Te mea tā Ark e au e ’apo mai

Nā David Dickson

Mau ve’a a te ’Ēkālesia

Fenua ’āpī, mau ta’ere ’āpī, mau hoa ’āpī… ’aita e fifi !

Mau hōho’a nā Clayton Chan

E mea au nā Ark te mā’a tehutehu. E ’itera’a mau ’āpī ri’i nōna. I te ho’ira’a mai i te fenua Philipino, i reira tōna pa’arira’a, ’ua riro mai te mau mea ’ei mea iti te ’ana’anatae.

I muri mai rā, ’ua ’itehia mai i tōna metua tāne te hō’ē ’ohipa i Maretia.

I te reira taime, ’ua fārerei atu Ark i te mau hoa i te fare purera’a, tei haere mai nā te mau huru fenua ato’a, nō te fenua ’Īnitia te tahi pu’era’a.

« Tē ’amu nei rātou i te mā’a tehutehu mau ! » ’Ua parau Ark C., 14 matahiti, nō ni’a i tōna mau hoa ’āpī. « E mea tehutehu roa a’e teie mā’a i te mea tā’u i mātau i te ’amu i te fare ».

Te ’ohipa ’ārearea, maoti ra—’aita Ark i ’ite nā i te mea tāna e ma’iri nei. I teienei, mea au nāna e mā’imi haere i te hō’ē ao ’āpī maita’i nō te pae o te mā’a.

’Oia mau, e ’ere te reira ana’e te rāve’a tā te mau hoa o te ’Ēkālesia o Ark, i fa’ataui i tōna orara’a ’ei mea maita’i a’e. « ’Ua ’oa’oa vau ’ia taui te vāhi fa’aeara’a i Maretia, ’ua ’oto ato’a rā vau. E mau hoa ’āpī ana’e,’e e mea fifi roa ’ia paraparau i te mau hoa ’āpī. »

’Ua tauturu mai rā te feiā ’āpī i roto i tāna ’āma’a ’āpī, ’ia rave i teie tauira’a. ’Ei ’ohipa ’āpī, ’ua ’ite rahi mai ’oia i teienei nō ni’a i te rahira’a o te mau fenua ta’a ’ē. « ’Ua ’ite mai au i te mau ta’ere rau », ’ua parau ’oia. « E mea ta’a ’ē te mā’a, te mau ’ahu ato’a. ’Ua rau te ’ū o tō rātou mau ’ahu, ’e e mea fa’ahiahia roa e mea nāhea tō rātou hāmanira’a i te reira » !

Tē vai ra hō’ē pupu hoa, maoti rā, tei pāturu hau atu iāna i te tahi atu, i te taime ’e i muri iho i te tauira’a i te vāhi fa’aeara’a : tōna ’utuāfare.

Mau hauti ’e te mau hoa

E mea au nā Ark e rave i te taime ’e tōna ’utuāfare, ’ia perē ana’e iho ā rā rātou. ’O te perē Uno tāna e au roa a’e. Te tumu ? « E rē noa vau », ’a parau ai ’oia ma te ’ata.

Mea au ato’a nāna te ha’uti Monopoly ’e tōna nā metua ’e tōna teina ’o Leaf. (’Aita tōna teina tuahine i pa’ari roa nō te ’āmui mai.) Terā rā, e tupu rahi a’e te ’ohipa i roto i te ha’utira’a, i te taora-noa-ra’a i te kikiri ’e te ha’amāu’ara’a i te moni ha’avare. « E ha’api’i mai tō’u nā metua iā’u i te mau rāve’a i te pae faufa’a ’e te mau parau tumu o te moni i roto i te ha’uti. E a’ora’a faufa’a mau teie nō ananahi ».

E ta’ata fa’ananea tōna pāpā nō te ’ohipa rorouira, ’e tōna māmā e fa’atere i tāna iho ’ohipa i Firipino. E rave rahi ’aravihi tō rāua nō te tutu’u atu. Nōna, e hina’aro rahi tō Ark e ha’api’i mai i te mau mea ato’a tāna e nehenehe nā roto mai ia rāua. E fa’anahora’a rahi tāna nō tōna tōro’a ’ohipa.

