Mau niu pāpū

Feiā ’āpī feiā mo’a nō te mau mahana hope’a nei, e patu nei i tō rātou orara’a i ni’a i te papa o Iesu Mesia (hi’o Helamana 5:12).

Te tai’o o te ha’avare ’ore

tamāhine i roto i te fare ha’api’ira’a

Fa’ahōho’ara’a nā Katie Payne

I te fare ha’api’ira’a, ’ua hina’aro tō’u ’orometua nō te hēmia [chimie] e fa’ahaere i mua te ha’avare ’ore i roto i tāna piha ha’api’ira’a. ’Ua parau mai ’oia ia mātou ē, e hi’opo’a mātou i tā mātou iho hi’opo’ara’a ’e ’ia hōro’a mai i te parau fa’a’ite i tā mātou iho nūmerara’a. ’A hi’opo’a ai au i tā’u mau pāhonora’a, ’ua fa’ahemahia vau e tu’u i te hō’ē noa tai’o i tā’u nūmerara’a. E hina’aro noa vau i terā noa tai’o hau nō te manuia i te hi’opo’ara’a. ’Ua pārahi noa vau i reira i te hō’ē taime, ma te uiui e nāhea ra.

’A pārahi noa ai au i reira, ha’amana’o iho ra vau i te hō’ē fa’ahitira’a parau a te peresideni Gordon B. Hinckley (1910–2008), ’o tā’u i tu’u i muri i tā’u parau ihota’ata : « ’Auē ïa ’ohipa ha’amoura’a te hō’ē ha’avarera’a iti.… E nehenehe paha te tā’atira’a e fa’aoroma’i i te paura’a te moni, e’ita rā e ti’a i te ta’ata ’ia ha’apohe i te fa’atura iāna iho (« I Believe », Ensign, ’Ātete 1992, 5). I raro a’e i teie fa’ahitira’a tē vai ra te parau : « ’Āhiri te Fa’aora e ti’a ra i pīha’i iho iā’u, e rave ānei au i te mau mea tā’u e rave ra » ?

’Ua fāri’i au te hau ’e te oa’oa, ’a ’ite ai au i te ’ohipa e ti’a iā’u ’ia rave. ’Aita vau i taui i tā’u nūmera nō te manuia ’ore, ’ua ’ite rā vau ē ’ua manuia vau i te hō’ē hi’opo’ara’a faufa’a a’e—te hi’opo’ara’a o te ha’avare ’ore—’e ’ua fa’ahiahia vau i te mā’itira’a tā’u i rave.

Natalie A., Firipino