« ’A toro i te rima ’e ’a ’imi i te maita’i », Nō te Pūai o te Feiā ’Āpī, Tetepa 2022.
Tauturu i te orara’a
’A toro i te rima ’e ’a ’imi i te maita’i
E mea ta’a ’ē tātou pā’āto’a, e mau tamari’i pā’āto’a tātou nā te Atua, ’e e mea fa’ahiahia mau !
Hōho’a nā Getty Images
’A feruri na, te orara’a i roto i te hō’ē ao i reira te mau hōho’a pēni ato’a ’ua fa’a’ūhia i te ’ū ninamu, e hō’ē ā monamona tō te mau mā’a ato’a ’e e hō’ē ā nota tō te hīmene tāta’itahi. ’Aita vau i ’ite nō ’outou, tē mana’o nei rā vau ē, e mea haumani roa te reira !
E fa’ariro te ta’a-’ē-ra’a o te mau anoihi, te monamona ’e te pehe i te ao nei hau roa atu i te ’ana’anatae ’e te nehenehe. Mai te reira ato’a, te mau ta’ata nō te tahi atu fenua, te mau ti’aturira’a, te mau hi’ora’a ta’ata, te mau ti’ara’a huira’atira, te mau aura’a, ’e te mau ’itera’a rau, ’o tē fa’ariro nei i te ao ’ei mea fa’ahiahia.
Mai tō’u ’āpīra’a ’ua ora na vau i Arabia, hō’ē tuha’a rahi o te ao nei e Mahometa, e rave rahi matahiti. I roto i hō’ē tuha’a o te reira tau, ’ua haere au i te ha’api’ira’a i Peretāne, mea fa’aea roa i roto. I roto i teie nā e piti fa’anahora’a, Arabia ’e Peretāne, ’ua fārerei atu vau e rave rahi ta’ata ta’a ’ē. I te ha’amatara’a, e mea fifi roa ’ia fa’aea i rotopū i teie mau huru ta’ata, e mea ta’a ’ē roa iā’u. I te pae hope’a rā, ’ua ha’api’i mai au nā roto i te tupura’a ’ohipa ē, e mea maita’i te rahira’a o te mau ta’a-’ē-ra’a, ’e e mea fa’ahiahia roa ! ’Ua ha’afaufa’ahia tō’u orara’a i ni’a a’e i te mau fāito ato’a, ma te ’ohipara’a ’e te mau ta’ata nō te mau ta’ere ta’a ’ē ’e te mau ti’aturira’a ta’a ’ē, nō te mau fenua e rave rahi o te ao nei.
Teie te tahi mau ’ohipa ’o tā’u i ’apo mai ’o tē nehenehe e tauturu ia ’outou, ’ia fa’atura ’e ’ia māramarama i te mau ta’ata ta’a ’ē ia ’outou.
’Imi i te maita’i
I te tahi taime, e’ita paha te maita’i o te ta’ata e ’ite-’oi’oi-hia, e mea māere rā ’ia ’itehia ia tātou te maita’i ’ia ’imi ana’e tātou i te reira ma te here ’e te aroha. ’A nā reira ai ’outou, e matara tō ’outou ’ā’au nō te ’apo mai nā roto mai ia vetahi ’ē.
E mea maita’i ’ia ha’amana’o ē, e riro te mau ta’ata i te rave mai te au i te mau rāve’a ’aita ’outou e māramarama nei, nō te mea ’ua ’ino’ino rātou nō tera ’e tera ’ohipa. Fātata te mau ta’ata ato’a e mana’o pāruru ’ore tō rātou ’aore rā tē tāfifi nei i te hō’ē ’ohipa. Penei a’e tē fāri’i ato’a nei ’outou i te reira. ’Ia māramarama ana’e ’outou i te reira, e mea ’ōhie roa a’e ’ia ’ite mai i te maita’i i roto ia vetahi ’ē, nō te mea e māramarama maita’i a’e ’outou nō te aha te mau ta’ata i riro ai mai te reira te huru. I muri iho, e ’ite mai ’outou te mau rāve’a nō te tauturu ’e nō te ha’amaita’i ia rātou.
Fa’aro’o maita’i
E ha’amata te ’ē’a nō te fa’atura ’e te hāro’aro’ara’a ’ia fa’aro’o ana’e tātou—’ia fa’aro’o mau—ia vetahi ’ē. ’Ei mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, pinepine tātou i te ’oi’oi i te fa’a’ite atu i te ’evanelia, ’e e ’ohipa maita’i roa ! Inaha ho’i, te ’evanelia a Iesu Mesia ’o te hōro’a hanahana roa a’e ’e te mure ’ore a’e tā tātou e nehenehe e fa’a’ite atu. I te tahi rā taime, tē fa’a’ite nei tātou i tō tātou mau ti’aturira’a ia vetahi ’ē, hou ’a hāro’aro’a ai i te tahi mea nō ni’a ia rātou. E ti’a ia tātou ’ia fa’aro’o maita’i ia vetahi ’ē ’e ’ia ha’api’i mai nā roto mai ia rātou. E nehenehe tā tātou e fa’arahi atu ā i tō tātou hāro’aro’ara’a—’e tō tātou fa’ahiahiara’a nō—te mau ta’ata ato’a tā tātou e fārerei atu.
