“Vulici Jisu Karisito ka Rawata na Nona Kaukauwa,” Me iSakisaki ni iTabagone, Sepi. 2022.
iOtioti ni Vosa
Vulici Jisu Karisito ka Rawata na Nona Kaukauwa
Mai na dua na vosa ena koniferedi raraba ni Epereli 2017.
Au vinakata me‘u wasea na ivakarau eda rawa ni kauta mai kina ki na noda bula na kaukauwa ni noda Turaga ka iVakavuvuli, o Jisu Karisito.
Eda na tekivu ena noda vulica na veika e baleti Koya.1 “E sega ni rawa vei [keda] me da vakabulai ena lecaika” (Vunau kei na Veiyalayalati 131:6). Na levu ni noda kila vakamatata na ivunau ni iVakabula kei na veika a vakayacora o Koya ena vukuda, na levu ni noda na kila ni rawa vei Koya me vakarautaka na kaukauwa eda gadreva me baleta na noda bula.
Ni da Yalododonu Edaidai, eda vakaibalebaletaka na Nona ilesilesi me Veisorovaki i Jisu Karisito, ka yaco kina na tucaketale me ka dina vei keda kece ka vakarautaka na bula tawamudu me rawa vei ira era veivutunitaka na nodra ivalavala ca ka ciqoma ka maroroya na cakacaka vakalotu kei na kena veiyalayalati e veiganiti.
Ena ruku ni nona ituvatuva tawamudu na Tamada, na iVakabula e a vakararawataki kina. Na iVakabula sa ikoya ka a sereka na ivau ni mate. Na iVakabula a sauma na isau ni noda ivalavala ca kei na talaidredre ka bokoca laivi ka vakatau ena noda veivutuni. Na iVakabula sa ikoya ka a sereki keda mai na mate vakayago kei na mate vakayalo.
Na veivosa tabu me vaka na Veisorovaki kei na Tucaketale e vakamacalataka na ka a vakayacora na iVakabula, me vaka na ituvatuva nei Tamada, me rawa ni da bula ena inuinui ena bula oqo ka rawata na bula tawamudu ena vuravura sa bera mai.