Mau uiraʼa ’e Mau pāhonoraʼa

« E mea au roa te ravera’a i te ’ōro’a mo’a i te fare. Nō te aha te Fatu i hina’aro ai e ho’i fa’ahou tātou i te fare purera’a ? »

« E hōro’a mai te haerera’a i te fare purera’a ia tātou te pūai ’e te ha’afaufa’ara’a o te fa’aro’o, ’o tē tae mai nā roto i te ’ohipa ’āmui ’e te tahi atu feiā fa’aro’o ’e te ha’amori-’āmui-ra’a nā muri ia rātou e tūtava ato’a nei e fa’aea i ni’a i te ’ē’a nō te fafaura’a ’e e riro ’ei pipi maita’i a’e nā te Mesia. »

Peresideni Dallin H. Oaks, tauturu hō’ē i roto i te Peresidenira’a Mātāmua, ’Āmuira’a rahi nō ’Ātopa 2021 (LiahonaNovema 2021, 26).

Hi’o Te Ha’api’ira’a Tumu ’e te mau Fafaura’a 59:9–10.

’Ia tāhō’ēhia

« Tē hina’aro nei te Fatu ’ia ho’i fa’ahou tātou i te fare purera’a nō te mea tē hina’aro nei ’oia ’ia ha’afātata atu tātou iāna. E hina’aro ato’a ’oia ’ia tāhō’ē tātou ’ei mau taea’e ’e ’ei mau tuahine. Nā roto i te haerera’a i te fare purera’a, e riro mai tātou ’ei hō’ē, e tauturu te tahi i te tahi, ’e e fa’a’ite iāna i tō tātou māuruuru nō te mau mea ato’a tāna i rave nō tātou. E fa’ahōhonu ato’a tātou i tō tātou fa’aro’o ’e e ’apo mai i te mau ha’api’ira’a ’āpī.

Melanie M., 13 matahiti, Mēhiko

Te pūai nā roto i te rahira’a mai

te feiā ’āpī tamāroa

« E mea au roa te ’ōro’a mo’a i te fare nō te mea e ’āfa’i mai te reira i te Vārua i roto i tō mātou fare ’e e tauturu ia mātou ’ia ’ite ē, e ti’a ia mātou ’ia ’āfa’i mai i te fare purera’a i roto i tō mātou ’utuāfare, ’eiaha rā i te fa’atumu noa i ni’a i te reira hō’ē taime i te hepetoma. Terā rā, i te tahi taime, e nehenehe te purera’a i te fare e fa’atupu ia ’outou i te mana’o ’ōtahi. E mea faufa’a roa te purera’a iho nō te mea e fa’atupu ’oia i te pūai nā roto i te rahira’a mai.

Nathan G., 15 matahiti, Arizona, Fenua Marite

Fa’atupu i te mau tā’amura’a

feiā ’āpī tamāhine

« I te fare purera’a tē vai ra te hō’ē arutaimāreva nō te here. I reira, e nehenehe ’outou e fa’atupu i te mau tā’amura’a ’e e ha’amaita’i i te orara’a o vetahi ’ē, ma te ha’amaita’ihia i te hō’ē ā taime. E mea faufa’a roa ato’a te fare purera’a nō te fa’ananea i tō ’outou ’ite nō te ’evanelia. Tē hina’aro nei te Fatu ’ia poro tātou i te ’evanelia i te feiā e ha’ati ra ia tātou ’e ’ia patu ia Ziona.

Amelia W., 16 matahiti, Utaha, Fenua Marite

’Ia vai ’outou i reira nō vetahi ’ē

feiā ’āpī tamāhine

« I te ha’amatara’a te ma’i pe’e, ’ua pe’ape’a vau e’ita mātou e nehenehe e rave i te ’ōro’a mo’a, i muri iho rā, ’ua vaiiho te ’episekōpo ia mātou ’ia rave te reira i te fare ! Tē uiui nei te tahi mau ta’ata nō te aha e ti’a ia tātou e ho’i fa’ahou i te fare purera’a, tē mana’o nei rā vau ē, e ti’a ia tātou e ho’i fa’ahou nō te ha’amāramarama ia vetahi ’ē—nō te paraparau ’aore rā nō te tauturu i te tahi ta’ata. E ti’a ia tātou e haere i te purera’a nō te hōro’a i te here ’e e fa’a’ite i tō tātou mau ’itera’a rau.

Tamara M., 17 matahiti, Mēhiko

Fa’a’āpī i te mau fafaura’a

feiā ’āpī tamāroa

« Tē hina’aro nei te Atua ’ia ho’i tātou i te fare purera’a, nō te mea ’aita te tā’āto’ara’a i nehenehe e rave i te ’ōro’a mo’a iō rātou. ’Ua parau mai tō’u pāpā rū’au iā’u ē, ’ei taea’e tei mau i te autahu’ara’a, e ti’a ’ia pāpū maita’i iā’u ē, ’ua fāri’i te mau ta’ata ato’a i teie rāve’a. E mea faufa’a roa nō tātou ’ia haere i te purera’a, ’ia ti’a ia tātou pā’āto’a ’ia fa’a’āpī i tā tātou mau fafaura’a.

Esteban M., 16 matahiti, Rāparata

’Ua hōro’ahia atu te mau pāhonoraʼa ’ei tauturu ’e ’ei hi’oraʼa āte’a, e ʼere i te fa’a’iteraʼa mana nō te haʼapiʼiraʼa tumu a te ʼĒkālesia.

E aha tō ’outou manaʼo ?

« Tē fa’aro’o nei au ia vetahi ’ē ’ia paraparau nō ni’a i tō rātou mau ’itera’a pae vārua. E aha tā’u e rave, mai te mea ’aita vau e mana’o ra ’ua fāri’i au i te reira » ?

’A hāpono mai i tā ’outou pāhonora’a ’e te hōho’a nā mua a’e te 15 nō ’Ātopa 2022.

I te rata uira [e-mail]. ’Aore rā ’a haere i ni’a ftsoy.ChurchofJesusChrist.org ’e ’a tāumi « Submit Your Work [Hāpono i tā ’outou ’ohipa] ». ’A fa’a’ohipa i tā ’outou tomora’a nō te ’Ēkālesia ’e ’a mā’iti i muri iho « For the Strength of Youth [Nō te Pūai o te Feiā ’Āpī] » i raro a’e « Choose Magazine [Mā’iti i te ve’a] ». ’A tāumi i ni’a « Add File [mau putu’ite] » nō te mā’iti i tā ’outou mau putu’ite ’e te mau hōho’a, ’e i muri iho, ’a tāumi « Submit [Hāpono] » nō te fa’auta uira atu ’e nō te hāpono atu i tā ’outou putu’ite.

E riro te mau pāhonoraʼa i te taui-ri’i-hia nō te roa ’aore rā nō te māramarama ’ore.