“Na Va na iDola i Nifai me Kilai Vakamatata Kina na Aisea,” Me iSakisaki ni iTabagone, Sepi. 2022.
Lako Mai, Mo Muri Au
Aisea
Na Va na iDola i Nifai me Kilai Vakamatata Kina na Aisea
O sotava tiko na dredre ni o wilika tiko na Aisea? Sa tiko oqo o Nifai me veivuke!
iTaba mai vei Kevin Keele
E matata ni nona volavola na parofita o Aisea ena Veiyalayalati Makawa e bibi baleta ni ra dau cavuti vakawasoma ena Veiyalayalati Vou kei na iVola i Momani. Na iVakabula vakataki Koya e kaya, “Sa ka bibi vakaidina na vosa i Aisea” (3 Nifai 23:1).
Ia, na cava na vuna e rui dredre kina me ra kilai vakamatata?
Kakua ni yalolailai! A kila tu mai o Nifai na noda sasaga. A duavata kina o koya ni “sa vosataka ko Aisea e vuqa na ka dredre … me ra kilai” (2 Nifai 25:1). Eda vakavinavinaka, ni sa solia vei keda o Nifai e va na idola ena rawa ni vukei keda me da kila na ibalebale ni vosa nei Aisea.
iMatai ni iDola: Bula ena iOtioti ni Gauna
E vola o Nifai ni o ira era bula tiko ena “veisiga mai muri” era na rawa ni “kila” na vosa i Aisea (2 Nifai 25:8). E rairai beka e baleta ni o ira na tamata ena iotioti ni gauna ena tiko vei ira e dua na rai ka sega ni tiko vei ira na tamata ena gauna nei Aisea. Ena gauna makawa, era a sega beka ni kila na tamata na nodra rawa ni “vakatoka na ca me vinaka, kei na vinaka me ca” na tamata (Aisea 5:20) ia eda raica ni yaco wavoliti keda tu na veika oqo.
Vakakina, o ira na tamata ena gauna makawa era na sega beka ni kila na ibalebale ni nona kaya na Turaga, “Au na vakayacora mada e dua na cakacaka vakurabui vei ira na tamata oqo, io e dua na cakacaka vakurabui vakaidina sara” (Aisea 29:14).
Era sa tukuna vei keda na parofita ni gauna oqo ni “cakacaka vakurabui ka vakurabui vakaidina sara” e tukuna tiko na yaco mai ni iVola i Momani kei na Vakalesui mai ni kosipeli i Jisu Karisito ka sa tomani tiko. O ni sa kalougata ni o ni bula ena dua na gauna e rawa mo ni vakadinadinataka kina na kena vakavotukanataki e vuqa na parofisai nei Aisea.
iKarua ni iDola: Me Tiko vei iKo na Yalo ni Parofisai
E vakatavulica o Nifai ni vosa nei Aisea sa “macala vinaka ki vei ira kece era sa vakasinaiti tu ena yalo ni parofisai” (2 Nifai 25:4). Oqori ena rawa ni veivakayalolailaitaki taumada, ia oqo e sega ni kena ibalebale ni o ira ga na parofita e rawa ni ra kila vakamatata na Aisea. E vakavulica na ivolanikalou ni “nai tukutuku kei Jisu na yalo ni parofisai” (Ai Vakatakila 19:10). Ena dua tale na kena itukutukuni, kevaka o vakabauti Jisu Karisito, sa tiko rawa vei iko na itekivu ni veika me na kilai kina o Aisea!
Na volavola nei Aisea e vakadinadinataki Jisu Karisito kei na Nona Veisorovaki. Na yacana mada ga e vakadinadinataka na iVakabula! Na yaca i Aisea e kena ibalebale “na Turaga e dau Veivakabulai,” se “o Jisu e veivakabulai.”
iKatolu ni iDola: Kila vinaka na Serekali kei na iVakatakarakara
E vakamacalataka o Nifai ni vosa nei Aisea e dredre vei ira era sega ni kila “na ivakarau ni parofisai vei ira na Jiu” (2 Nifai 25:1). Na vosa nei Aisea e rawarawa cake na kena kilai ni da vulica vakalevu cake na nodra ivakarau ni volavola ena Tokalau ni vuravura ena gauna nei Aisea, me vakataka na serekali kei na ivakatakarakara. E dau vakayagataka vakalevu o Aisea na ivakatakarakara dredre ena nona volavola.
Me kena ivakaraitaki, a vola o Aisea me baleti ira era sa “cecere ka laveti cake” me vaka na “sitari ni Lepanoni” kei na “oki kecega ni Pasani [Siria]” (2 Nifai 12:13). Na sitari kei na oki era vunikau kaukauwa. A vakayagataka o Aisea e dua na sala vakaserekali me tukuna kina ni o ira na tamata viavialevu ka lavelaveti ira cake era sa vaka na vunikau balabalavu baleta ni ra vakaukauwataka na lomadra ka nanuma ni ra vinaka cake mai vei ira tale eso. Na wiliki ni Aisea me vaka na serekali e rawa ni vukei keda me da kila vakavinaka cake kina na veika e vakatavulica.
iKa Va ni iDola: Kila na iTuvaki ni Vanua
O Aisea e cavuta e 108 na veivanua duidui ena nona volavola. Oqo e rawa ni dredre me vakamuri tiko, vakabibi ke o sa bera vakadua ni bula e na veivanua o ya! Na ikava ni idola i Nifai sa ikoya me kilai na “veiyasana vakavolivoliti” Jerusalemi (2 Nifai 25:6).
O Jerusalemi e tiko ena vanua vata ga a dau tu kina, ia ena gauna e liu a tu ena lomadonu ni tolu na matanitu kaukauwa e vuravura ka ratou veiqati tiko. Ki na tokalau o Papiloni, na itikotiko liu ni cakacaka ni liga kei na isulusulu. Ki na vualiku o Asiria, na kaukauwa vakaivalu ena gauna nei Aisea. Ki na ceva i ra o Ijipita, na itikotiko liu ni veivoli. Na kilai ni veika oqo e rawa ni vukei keda me da vakamuria se o cei a veivakarerei tiko me kabai Isireli ka kauti ira vakavesu eso. Ena ivakatakarakara, o Papiloni e matataka na veika vakavuravura, o Asiria na viavialevu, kei Ijipita na iyau.
Sa Baleti Iko na Vosa i Aisea
E vakavuvulitaka o Aisea e vuqa tale na ka e bibi me da kila. A vakadinadinataka na veiseyaki kei na vakasoqoni vata nei Isireli, ka a kaya kina o Peresitedi Russell M. Nelson ni “sa ka bibi duadua e yaco tiko e vuravura ni kua. … Ke o digitaka, kevaka o vinakata, sa rawa mo dua na tiki levu ni cakacaka oqo” (“Hope of Israel” [lotu ni itabagone e vuravura raraba, 3 ni June, 2018], 8, HopeofIsrael.ChurchofJesusChrist.org; raica na Aisea 49:13–23).
A vakadinadinataka talega o Aisea na tarai cake kei Saioni ena vakavakarau ki na iKarua ni Lako Mai ni iVakabula kei na dua na udolu na yabaki ni veiliutaki (raica, me ivakaraitaki na, Aisea 51–52). Ni tiko e dua na ivakadinadina kei Jisu Karisito, na Yalo e rawa ni vakadinadinataka vei iko na bibi ni vosa nei Aisea kei na sala e rawa ni ra veivuke ka vakalougatataka kina na nomu bula ni kua.