“O Jisu Karisito E Rawa Ni…,” Me iSakisaki ni iTabagone, Sepi. 2022.
Lako Mai, Mo Muri Au
Na Vosa Vakaibalebale; Na Dauvunau; Aisea
O Jisu Karisito E Rawa Ni …
Na dina e volai ena udolu na yabaki sa oti e vakavulica vei iko na veika e rawa ni vakayacora na Turaga ena vukumu ena gauna oqo.
Finisher of Faith [Dau Sauma na Vakabauta], mai vei J. Alan Barrett
E sega ni dau madra se oti na kena mana na dina mai vua na Kalou. Baleta ni oqo na kilai ni “veika sa yaco dina tiko, kei na ituvaki dina ni veika ena qai yaco mai” (Jekope 4:13).
Na vei dina era a volai ena udolu na yabaki sa oti ena Veiyalayalati Makawa era sa dina tiko ga oqo. Ka so vei ira era vukei iko mo raica na veika e rawa ni vakayacora na Turaga ena vukumu ena gauna oqo. Oqo e vica na dina vakaoqori mai na ivola ni Vosa Vakaibalebale, Dauvunau, kei na Aisea (o na vulica tiko ena vula oqo). Era vakaraitaka vei iko ni o Jisu Karisito e rawa ni …
Dusimaka na Nomu Sala
Ena so na gauna, eda dau veilecayaki, yali, se eda gadreva na veidusimaki. Kevaka o solia vua na Turaga na nomu veivakabauti taucoko, yalomalumalumu, kei na vakavinavinaka, “ena vakadodonutaka na nomu ilakolako ko Koya” (raica na Na Vosa Vakaibalebale 3:5–6).
Kevaka o muria na Nona ivakaro, ena “tuberi iko ena sala mo lakova” o Koya ka cakava “na nomu vakacegu … me vaka na uciwai” (Aisea 48:17–18).
Sotava na iVakabula, mai vei Jen Tolman
Solia Vei Iko na Rai
Na vakarau ni rai kei na itovo ni bula e vuravura ena rairai taleitaki se marautaki. Ia na ivakavuvuli i Jisu Karisito e rawa ni vukei iko mo raica na kena ka wale ka sega ni dei na sala vaka vuravura.
Na veika kece “sa caka ena ruku ni matanisiga … sa ka wale kecega kei na ka ni ocaoca wale” (Na Dauvunau 1:14). Eda rawa ni kaya, ni sala vaka vuravura e kauta mai na lomaocaoca. E vaka na vakacemuri ni cagi ka tovolei me toboki. Na marau ena yaco mai ni da rerevaka ka vakarokorokotaka na Kalou ka muria na Nona ivunau (raica na Na Dauvunau 12:13).
E vuqa na tamata ena vuravura “era vakatoka na ca me vinaka, kei na vinaka me ca; … era kaya ni sa rarama na butobuto, ka butobuto na rarama; … era kaya sa kamikamica na ka gaga, ka gaga na ka kamikamica” (Aisea 5:20). Ia na Turaga e vakaraitaka vei keda na dina. Ni da muria na Nona sala kei na Nona vosa, sa rawa “ni dou na marau, ni dou sa lako yani; ka vakacegu, ni dou sa tuberi yani” (raica na Aisea 55:8–12).
(Raica talega na Aisea 40:6–8; 51:7–8.)
Vosota na Nomu iValavala Ca
Eda caka cala taucoko. Eda sa i vakayaco ivalavala ca taucoko. Ia kevaka eda veivutuni ka saga tiko ga me da muria na ivakaro ni Kalou, sa rawa ni vakasavasavataki keda o Jisu Karisito ka vakataucokotaki keda tale. “Ena yalololoma vei [keda] ko Koya; … ni na gugumatua ni lomana” (Aisea 55:7). Sa tukuna oti o Koya:
“Ke sa vaka na ka kulakula na nomudou ivalavala ca, sa na vulavula me vaka na uca-vulavula; ke sa damuvakula sa na vaka na vutika ni sipi.” (Aisea 1:18).
“Koi au, io koi au ga kau sa bokoca na nomu talaidredre … kau na sega ni nanuma tiko na nomu ivalavala ca” (Aisea 43:25).
iTaba mai vei Mark Mabry
Vakaqaqacotaki Iko
Eda dau malumalumu taucoko se oca ena so na gauna. O Jisu Karisito e rawa ni solia vei iko na kaukauwa. “Ni sa uluvatu e sega ni oti rawa na Turaga ko Jiova” (Aisea 26:4). Kevaka o yalomalumalumu ka vakararavi Vua, ena rawa ni vukei iko o Koya mo vorata na veitemaki, vakatulewa vinaka, se mo tomani tikoga na nomu toso ki liu dina ga ni sotavi tiko na dredre. Sa tukuna oti o Koya:
“Kakua ni ko rere niu sa tiko vata kei iko: kakua ni ko taqaya niu sa nomu Kalou: kau na vakaukauwataki iko; io kau na vukei iko” (Aisea 41:10).
Sega ni Guilecavi Iko Rawa
Na iVakabula o Jisu Karisito a solibula ena vukumu baleta ni lomana na Tamada Vakalomalagi—ka baleta ni lomani ikovakakina o Koya. Na Nona solibula e rawa kina vei iko mo tucaketale ka yaco mo na rawa ni vakataka na Tamada Vakalomalagi. Ena sega vakadua ni biuti iko se guilecavi iko. Sa tukuna oti o Koya:
“E dua li na yalewa me na guilecava na luvena sa sucu … ? io, era na guilecava beka, ia koi Au kau na sega ni guilecavi iko.
“Raica, kau sa ceuti iko ena qeteqete ni ligaqu” (Aisea 49:15–16).
Me vaka ni sa vakayacora o Koya e vuqa sara na ka ena vukuda ka na sega vakadua ni guilecavi keda, o keda talega, e dodonu me da saga me da “dau nanumi Koya tikoga” (Vunau kei na Veiyalayalati 20:77, 79).