Na Veika e Taleitaka o Ark me Vulica

Mai vei David Dickson

Mekasini ni Lotu

Matanitu vou, itovo vakavanua vovou, itokani vou … sega na leqa!

cauravou

iTaba mai vei Clayton Chan

E dau taleitaka o Ark na kakana vakaisaluwakitaki. Oqo e dua na ka vou vua. E na Yatu Filipaini, na vanua a tubu cake kina, e a sega ni dau gaga sara vakalevu na kakana.

Ia a qai taura o tamana e dua na cakacaka mai Malesia.

Ena gauna oya, a sotavi ira na itokani e valenilotu o Ark ka ra lako mai na veituvaki kece ni bula, oka kina e vica mai Idia.

“Era kania na kakana gaga sara!” E kaya o Ark C., yabaki 14, baleti ira na nona itokani vou. “Na kakana oqo e gaga vakalevu cake sara mai na kena au dau kania mai vale.”

Na ka ga e lasa, qo—a sega ni kila o Ark na ka a calata voli. Ia oqo e sa dau taleitaka me vakadikeva na veimataqali kakana mai na veiyasa i vuravura.

E dina sara ni oqori e sega walega ni sala era sa veisautaka kina na bula nei Ark o ira nona itokani ena Lotu me vinaka cake. “Au a marautaka na toki ki Malesia, ia au a rarawa talega ena gauna vata oqori. Era a vou kece na itokani, ka sa ka dredre na vosa vei ira na itokani vou. ”

Ia o ira na itabagone ena nona tabana vou era a vukei koya me vakayacora na veisau oya. Me ikuri ni kena yaga, sa kila tu oqo okoya e levu cake sara na ka me baleta na vei yasana duidui eso. “Au sa vulica na duidui ni itovo vakavanua,” e kaya o koya. “E duidui na kakana, ka vakakina na isulusulu. E duiroka na nodra isulu, ka talei na sala era cakava kina!”

era kana tiko na cauravou

Ia, e dua na ilawalawa itokani, ka dau tosoi koya tikoga vakalevu cake mai vei ira kece sara na nona ilawalawa tale eso ena gauna ni toki kei na gauna e oti kina na toki: sa ikoya na nona matavuvale.

Qito kei ira na iTokani

E dau taleitaka o Ark na vakayagataki gauna kei na nona matavuvale, vakauasivi ni ratou veimau. Na Uno e nona qito taleitaki duadua. Na vuna? “Au dau qaqa tu ga,” a kaya ena dredre.

E dau taleitaka talega na qito Monopoly kei rau na nona itubutubu kei tacina gone, o Leaf. (E sa sega soti sara ni matua o ganena gone me rawa ni veitomani mai.) E levu na ka e yaco tiko ena qito, e sega wale ga, ni viritaki daisi kei na vakayagataki ilavo lasulasu. “E rau vakavulica vei au na noqu itubutubu ena qito eso na iwalewale ni bisinisi kei na ivakavuvuli ni ilavo. Sa dua dina na ivakasala yaga ki na veigauna sa tu mai liu. ”

O tamana e dua na dauvola parokaramu ni komipiuta, ka dau cicivaka tu vakaikoya o tinana na nona bisinisi mai na Yatu Filipaini. Sa tu vei rau e levu na kila me rau vakadewataka sobu mai. E itavi nei Ark, me maqusa ni vulica na veika taucoko mai vei rau. E tiko na nona ituvatuva levu me baleta na nona cakacaka.

matavuvale

Na nona lesoni taleitaki ni vuli sa ikoya na veika vakatekinolaji kei na idinia. E vinakata o Ark me yaco me dua na kenadau ni veika vakatekinolaji. Ni tiko e cake na ivakatagedegede ni nona lalawa, sa dau taura na veimadigi kece sara me vulica kina e dua na ka vou.

Na vuli mai vei rau na nona itubutubu, e a sega dina ni ivurevure ni vuli e dau taleitaka o Ark. Me vaka na nona dau taleitaka na kakana gaga, na kunei ni ivurevure yaga oqo a qai yaco mai vakamalua ki na nona bula.

Mai na Vakaunona ki na Gonevuli

“Au dau vakaunoqu e liu,” e vakadinadinataka o Ark. “Au a sega dina ni dau kauwaitaka na vuli mai vei rau na noqu itubutubu.”

E dau tovolea me cakava ga vakataki koya na ka se vuli ga mai vei ira na nona itokani kei ira na qasenivuli. A qai wilika o koya e dua na ka ena iVola i Momani ka vakavuna e dua na veisau levu ena nona raica na veika eso.