Tāna mau tumu parau au roa nō te ha’api’ira’a i te pae ïa o te ihi anoa ha’a ’e te pae ’ī’ite. Tē hina’aro nei Ark e riro ’ei ta’ata nō te ihi anoa ha’a. Ma tōna hi’ora’a teitei, e rave ’oia i te mau fāna’ora’a ato’a e ti’a iāna ’ia ha’api’i mai i te hō’ē ’ohipa ’āpī.

Te ’apora’a mai nā muri i tōna nā metua, e ’ere noa rā i te puna ha’api’ira’a tā Ark e au roa. Mai tōna here i te mā’a tehutehu, teie ’itera’a nō te hō’ē ’ohipa faufa’a mau, ’ua tae maoro ri’i mai i roto i tōna orara’a.

Mai te pīahi mārō

« E ta’ata mārō roa vau », ’ua ha’apāpū mai Ark. « ’Aita vau e ha’ape’ape’a maita’i nei e ’apo mai nā roto mai i tō’u nā metua ».

’Ua tāmata ’oia i te haere ’ōna ana’e ’aore rā e ha’api’i mai nā roto noa mai i tōna mau hoa ’e te mau ’orometua i te fare ha’api’ira’a. I muri iho, ’ua tai’o ’oia i te hō’ē mea i roto i te Buka a Moromona, tei fa’atupu i te hō’ē ta’a-’ē-ra’a rahi i roto i tāna huru hi’ora’a i te mau mea.

I roto i te Alama te mau pene 36 ’e 37, tē hōro’a nei Alama i te a’o i tāna tamaiti ia Helamana. Tē ha’api’i nei Alama ia Helamana nō ni’a i te mau mea ato’a, nā roto mai i te ’ā’amu o te fa’afāriura’a o Alama iho (tei roto nā mahana e toru te ’ite-’ore-ra’a i muri a’e i te paraura’a te melahi iāna ē, ’aita ’oia e rave maita’i nei i te mau mā’itira’a maita’i roa a’e o te orara’a [hi’o Alama 36:6–10]) i te mau ataatara’a o te mau ’āmuira’a huna.

I rōpū i te reira mau mea ato’a, hō’ē ana’e ’īrava tei ou’a i rāpae’au i te ’api a Ark : « ’A ha’amana’o, e tā’u tamaiti, e ha’api’i ’oe i te pa’ari i tō ’oe ’āpīra’a ; oia ïa, e ha’api’i ’oe i te ha’apa’ora’a i te mau fa’aue a te Atua ra i tō ’oe ’āpīra’a » (Alama 37:35).

’Ua pata te hō’ē ’ohipa i roto i te vaerua o Ark i taua mau parau ra. « E nehenehe ato’a i tō’u nā metua e ha’api’i iā’u i te pa’ari », ’ua parau ’oia. I te reira taime, ’ite a’e ra ’oia tē vai nei te hō’ē ’āpo’o ha’amāramaramara’a i mua iāna. « I teienei, tē ha’apa’o rahi nei au i tō rāua pa’ari. ’Ua here rāua iā’u ’e e nehenehe rāua e tauturu iā’u ’ia fa’aineine nō tō’u ananahi ».

’Ua here rāua iā’u ’e e nehenehe rāua e tauturu iā’u ’ia fa’aineine nō tō’u ananahi.

’E ’ua hau atu tō rāua pa’ari i te mau a’ora’a i te pae faufa’a i fa’a’itehia mai i roto i te ha’utira’a.

Te pa’ari o māmā ’e o pāpā

Hō’ē ha’api’ira’a faufa’a roa tā te mau metua o Ark i ha’api’i iāna, ’oia ho’i ’eiaha roa e fa’ati’a i te mau fa’aurura’a ’ino ’ati a’e iāna, e turori iāna. « I’ō nei, i roto i tā’u fare ha’api’ira’a, e rave rahi tamari’i e hina’aro nei ’ia tāmata vau i te taofe, te tī, te ’ava’ava, ’e tē vai atu ra ».

