Parau hope’a

’A ha’api’i mai nō ni’a ia Iesu Mesia ’e ’ia noa’a i tōna mana

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Nō roto mai i te hō’ē a’ora’a o te ’āmuira’a rahi nō ’Ēperēra 2017.

Tē hina’aro nei au e fa’a’ite nāhea tātou i te huti mai i roto i tō tātou orara’a i te mana o tō tātou Fatu ’e Ha’api’i, o Iesu Mesia.

E ha’amata tātou ma te ha’api’ira’a mai nō ni’a iāna.¹ « E’ita e ti’a ia [tātou] ’ia fa’aorahia i roto i te ’ite ’ore » (Te Ha’api’ira’a Tumu ’e te mau Fafaura’a 131:6). Rahi noa atu tō tātou māramaramara’a i te ha’api’ira’a tumu a te Fa’aora ’e te mea tāna i rave nō tātou, e rahi atu tō tātou ’itera’a ē, e nehenehe ’oia e hōro’a mai i te mana ’o tā tātou e hina’aro nō tō tātou orara’a.

’Ei feiā mo’a i te mau mahana hope’a nei, tē pi’i nei tātou i tāna misiōni te tara’ehara a Iesu Mesia, tei fa’ariro i te ti’afa’ahoura’a ’ei ’ohipa mau nō te tā’āto’ara’a ’e te ora mure ’ore ’ei rāve’a nō te feiā e tātarahapa i tā ratou hara ’e ’ia fāri’i ’e ’ia ha’apa’o i te mau ’ōro’a ’e te mau fafaura’a e tītauhia.

I raro a’e i te fa’anahora’a rahi mure ’ore a te Metua, ’o te Fa’aora tei māuiui. Nā te Fa’aora i ’ōfati i te mau tāpe’a o te pohe. Nā te Fa’aora i ’aufau i te ho’o nō tā tātou mau hara ’e mau ’ōfatira’a ture ’e e tāmā ’ia ti’a i tō tātou tātarahapara’a. Nā te Fa’aora i fa’aora ia tātou i te pohe tino ’e te pohe vārua.

E fa’ata’a te mau parau mo’a mai te tāra’ehara ’e te ti’afa’ahoura’a i te mea tā te Fa’aora i rave, mai te au i te fa’anahora’a a te Metua, ’ia ti’a ia tātou ’ia ora ma te ti’aturi i roto i teie orara’a ’e ’ia roa’a te ora mure ’ore i roto i te ao a muri a’e.

Te ’ite ’ore : ’Aita i ’ite nō ni’a i te hō’ē mea.

’Ia ti’a : E tītaura’a, hō’ē ’ohipa e ti’a ’ia ravehia hou te tahi atu ’ohipa e ti’a ai ’ia ravehia.

Teie te tahi atu mau rāve’a nō te ha’api’i mai ’e nō te ha’afātata atu ia Iesu Mesia :

• 

  Fa’ahōho’ara’a nā Mallory Klinger

  ’A ’imi i te mea tā te Fa’aora i parau ’e i rave i roto i te mau pāpa’ira’a mo’a.

• 

  Mā’iti i te pe’e iāna.

• 

  Rave i te mau fafaura’a mo’a ’e ’ia ha’apa’o i te reira.

• 

  Fa’atoro atu iāna ma te fa’aro’o.

Fa’ata’ara’a

1. E nehenehe ’outou e tuatāpapa i te Arata’i nō te pāpa’ira’a mo’a nō te mau parau tumu « Iesu Mesia » ’e « Te Mesia Ora : Te ’itera’a pāpū o te mau ’āpōsetolo », ChurchofJesusChrist.org.