Ena Alama wase e 36 kei na 37, e solia kina o Alama na ivakasala vei luvena o Ilamani. E vakavulica o Alama vei Ilamani na veika kece, mai na italanoa vakasakiti ni saumaki nei Alama (ka okati kina e tolu na siga ni sega ni vakilai yalona tu ni oti na nona tukuna vua e dua na agilosi ni sega ni cakava tiko na digidigi vinaka duadua ni bula [raica na Alama 36:6–10]) ki na vakarerevaki ni veisoqosoqo vuni.

E loma ni veika kece oqo, a raica kina e dua na tikina bibi sara o Ark: “Isa, mo nanuma, na luvequ, ka vulica na yalomatua ni ko sa cauravou tiko; io mo vulica ni ko sa cauravou tiko mo muria na ivakaro ni Kalou” (Alama 37:35).

A vakavuna me veisautaka na itovo ni vakasama nei Ark na veivosa oqori. “E rawa talega ni rau vakavulica vei au na noqu itubutubu na yalomatua,” e kaya o koya. Ena gauna vata oya a kidava o koya ni tu ga e matana e dua na ivurevure levu ni itukutuku. “Ia oqo au sa kauwaitaka vakalevu na nodrau yalomatua. E rau lomani au ka rau rawa ni vukei au me‘u vakavakarau ki na noqu veisiga ni mataka.”

E rau lomani au ka rawa ni vukei au me‘u vakavakarau ki na noqu veisiga ni mataka.

Kei na nodrau vuku e uasivi cake mai na ivakasala vakabisinisi ka dau wasei ena gauna ni qito ena papa.

Na Yalomatua nei Na kei Ta

E dua na lesoni yaga sara e rau sa vakavulica vei Ark na nona itubutubu o ya me kakua ni vakatara na veivakauqeti ca e wavoliti koya tu me vakatarabetaki koya. “Ena noqu koronivuli, e vuqa na gone era vinakata me‘u tovolea na kofi, ti, tavako, kei na so tale.”

Oqo e dua na iulutaga ni veitalanoa e veigauna e vale. “E sa levu sara na veitalanoa kei rau na noqu itubutubu me baleta na ka oqo. E rau dau tokaruataka vakalevu na nodrau vosa,” a veiwalitaka.

Ia, na veika taucoko e tokaruataki e sa yaga sara. Ena veigauna kece e kerei kina me cakava e dua na ka me saqata na nona vakabauta, sa dau vakaukauwataki o Ark mai na veika rau sa vakavulica vua na nona itubutubu.

E dua tale na lesoni e vakasamataka vakabibi sa ikoya na isulusulu. Sega, a sega ni dau gadreva o Ark na ivakasala ni isulusulu mai vei rau na nona itubutubu me rawa ni veimaliwai vinaka cake kina e koronivuli. E dina sara, ni a vinaka sara o koya ena tabana oya. “Au dau vakaisulu ena isulu me salavata kei na gauna,” a kaya o Ark. “Au a saga tiko me‘u dreta na nodra rai na goneyalewa.”

E rau a vukei koya na nona itubutubu me raica, ni tiko talega eso na revurevu sega ni nakiti ena vakaisulu vaka o ya. “Na isulu eda daramaka e rawa ni vakayarayarataka na nodra nanuma eso me baleti iko,” e vakamacalataka o Ark. Ni vakadikeva vakavoleka, a kila o Ark ni sega ni taleitaka eso na sala era dau vakasamataki koya kina na tamata ni vakaisulu me vaka a dau cakava e liu.

Ia oqo sa digitaka o koya na isulu e tudei cake, rakorako—se, me vaka e dau vakatokai ira o koya, me isulu—“sega ni manata”. E taleitaka na kena irairai vou ka vakila ni vinaka cake vakayalo baleta na nona isulusulu. (Ia, Ark, o ira na vuku era toso tiko vata kei na gauna! Sega ni rawa ni cakitaki o ya.)

Vuli ena Bula Taucoko

E taleitaka o Ark na vanua e vakaitikotiko kina, e lomana na nona matavuvale, ka taleitaka na vuli mai vei rau nona itubutubu.

E taleitaka talega na vulica na kosipeli.

wilivola tiko na cauravou

“Au vakabauta ni bula tiko o Jisu Karisito,” e kaya o Ark. “Au vakabauta ni noda parofita bula o Peresitedi Russell M. Nelson, ka a vakalesuya mai vei Josefa Simici, o Jisu Karisito na Nona Lotu. Au vakabauta ni kosipeli e rawa ni vukei keda ena noda bula kei na veivakataotaki se veivakatovolei cava ga eda sotava.”

Se mani vaka cava na veika talei ena vulica o Ark mai muri, sa vulica rawa o koya eso e bibi sara vakalevu. Na ka oqo e voleka sara ki na ulu ni lisi o ya: na vakayagataki ni gauna vata kei na matavuvale e vakuria e vuqa na isaluwaki ki na bula!