E parau tumu teie nō te ’āparaura’a tāmau i te fare. « E rave rahi ’āparaura’a tā’u ’e tō’u nā metua nō te reira. E nā ni’a noa rāua i te parau ia rāua iho », ’ua parau ha’uti ’oia.

Tera rā, ’ua hotu mai teie mau parau nā ni’a-noa-ra’a ato’a. I te mau taime ato’a e anihia ’oia ’ia rave i te hō’ē mea e pāto’i nei tōna mau ti’aturira’a, e huti mai Ark i tōna pūai i roto i te mea tā tōna nā metua i ha’api’i iāna.

Te tahi atu ha’api’ira’a tāna i tāpe’a i roto i tōna ’ā’au, ’oia ho’i te ’itera’a nāhea ’ia fa’a’ahu iāna. ’Aita roa, ’aita Ark e hina’aro i te a’o i te pae nō te ’ahu a tōna nā metua, nō te fa’aō maita’i i roto i te fare ha’api’ira’a. ’Oia mau, tē manuia maita’i nei ’oia i roto i teie tuha’a ’ohipa. Tē nā ’ō ra ’oia, « ’ua mātau vau i te fa’a’ahu iā’u i te mau ’ahu tano maita’i ». « Tē tāmata nei au i te fa’a’eta i mua i te mau tamāhine ».

’Ua tauturu tōna nā metua iāna ’ia ‘ite ē, tē vai ato’a ra te tahi mau fa’ahope’ara’a tei mana’o-’ore-hia ’ia ’ahu mai, mai te reira te huru. « E nehenehe te mau ’ahu tā tātou e ’ō’omo nei, e fa’auru i te huru ferurira’a o vetahi nō tātou » ’ua fa’ata’a mai Ark. ’A ha’apa’o maita’i rahi ai ’oia, ’ua ’ite a’era Ark ē, ’aita ’oia e au nei i te tahi mau ferurira’a o te ta’ata nō ni’a iāna, ’ia ’ahu ana’e ’oia mai nā mua a’e.

I teienei, e mā’iti ’oia i te mau ’ahu tano a’e, au a’e—’aore rā, mai tāna e au e pi’i te mau ’ahu « hara’ini ». Mea au nāna tōna hōho’a ’āpī ’e e au maita’i a’e ’oia i te pae vārua nō ni’a i tōna huru fa’a’ahura’a iāna. (Hau atu, e mea maita’i noa te ferurira’a ! Mea pāpū maita’i.)

Te ha’api’ira’a i te roara’a o te orara’a

E mea au nā Ark te vāhi tāna e ora ra, ’ua here ’oia i tōna ’utuāfare, ’e mea au nāna ’ia ha’api’i mai nā roto mai i tōna nā metua.

E mea au ato’a nāna ’ia ha’api’i mai i te ’evanelia.

« Tē ti’aturi nei au ē, tē ora nei Iesu Mesia », ’ua parau Ark. « Tē ti’aturi nei au ē, tō tātou peropheta ora, ’o te peresideni Russell M. Nelson ïa, ’e nā roto mai ia Iosepha Semita, ’ua fa’aho’i fa’ahou mai Iesu Mesia i tāna ’Ēkālesia. Tē ti’aturi nei au ē, e nehenehe te ’evanelia e tauturu ia tātou i roto i tō tātou orara’a ’e nā roto i te mau fifi ’aore rā te mau tāmatara’a ato’a tā tātou e fārerei nei.

Noa atu te mau mea fa’ahiahia tā Ark e ha’api’i mai ananahi, ’ua ha’api’i a’ena mai ’oia i te tahi o te mau mea faufa’a roa a’e. I te pae ni’a o taua tāpura ra, tē vai ra teie : te ravera’a i te taime ’e te ’utuāfare e fa’arahi atu i te tehutehu i roto i te orara’a !