti ae baniaki.”
Ma iai ana taneiai Gwen ae onoti ngkana e karaoa aia taromauri n te auti ma tamana.
Te namakin bwa aongkoa aomata ake ti uoti araia nakon te tembora a mena irarikiu ma tamau,” e taku. “I aki manga namakina riki te maroaa. Bon te taneiai ae tamaroa. Kawaran te tembora imwaain butin te aoraki bon te kakabwaia.”
Te Tembora i Dubai United Arab Emirates e katanoataaki bon te namwakaina raoi imwiin mwanangana nakon te tembora i Ukraine. E rangi ni kukurei Gwen! Ao e ataia bwa buburara nanon aei irouia aomata ake a mena n ana aono.
“I ataia bwa iai aomata n au aono ake aki kona ni kabwakai kantokaia nakon te tembora teuana i Eurobe. A tia n tataninga bwa a na kabaeaki bwa utu n aki toki. E kaotaki nakoiu bwa te ikoikotaki e a bon waaki. Ti katauraoa te kawai ibukin manga okin Kristo.”
Kakabwaia man te Tembora
Teuana te bwai ae a titebo iai Gwen ao Saajan bwa te tembora e a tia ni kakabwaiai maiuia. E taku Beretitenti Nelson, Taian tembora bon bwaai aika rangi ni kakannato ni Kaokan ana euangkerio Iesu Kristo ae bwanin. Inanon raoiroin ao ana akoi te Atua, E uoti kakabwaia man te tembora ni kaania riki nakoia natina n taabo nako.”2