“Tai Maaku, e Memena te Uea Irarikim,” Ibukin Kakorakoraia Kairake, Turai 2022.
Kabanea n Taeka
Tai Maaku—E Mena te Uea Irarikim
Te maaku e aki boou. Man taai ake rimoa, te maaku e a tia n tiana aia taratara natin te Atua. N te ka 2 n Uea, uean Aturia e kanakoia te taanga ni buaka ae korakora bwa a na taua ao n tiringa te burabeti are Eritai.
“Ao ngke e utimwaaka ana tia mwakuri [Eritai] ao noria, e mena te tanga ma aoti ma kani-ni-buaka ni katobibia. Ao e taku ana aomata [Eritai] nakoina, Akea ngai, au toka! tera arora ae ti na karaoia?” (2 Uea 6:15).
Anne te taetae ni maaku.
“Ao [Eritai] e kaeka, Tai maku: ba a maiti riki aika mena i roura nakoia ake a mena irouia.
“Ao Eritai e tataro, man taku, te Uea, I tataro nakoim, kaurei matana bwa e na kona n noraba. Ao te Uea e kaurei matan te rorobuaka: ao, e noraba, ao noria, e on te maunga arei irouia aoti ao ka-ni buaka aika kanga ai, aika a otabwaniniia Eritai.” (2 Uea 6:16–17).
E kona ke n akea ara kaa-ni-buaka n ai ni kabebetei maakura ao n tokanikai iaon te riaboro, ma e mataata te reirei. E mena te Uea irarikira, e atai arora ao e kakabwaiaira n aaro nako are bon ti ngaia ae E kona ni karaoi.
Ngkana ti rang onimakina te Uea ao Ana kawai, ngkana ti kabaeaki n Ana mwakuri, tina aki maaka te bitaki n te aonaaba ke n tabeaianga iai. E tararuaira te Uea, n tabeakiniira, ao n tei irarikira.