Taro kei na Kena iSau

“Na vakayagataki ni sakaramede e vale e a uasivi sara. Na cava na vuna e vinakata kina vei keda na Turaga me da lesu tale kina ki lotu e valenilotu?”

“Na lako i Lotu e vakaqaqacotaki keda ka vakavinakataka na vakabauta ka yaco ena noda veimaliwai kei ira na tamata vakabauta tale eso kei na sokalou vata kei ira era saga tale tikoga me ra tudei ena salatu ni veiyalayalati ka me ra tisaipeli vinaka cake i Karisito.”

Peresitedi Dallin H. Oaks, iMatai ni Daunivakasala ena Mataveiliutaki Taumada, koniferedi raraba ni Oko. 2021 (Liaona, Nove. 2021, 26).

Raica na Vunau kei na Veiyalayalati 59:9–10.

Me Da Duavata

“E vinakata na Turaga me da lesu tale ki lotu baleta ni vinakata o Koya me da toro voleka yani Vua. E vinakata talega me da duavata vakaveitacini kei na veiganeni. Ena noda lako ki lotu, eda yaco me da duavata, veivukei vakaikeda, ka vakaraitaka Vua na noda vakavinavinaka ena veika taucoko sa Vakayacora ena vukuda o Koya. Eda vakatitobutaka talega na noda vakabauta ka vulica na ivakavuvuli vou.”

Melanie M., 13, Mexico

Kaukauwa ena iWiliwili

cauravou

“Sa cecere sara na sakaramede mai vale baleta ni a kauta mai na Yalo ki na neitou itikotiko ka vukei keitou me keitou kila ni sa dodonu me keitou kauta mai na lotu ki na neitou itikotiko ka sega ni vakanamata kina vakadua ga ena dua na macawa. Ia, ena so na gauna e rawa ni vakavuna e vale na yalo ni galili. Na tiko ena lotu e bibi baleta ni dau vakavure kaukauwa na iwiliwili.”

Nathan G., 15, Arizona, Amerika

Taracake na Veimaliwai

goneyalewa

“E tiko ena lotu e dua na draki ni veilomani. E kea, e rawa ni o tara cake kina na veimaliwai ka vakalougatataka na nodra bula na tani ena gauna vata ga o vakalougatataki kina. Sa ka bibi talega na Lotu ena kena tarai cake na nomu kila na kosipeli. E vinakata na Turaga me da vunautaka na kosipeli vei ira era tu wavoliti keda ka me tarai cake o Saioni.”

Amelia W., 16, Utah, Amerika

Me Da Tiko Kina me Baleti Ira na Tani

goneyalewa

“Ni sa tekivu na matedewa, au lomaleqataka ni keitou na sega ni rawa ni vakayagataka na sakaramede, ia a qai vakatara na bisopi me keitou vakayagataka e vale! Eso na tamata era vakataroga na vuna me da lako tale kina i lotu e valenilotu, ia au nanuma ni dodonu me da lesu tale me da vakararamataki ira e so tale—me da vosa se me da vukea e dua. E dodonu me da gole ki lotu ka me da solia na noda loloma ka wasea na veika eda sotava.”

Tamara M., 17, Mexico

Vakavouya na Veiyalayalati

cauravou

“E vinakata na Kalou me da lesu tale ki lotu e valenilotu baleta ni sega ni rawa vei keda taucoko me da vakayagataka na sakaramede ena noda veivale. A kaya vei au o tukaqu, me vaka ni‘u lewe ni matabete, e dodonu me‘u vakadeitaka me tu vei keda kece na madigi oqo. Sa ka bibi vei keda me da lako ki lotu me rawa vei keda taucoko me da vakavouya na noda veiyalayalati.”

Esteban M., 16, Argentina

Na vei isau ni taro sa kena inaki me veivukei ka veivakararamataki, ka sega ni ivakaro raraba ni vunau ni Lotu.

Na Cava na Nomu Nanuma?

“Au rogoca na nodra vakaraitaka eso tale na veika era sotava vakayalo. Na cava au rawa ni cakava kevaka au sega ni vakila ni tiko vei au?”

Vakauta mai na nomu isaunitaro kei na itaba ni bera nai ka 15 ni Okotova, 2022.

Imeli mai ena [e-mail]. Se gole ki na ftsoy.ChurchofJesusChrist.org ka kilikitaka na “Submit Your Work.” Curu ena nomu Akaude ni Lotu ka digitaka na “For the Strength of the Youth” ena ruku ni “Choose Magazine.” Kiliki ena “Add File” mo digitaka na nomu faile kei na itaba, ka qai kilikitaka na “Submit” mo vakavodoka ka vakauta mai na nomu faile.

Ena rawa ni moici na nomuni itukutuku me baleta na kena balavu se kena matata.