Mā’imi i te vāhi tū’atira’a
I roto i te hō’ē tere fārereira’a ’aita i maoro a’enei i te tuha’a fenua nō Arabia, ’ua fārerei atu vau e rave rahi ta’ata, ta’a ’ē roa iā’u. ’A ha’api’i noa ai au i te ha’amātau ia rātou, ’ua ’ite mai au ē e ’ere tō tātou mau ti’aturira’a niu i ta’a ’ē rahi roa. ʼUa faʼauruhia vau nā roto i tō mātou tū’atira’a.
Hō’ē ’ohipa tā’u i ’ite mai ’o tā tātou e fa’a’ite nei, ’o te hina’aro ïa ’ia tauturu i te mau tītīhoria tei fa’aāteahia ’e tei ha’apēpēhia e te pe’ape’a. Te ’itera’a mai i teie tūatira’a, e mea fa’ahiahia mau. ’Ua ’oa’oa roa vau i te reira ’e ’ua putapū i te here rahi nō te mau ta’ata tā’u i fārerei atu.
I te taime ’a ’itehia mai ai ia tātou i te vāhi tū’atira’a, ’ua nehenehe ia tātou e paraparau nō ni’a i tō tātou mau ta’a-’ē-ra’a, ’oia ato’a tō tātou faufa’a ’āmui, ma te ’ana’anatae mau i te ’apo mai nō ni’a i te tahi ’e te tahi. Tē fa’aha’amana’o mai nei teie ’ohipa i tupu iā’u ē, tē tāmata nei te mau ta’ata maita’i i te rave i te maita’i mai te au i tō rātou mau ti’aturira’a.
’Ia riro ’ei ta’ata hi’o
Hō’ē rāve’a maita’i roa nō te ’ohipa ’e vetahi ’ē, ’o te rirora’a ïa ’ei ta’ata hi’o ’e ’ia ’ite mai i te rāve’a nō te ha’amata i te ’āparaura’a. ’Ei hi’ora’a, mai te mea tē ’ite ra ’outou e pere’o’o ta’ata’ahi fa’ahiahia tō te hō’ē ta’ata, ’a parau atu : « ’Āuē, mea au roa nā’u tō ’oe pere’o’o ta’ata’ahi ! » ’e i muri iho e ui atu nō ni’a i te reira.
I te hō’ē noa uira’a ’ōhie mai teie « mai te aha te huru teie mahana nō ’oe ? », e tauturu ia ’outou ’ia tū’ati atu i te hō’ē ta’ata. E au ’ore paha ’outou i te ha’amatara’a. E tītau te reira i te fa’a’ohipa-noa-ra’a, e mea ’ārearea rā i te taime e fāri’i ’outou i te tahi mau ’itera’a rau maita’i nō te reira.
’A hi’o i rāpae’au ia ’outou iho
’Ua fārerei te Fa’aora e rave rahi ta’ata nō te tahi atu mau ta’ere. ’Ua toro ato’a ’oia i te rima i te feiā tei ’apehia e te mau ta’ata ato’a. ’Ua rave ’oia i te mau mea ato’a nō te fārerei i tei ma’ihia ’e tei tīahihia. ’Ua paraparau ’oia ia rātou ’e ’ua fa’aora ’oia ia rātou.
Mai te mea e rave tāmau tātou i tāna ha’afātatara’a pipiri ’ore, e riro te ao nei ’ei hō’ē vāhi maita’i roa a’e. Tauturu ia vetahi ’ē ma te mau rāve’a rarahi ’aore rā ha’iha’i. ’A hāpono atu i te hō’ē parau poro’i maita’i, ’a hōro’a i te hō’ē monamona, ’a fa’aō mai i te hō’ē ta’ata tei tu’uhia i te hiti e vetahi ’ē. E tauturu te mau ’ohipa maita’i mai teie te huru ia ’outou, ’ia tū’ati atu i te feiā ’ati a’e ia ’outou. Te vāhi fa’ahiahia, e fa’ariro teie mau ’ohipa ia tātou ’ei mea maita’i a’e.
’Eiaha e ma’iri i te reira.
Te piti o te ture rahi ’oia ho’i « e aroha atu ’oe i tō ta’ata tupu, mai tō aroha ia ’oe iho na » (Mataio 22:39). ’A ha’amana’o e mau tamari’i pā’āto’a tātou nā te Atua. E rahi atu ā tō’u hi’ora’a i te ao nei ’e e maita’i atu ā vau ’ia fārerei ana’e au ia vetahi ’ē—tō’u mau ta’ata tupu—tei ta’a ’ē iā’u. ’Eiaha e ma’iri i te mea tā ’outou e nehenehe e ha’api’i mai nā roto mai ia vetahi ’ē.
Mai te mea e toro ’outou i te rima ’e e ha’api’i mai i te here ’e i te fa’atura i te mau ta’a-’ē-ra’a o te mau ta’ata ’ati a’e ia ’outou, e māere ’outou ’ia ’ite i te huru o tā te ao nei e riro mai, te ateate ’e te fa’ahiahia.