“Na Vakatovolei ni iTovo ni Bula,” Me iSakisaki ni iTabagone, Sepi. 2022.
Yavu Tudei Eso
iTabagone Yalododonu Edaidai, era tara cake na nodra bula ena Uluvatu nei Jisu Karisito (raica na Ilamani 5:12).
Na Vakatovolei ni iTovo ni Bula
Droini mai vei Katie Payne
Oqo e sega ni ka au a namaka mai. Au a yalo rawarawa me‘u veivuke ena kena boroi na bai nei buqu vakarua ena waiwai ni linseed me vukea na kena taqomaki. Ia ni toso tiko na siga, sa tiri sobu na buno e mataqu ka vuki na noqu yalo rawarawa me wawale ena vuku ni katakata.
A vakatura o tinaqu me‘u cegu ka gunu wai ni bera ni‘u lesu tale ki cakacaka, ia au a mataruburubu kau nakita me‘u yalo rarawa.
“Dallin, e sega ni dua na isau dina ni ivakarau ni vakasama vinaka ke toso vinaka tiko na veika kece ni bula,” e kaya o koya. “Na vakatovolei dina ni itovo ni bula kei na kena isau dina e yaco ena gauna e rawa ni tiko kina vei iko e dua na ivakarau ni vakasama vinaka, dina ga ni rarawataki tu na veika kecega.”
Ena dua na macawa ki muri, a kerea o tukaqu se rawa ni‘u boroya na nona bai ena waiwai ni linseed. E balavu cake na nona bai, ka keirau na boroya na yasana ruarua.
Ena gauna oqo, au sa vakadeitaka me‘u vakavinakataka nai vakarau ni noqu vakasama kevaka sara madaga e mani dredre vakacava na cakacaka. Keirau tekivu vakamataka, ia e dina sara, oti keirau sa tekivu me keirau vakila na katakata ni matanisiga. E vaka me sega ni oti rawa na cakacaka ni keirau tubera voli na vokete waiwai bibi, ka boilevu o ya. Na veikau vakavotona e yasa ni bai e a coka na yavai keirau. Ni‘u nanuma lesu na ka a kaya o tinaqu, au a sega ni vosakudrukudru. Au a sega ni soro. Au cakacaka vakamalua ka tovolea me‘u vakayacora tikoga na ivakarau ni vakasama vinaka.
Ni keirau sa vakaotia, a yacovi au na yalo marau ni‘u raica na bai vou keirau sa boroya vinaka tu. Au a oca ka kakabi na yagoqu, ia au kila ni‘u sa pasitaka talega e dua na vakatovolei bibi ni itovo ni bula. Au vulica ni rawa ni tiko vei au e dua na ivakarau ni vakasama vinaka kevaka sara mada ga e vaka me sega ni taleitaki tu na veika kecega.
Dallin H., Oklahoma, Amerika