“O Jisu Karisito e Vakarautaka Tu Vei Keda Na iNuinui,” Me iSakisaki ni iTabagone, Sepi. 2022.
O Jisu Karisito e Vakarautaka Tu Vei Keda Na iNuiNui
Ni da qaravi ira na tani, o Jisu Karisito e solia vei keda na inuinui ni na yaco me vinaka na ituvaki ni noda bula.
Era cakacaka vata na cauravou mai Cusco, Peru me ra veiqaravi.
Na bula oqo e sinai tu ena vuqa na vei bolebole eso. O sa rairai sotava oti beka eso. E vuqa tu na vu ni lomaocaoca kei na kauwai, na rere kei na nuiqawaqawa. Ni da sotava na veika oqo, e dau yaco me da dau nanumi keda ga—me da qarauni keda ga kei na noda gagadre me ulabaleta na veika taucoko tale eso. Eda nanuma ni kevaka eda vakayagataka na noda gauna kei na igu ena noda tovolea me da “vakavinakataka” na veika eso, e rawa ni da na cakacakataka vakai keda ga na sala me da na gole tani mai kina mai na noda leqa.
Ia o Jisu Karisito e vakaraitaka vei keda e dua na sala vinaka cake. E vakavulica: “O koya yadua sa segata me maroroya na nona bula ena vakayalia; ia ko koya yadua ena vakayalia ena maroroya” (Luke 17:33). Na sala totolo duadua mo kunea kina na inuinui ena nomu vakatovolei o ya mo vakagolea na lomamu vua na iVakabula ka muria na Nona ivakaraitaki ka qaravi ira na tani.
The Healing at Bethesda [Na Veivakabulai mai Pecisaita], mai vei Gary Smith
Kemuni na taciqu kei na ganequ lomani, na nona bula na iVakabula e ivakaraitaki uasivi duadua ni loloma kei na cakavinaka vei ira na tamata. E dau guilecavi Koya vakataki koya ena vukudra na tani. Na Nona sega ni dau nanumi Koya vakataki koya ga e vakaraitaki ena Nona bula e veisiga ka sega ni yalani ki na dua ga na draki ni bula vakatabakidua.
Ni da vakila na nodra gagadre na tani me vaka a vakayacora na iVakabula, au rawa ni vakadeitaka vei iko ni da na kunea na madigi tawa vakaiyalayala me da veiqaravi lo yani ena yalo loloma vei ira era gadrevi keda.
Oqo ena vukei keda me da kila vakavinaka cake kina na iVakabula ka kunea vakataki keda na sautu e vuravura ni da vakayaco loloma cecere vei ira na tani. Ni o “vakayalia na nomu bula” ena nomu vukei ira na tani, ena muri ni ivakaraitaki ni iVakabula, ena vukei iko o Koya.
Agilosi ni Veisiga
E vakavuqa na iVakabula ena dau kauti ira mai na tani ki na noda bula me vukea na kena kau mai na sautu kei na veivakacegui eda gadreva ena gauna ni veivakatovolei. O ira na tamata vakalougatataki oqo era vaka na agilosi ka talai mai lomalagi vei keda, ni sai ira dina saraga.
Keitou sa sotava vaka vuvale na veivakacegui kei na sautu e rawa ni ra kauta mai o ira na ivavakoso agilosi ni gauna oqo. Au via raica lesu e dua na gauna vakaoqori. Ena 2003, keitou a toki mai na neitou vanua o Brazil ki Utah e Amerika.
Ena vulaibatabata o ya, keitou sotava kina e dua na ucacevata levu ka sa qai sotavi tale e Uta ni oti e vica na yabaki. Keitou a se bera ni bau raica vakadua e dua na ka vaka o ya ena neitou bula, ni keitou a susugi ena maliwa ni veivuniniu kei na baravi veinuku. Na neitou itikotiko a tiko ena dua na iwavoki ena dua na delana ka a dua tiko na kena gaunisala balavu.
Ni sa tekivu lutu mai na uca cevata, sa tekivu o na watiqu ena yaloqaqa me vakayagataka na iuvuuvu ni uca cevata me uvuci tani kina na uca cevata mai na neitou gaunisala ni motoka kei na yasa ni gaunisala. Au a sega ni rawa ni veivuke baleta ni‘u a sisi ena aisi ena vica na siga yani e liu ka‘u a voroka na noqu ilabiniika. Na vakacala-ka oqo e a tini ena dua na veisele kei na vakisitaki ni ligaqu me vica vata na vula.
