« E nehenehe Iesu Mesia… », Nō te Pūai o te Feiā ’Āpī, Tetepa 2022.
Mai, pe’e mai
Maseli ; Koheleta ; Isaia
E nehenehe Iesu Mesia…
Tē ha’api’i nei te mau parau mau tei pāpa’ihia e rave rahi tauatini matahiti i teienei ia ’outou, te mea tā te Fatu e nehenehe e rave nō ’outou i teie mahana.
Fa’aotira’a o te Fa’aro’o,, nā J. Alan Barrett
’Aita e tai’o mahana e hope ai nō ni’a i te parau mau a te Atua. Nō te mea ’o te ’ite ïa « i te huru mau o te mau mea e vai nei, ’e te huru mau ho’i o te mau mea e vai a muri a’e » (Iakoba 4:13).
Te mau parau mau tei pāpa’ihia e rave rahi tauatini matahiti i roto i te Faufa’a Tahito, e parau mau ïa e tae roa mai i teie mahana. ’E tē tauturu nei te tahi ia ’outou ’ia hi’o e aha tā te Fatu e nehenehe e rave nō ’outou i teie mahana. Teie te tahi mau parau mau nō roto mai i te mau buka a Maseli, Koheleta, ’e Isaia (’o tā ’outou e tuatāpapa i teie ’āva’e). Tē fa’a’ite nei te reira ia ’outou ē, e nehenehe Iesu Mesia…
E arata’i i tō ’outou ’ē’a
I te tahi taime, e ’ite tātou pā’āto’a i te mana’o tapitapi, te mo’emo’e, ’aore rā e hina’aro i te arata’ira’a. Mai te mea e hōro’a ’outou i te Fatu i tō ’outou ti’aturira’a hope, te ha’eha’a ’e te māuruuru, « nāna e fa’a’ite i tō ’oe mau haere’a » (hi’o Maseli 3:5–6).
Mai te mea e ha’apa’o ’outou i tāna mau fa’auera’a, e « arata’i ïa ’oia ia ’oe na te ’ē’a ti’a maita’i ’ia haere ’oe ra » ’e e fa’ariro « tō ’oe maita’i… mai te pape pu’e ra » (Isaia 48:17–18).
Fārereira’a i te Fa’aora, nā Jen Tolman
Hōro’a ia ’outou i te hi’ora’a ātea
E nehenehe te huru haere’a ’e te hete o te orara’a i roto i te ao nei, e riro ’ei mea ’ana’anatae ’aore rā e mea au maita’i. E nehenehe rā te mau ha’api’ira’a a Iesu Mesia e tauturu ia ’outou ’ia ’ite ē, e mea pau rahi ’e nō te hō’ē taime poto noa i te mau ’ē’a o te ao nei.
Te mau mea ato’a « i ravehia i raro a’e i te mahana nei… e mea faufa’a ’ore ’e te pe’ape’a ’ā’au » (Koheleta 1:14). E nehenehe e parau ē, e hōpoi mai te ’ē’a o te ao nei i te ’ino’ino. E au ra mai te horora’a nā muri i te mata’i ’e tē tāmatara’a i te haru mai i te reira. E tae mai te ’oa’oa ’ia fa’atura ana’e tātou ’e ’ia vai tura noa tātou i te Atua ’e ’ia ha’apa’o i tāna mau fa’auera’a (hi’o Koheleta 12:13).
E rave rahi ta’ata o te ao nei, « tei parau i te ’ino ra, e maita’i, ’e te maita’i ra, e ’ino ; ’o tei parau i te pōuri ra, e māramarama, ’e te māramarama e pōuri ; o tei parau i te maramara, e monamona, ’e te monamona, e maramara » (Isaiah 5:20). Tē fa’a’ite nei rā te Fatu ia tātou i te parau mau. Nā roto i te pe’era’a i tōna ’ē’a ’e tāna parau, e nehenehe tātou « e haere ma te oa’oa ’e ’ia arata’ihia atu ma te hau » (hi’o Isaia 55:8–12).
(Hi’o ato’a Isaia 40:6–8 ; 51:7–8).
Fa’a’ore i tā ’outou mau hara
E rave tātou pā’āto’a i te hape. ’Ua hara tātou pā’āto’a. Mai te mea rā e tātarahapa tātou ’e e tāmau i te ha’apa’o i te mau fa’auera’a a te Atua, e nehenehe Iesu Mesia e fa’ariro fa’ahou ia tātou ’ei mea mā ’e te mo’a. « E nāna ’oia e aroha mai [ia tātou]… te rahi ho’i iāna te fa’a’ore i te hara » (Isaia 55:7). ’Ua parau ’oia :
« ’Ia ’ute’ute roa tā ’outou mau hara ra, e riro ïa mai te hiona ; ’e ’ia ’ura’ura noa atu mai te fa’aio ra, e riro ïa mai te vavai ra i te teatea » (Isaia 1:18).
« ’O vau, ’o vau nei ā ’o tei parai i tā ’oe ra mau parau ’ino… e ’ore ho’i au e mana’o fa’ahou i tā ’oe ra mau hara » (Isaia 43:25).
Hōho’a nā Mark Mabry
Ha’apūai ia ’outou
Tē ’ite nei tātou pā’āto’a i te paruparu ’e te rohirohi i te tahi taime. E nehenehe Iesu Mesia e hōro’a ia ’outou i te pūai. « E ha’apūra’a tae’a-’ore-hia ho’i te Fatu ’o Iehova » (Isaia 26:4). Mai te mea e mea ha’eha’a ’outou ’e e ti’aturi ’outou iāna, e nehenehe ’oia e tauturu ia ’outou ’ia pāto’i i te fa’ahemara’a, ’ia rave i te mau fa’aotira’a pa’ari ’aore rā ’ōhie ma te tāmau noa noa atu te mau fifi. ’Ua parau ’oia :
« ’Eiaha e mata’u ; tei pīha’i ato’a iho vau ia ’oe : eiaha e taiā, ’o vau ho’i tō Atua : e fa’a’eta’eta vau ia ’oe, e tauturu vau ia ’oe » (Isaia 41:10).
E’ita ’outou e mo’ehia
’Ua fa’atusia te Fa’aora ’o Iesu Mesia iāna iho nō ’outou, nō te mea ’ua here ’oia i tō tātou Metua i te ao ra—’e nō te mea ’ua here ’oia ia ’outou. E fa’ati’a tāna tusia ia ’outou ’ia ti’afa’ahou ’e ’ia fāna’o i te riro mai mai te Metua i te ao ra te huru. E’ita roa atu ’oia e fa’aru’e ia ’outou ’aore rā e ha’amo’e ia ’outou. ’Ua parau ’oia :
« E mo’e ānei te ’aiū i te metua vahine mau iho… ? ’ē, e mo’e ā ïa iāna ; e’ita rā ’oe e mo’e iā’u.
« Inaha, ’ua ha’amau vau ia ’oe i ni’a i tā’u ’apu rima » (Isaia 49:15–16).
Nō te mea ’ua rave rahi ’oia nō tātou ’e e’ita roa tātou e mo’ehia iāna, e ti’a ato’a ia tātou ’ia tūtava i te « ha’amana’o tāmau noa iāna » (Te Ha’api’ira’a Tumu ’e te mau Fafaura’a 20:77, 79).