“Dolele Yani ka Vakasaqara na Vinaka,” Me iSakisaki ni iTabagone, Sepi. 2022.
Veivuke niBula .
Dolele Yani ka Vakasaqara na Vinaka
Eda duidui taucoko, eda luve kece ni Kalou taucoko, ka sa dua na ka totoka oya!
iTaba mai na Getty Images
Raitayaloyalotaka mada na bula tiko ena dua na vuravura ka roka karakarawa vakadua tu na kena droini taucoko, na kakana taucoko e tautauvata na kedra ikanakana, kei na sere taucoko era lagalaga vata. Au sega ni kila me baleti iko, ia au nanuma ni oqori ena sega sara ga ni taleitaki!
Na duidui ni cakacakaniliga, ikanakana, kei na ivakatagi e vakavuna me taleitaki ka totoka vakaoti kina ko vuravura. Ena sala vata oqori, na tamata e duidui na nodra ituvaki ni bula, vakabauta, irairai, matanitu, ilawalawa, kei na veika era sotava ka vakavuna me totoka kina ko vuravura.
Ni‘u se gone, au a vakaitikotiko mai Arapea, e dua na tiki ni vanua levu vaka-Musolomani e vuravura, me vuqa na yabaki. Ena tiki ni gauna oya, au a curu voli i bure ena dua na koronivuli e Igiladi. Ena ituvaki ruarua oqo, e Arapea kei Igiladi, au sotavi ira kina e vuqa na vei matatamata. Ena ivakatekivu e a dredre me‘u tiko maliwai ira eso na matatamata ka duidui vakalevu mai vei au. Ia e muri, au a vulica mai na veika au a sotava ni vuqa na duidui e vinaka, ka totoka sara! Na noqu bula esa vakavutuniyautaki sara vakalevu mai na veimaliwai kei ira ka duidui na nodra itovo kei na vakabauta mai na vuqa na veiyasa i vuravura.
Oqo eso na ka au sa vulica ka rawa ni vukei iko mo rokova ka kilai ira era duidui mai vei iko.
Vakasaqara na Vinaka
Ena so na gauna ena sega beka ni kunei vakatotolo vei ira na tamata na vinaka, ia e veivakurabuitaki na sala eda na kunea kina na vinaka ni da vakasaqara ena loloma kei na yalololoma. Ni o kitaka vakakina, o na loma rawarawa mo vuli mai vei ira na tani.
E veivuke me da na nanuma ni tamata e rawa ni ra vakayacora na veika eso o na sega ni na kila vakamatata baleta ni ra a vakamavoataki. Voleka ni tamata taucoko era na vakila ni ra rawa ni vakaleqai se era veimulomulo tiko kei na dua na ka. E na rairai ni o na vakila tale tikoga vakaoqo. Ni o sa kila vakamatata oqo, ena rawarawa ni o kunea na vinaka vei ira na tani baleta ni o rawa ni kila vakavinaka cake na vuna era sa vaka tu kina o ya na tamata. O sa na qai rawa ni kunea na sala mo vukei ira ka vakalougatataki ira kina.
Vakarorogo Matua
Na salatu ki na vakarokoroko kei na veiciqomi e tekivu ni da vakarorogo—vakarorogo vakaidina—vei ira tale eso. Ni da lewe ni Lotu i Jisu Karisito ni Yalododonu Edaidai, e dau vakavuqa me totolo na noda wasea na kosipeli, ka sa dua na ka vinaka oqori! Me kena ilutua, na kosipeli i Jisu Karisito sa ikoya na isolisoli duadua ga e lagilagi ka tawamudu eda rawa ni wasea. Ia ena so na gauna eda wasea na noda vakabauta vei ira na tani ni bera ni da kila e dua na ka me baleti ira. E gadrevi me da vakarorogo matua vei ira na tani ka vuli mai vei ira. E rawa ni da vakarabailevutaka na noda kila—ka vakamareqeti—ira taucoko eda sotava.
Vakasaqara na Veika eda Vakabauta Vata
Ena dua na veisiko wale tikoga oqo ki na Matanitu vaka Arapea, au a sotava e vuqa na tamata era duidui sara mai vei au. Ia ni yaco me‘u kilai ira, au a kunea ni sega ni duidui vakalevu na uto ni veika keimami vakabauta. Au a vakauqeti mai na veika keimami tautauvata kina.
E dua na ka au raica ni keimami wasea vata sa ikoya e dua na gagadre me ra vukei o ira na isenivalu era sa biuvanua ka vakaleqai ena vuku ni veisaqasaqa. Na kunei ni vakabauta-vata vaka oqori e ka taleitaki sara. Au a rekitaka na ka oqo ka curumi au na loloma vakaitamera me baleti ira au a sotava.
Ni keimami sa mai kunea yani e dua na ka keimami vakabauta vata, sa mai rawa yani me keimami veitalanoataka na neimami duidui, ka vakakina na veika keimami vakamareqeta, ena gagadre dina me keimami vulica na veika me baleti ira keimami sa mai veikilai oqo. Na veika sotavi oqo e vakananuma vei au ni o ira na tamata vinaka ena veivanua era saga tiko me ra caka vinaka me vaka na nodra vakabauta.
Dau Vakadidike
E dua na sala cecere ni veimaliwai kei ira na tani sa ikoya me da dau vakadikeva ka kunea eso na sala me tekivu kina e dua na veitalanoa. Me ivakaraitaki, kevaka o raica ni dua e dua nona basikeli totoka, kaya, “Oilei, au taleitaka na nomu basikeli!” ka qai vakataroga me baleta na basikeli.
E dua na taro rawarawa me vaka na “Sa vakacava tiko na itosotoso ni nomu siga?” e rawa ni vukei iko mo sema kei na dua tale. O na rairai sega soti ni dei ena ivakatekivu. Ena taura e dua na gauna me vakatovotovotaki kina, ia e na lasa ena gauna o sa sotava kina eso na ka vinaka.
Rai Yani ki na Taudaku ni Kemu iTuvaki
Na iVakabula a sotavi ira e vuqa na tamata ka duidui na nodra itovo ni bula. A dodoliga tale ga yani vei ira kece era biligi tani mai vei ira na tamata. E a saga o Koya me vakayacora na ka me sotavi ira kina na tauvimate kei ira era biligi tani tu. A veitalanoa kei ira, ka vakabulai ira o Koya.
Kevaka eda dau cakava na ka me baleti ira na tani me vakataki Koya, ena vanua vinaka cake sara ko vuravura. Vukei ira na tani ena sala lelevu se lalai. Vakauta e dua na itukutuku ni yalo loloma ena tex, wasea e dua na iloloma, okata e dua ka biligi tani tu mai vei ira tale eso. Na ivalavala vaka yalo loloma oqo ena vukei iko mo sema ki vei ira era tu wavoliti iko. E ka ni veivakurabuitaki, ni vei ivalavala vakaoqo ena vakavuna me da na vinaka cake talega kina.
Kakua ni Calata
Na ikarua ni vunau levu sa ikoya mo “lomana na kai nomu me vaka ko lomani iko” (Maciu 22:39). Nanuma ni da sa luvena kece na Kalou. Na noqu rai me baleta na vuravura e sa mai rabailevu sara ka‘u mai vinaka cake kina ni‘u sotavi ira na tani—o ira na tiko tikivi au—ka ra duatani mai vei au. Kakua ni calata na veika o rawa ni vulica mai vei ira na tani.
Kevaka o dolele yani ka vulica mo lomana ka rokova na duidui ni tamata kecega era tiko wavoliti iko, o na kurabui ena sala ena rawa ni serau ka totoka kina na vuravura.