Mau niu pāpū

E feiā ’āpī nō te feiā mo’a i te mau mahana hope’a nei, e patu nei i tō rātou orara’a i ni’a i te papa o Iesu Mesia (hi’o Helamana 5:12).

E hi’opo’ara’a nō te huru ta’ata

Mau fa’ahōho’ara’a nā Katie Payne

E ’ere nō te reira vau i tāpa’o ai iā’u. ’Ua nava’i tō’u taime i te tauturura’a nō te tu’u i te hinu ’ava’ava nā ni’a i te ’āua o tō’u māmā rū’au nō te pāruru i te reira. Terā rā ’a tere noa ai te mahana, ’ua tahe te hou nā ni’a i tō’u hōho’a mata ’e ’ua ha’amata tō’u hina’aro mau i te riro ’ei rohirohi i roto i te ve’ave’a.

’Ua ani mai tō’u māmā e fa’afa’aea ri’i ’e te hō’ē inu, hou ’a ho’i fa’ahou atu ai i te ’ohipa, ’ua fa’atu’atu’a atu rā vau ma te fa’aoti ē, ’ia riro mai ’ei ta’ata ’ino.

« Dallin, ’aita e utu’a mau nō te fāri’ira’a i te hō’ē huru haere’a maita’i, ’ia au maita’i ana’e te mau mea ato’a o te orara’a », ’ua parau ’oia. « E tae mai te hi’opo’ara’a mau o te huru ta’ata ’e te utu’a mau, ’ia roa’a ana’e ia ’oe te hō’ē huru haere’a maita’i, noa atu e au ra te mau mea ato’a e mea ’ino ».

Hō’ē hepetoma i muri iho, ’ua ani mai tō’u pāpā rū’au e nehenehe ānei tā’u e tu’u i te hinu ’ava’ava nā ni’a i tōna ’āua. E mea roa a’e tōna ’āua, ’e e ti’a ’ia tu’uhia te hinu i nā pae e piti.

I te reira taime, ’ua fa’aoti au e ’ohipa i ni’a i tō’u huru haere’a noa atu ē, e mea fifi roa te ’ohipa. ’Ua ha’amata ’oi’oi māua, mea pāpū rā, ’aita i maoro roa ’ua pa’apa’a māua i te mahana. E au ē ’aita te ’ohipa e oti mai ra, ’a tietie ai māua i teie mau pātete toiaha o te hinu piripiri ’e te hau’a ’ino. ’Ua putaputa haere tō māua ’āva’e i te uru rā’au taratara e tupu ra nā ni’a i te ’āua. ’A ha’amana’o ai au i te mea tā tō’u māmā i parau, ’aita roa vau i amuamu. ’Aita roa vau i fa’aru’e. ’Ua rave maita’i au i te ’ohipa ’e ’ua tāmata i te tāpe’a i te hō’ē huru haere’a maita’i.

I te otira’a te ’ohipa, ’ua hi’o vau i te ’āua tei rāpa’au-’āpī-hia ’e ’ua fa’ate’ote’o vau i roto iā’u iho, nō te ’ohipa tā māua i rave. ’Ua rohirohi roa vau ’e te piripiri, ’ua ’ite rā vau ē ’ua upo’oti’a ato’a vau i te hō’ē hi’opo’ara’a faufa’a roa o te huru ta’ata. ’Ua ha’api’i mai au ē, e nehenehe e roa’a iā’u te hō’ē huru haere’a maita’i, noa atu e au ra te mau mea ato’a e mea ’ino.

Dallin H., Oklahoma, Fenua Marite