Ni tekivu me uvu ucacevata ena i matai ni gauna o na watiqu, a lecava ni dodonu me dau veisautaki na vanua e qara kina na iuvuuvu ni misini, ni vakasavasavataki oti e dua na yasa ni gaunisala. Ni toso ki yasa ni gaunisala kadua na nona sasamaki e dau uvuca lesu tale mai na waicevata na misini ki na vanua sa samaki oti. E vaka tiko o ya na nona sasamaki, ka sega ni dua na ka e rawa. Sa saku ca dina!
Ena vuku ni nona tiko vakadede ena batabata, e a takava kina na daligana ruarua na mate ka yaco me didivara tu me rua na vula. Ena gauna vata oya, a mavoa tu na dakuna na luvequ tagane yabaki 16 ni a vakasisisi voli ka gadrevi vua me davo voli me bula kina. Sa mai vaka tu o ya, dua e davo voli, dua e didivara, dua e vakisi tu na ligana ka keitou tauvi liliwa kece tu.
Au kila ni sa bau dua na ka na keitou irairai ki vei ira keitou tiko veitikivi. Ena dua gona na mataka lailai-caca, batabata ena 5:00 na kaloko, au a yadra cake ki na domo ni misini ni uvu waicevata tiko e taudaku ni noqu katubaleka. Au rai yani ki tuba ka au raici Brother Blaine Williams, ka tiko ena tai kadua ni gaunisala mai vei keitou. Sa voleka ni yabaki 70, ka biuta tu yani na nona loma ni vale katakata logavinaka, ka lako lo mai me vakasavasavataka na neitou gaunisala ena nona kila ni keitou sega ni rawa ni cakava vakai-keitou.
iTaba mai na Getty Images
E dua tale na itokani, o Brother Daniel Almeida a basika mai e vale me mai kauti au ena motoka ki Salt Lake City me‘u lak‘i cakacaka, ni sega ni rawa vei au me‘u draiva ena vuku ni kisi bibi ka ologa tu na ligaqu. E rau a mai tu vakarau ena vukuqu ena veimataka, ka rau vakaraitaka na nodrau loloma ena nodrau vakayacora na veicakacaka rawarawa oqo ena yalo vinaka, me yacova ni sa vakabulai na noqu matavuvale ka keitou sa rawa ni cakava vakai keitou ga na veika oqo.
Ena vulaibatabata liliwa oya ni 2003, e rau a talai mai vei keitou na veitacini agilosi oqo. O irau na taciqu oqo e rau muria na ivakaraitaki ni iVakabula ena nodrau nanuma taumada na veika keitou gadreva mai na nodrau nanumi rau ga vakai rau.
Sa Vakarautaka na iVakabula na Sautu
Na noda qaravi ira na tani ena solia vei keda e dua na rai cecere ka savasava cake. Ni da qaravi ira na tani, o Jisu Karisito e solia vei keda na inuinui ni na yaco me vinaka na ituvaki ni noda bula.
Ni da kauwai ki na nodra gagadre na tani me vaka a vakayacora na iVakabula ena vakalougatataki keda ena madigi tawa vakaiyalayala me da veiqaravi lo yani ena yalo loloma vei ira era gadrevi keda. Ni da bulataka na bula me vakataka na iVakabula ena vukei keda me da vakatorocaketaka na noda loloma cecere va-Karisito vei ira na tani. Oqo ena vukei keda me da kunea na ivakarau cecere cake ni loloma, sautu, rarama, kei na igu e vakavoui.
Sa sureti keda tiko na iVakabula me da vakasaqarai Koya ena yaloda taucoko ka muri Koya. Oqo e solia vei keda na yalayala ni da rawa ni tiko ena Nona rarama ka yaco na Nona veidusimaki me tarova na veiuqeti ni butobuto ena noda bula. Ni ko sa “vakayalia” na nomu bula ena Vukuna, ena vukei iko o Koya mo kunei iko vakataki iko.
iTaba mai na Getty Images
Gole vei Karisito, e Veigauna
Au tauca na noqu ivakadinadina bibi ni sa tucake tale mai na mate o Jisu ka sa bula tiko o Koya. Au vakadinadinataka vei kemuni ni ena Vukuna kei na Nona Veisorovaki tawayalani, a vakarautaka kina vei keda na iVakabula na sala me da ra-wa na mate, vakayago ka vakayalo talega.
Me kenai kuri, e vakarautaka talega vei keda o Koya na veivakacegui kei na veivakadeitaki ena veigauna dredre. Au vakadeitaka vei kemuni ni kevaka eda vakararavi vei Jisu Karisito kei na Nona veisorovaki cecere, vosota ena vakabauta me yacova na ivakataotioti, eda na marautaka na veiyalayala eso nei Tamada Vakalomalagi lomani, o Koya e vakayacora na veika kecega ena Nona kaukauwa me vukei keda me da lesu ki na Nona i serau ena dua na siga.