“Alanima Atu ʻo Fekumi ki he Leleí,” Ki Hono Fakamālohia ʻo e Toʻu Tupú, Sepitema 2022.
Tokoni ʻo e Moʻuí
Alanima Atu ʻo Fekumi ki he Leleí
ʻOku tau kehekehe kotoa pē, ko e fānau kotoa kitautolu ʻa e ʻOtuá, pea ʻoku fakaʻofoʻofa ia!
Laʻitā mei he Getty Images
Fakakaukauloto ʻokú ke nofo ʻi ha māmani ʻoku valivali ʻaki e tā valivali kotoa pē ʻaki ʻa e lanu puluú pē ʻe taha, ʻoku ifo tatau ai ʻa e meʻatokoni kotoa pē, pea nota pē ʻe taha ʻa e foʻi hiva kotoa pē. ʻOku ʻikai ke u ʻilo fekauʻaki mo koe, ka ʻoku ou tui ʻe fuʻu taʻeoli ʻaupito ia!
ʻOku ngaohi ʻe he ngaahi faikehekehe ʻi he ʻātí, ifo ʻo e meʻatokoní, mo e mūsiká ke fakamānako mo fakaʻofoʻofa ange ʻa e māmaní. ʻI he founga tatau pē, ʻoku maʻu ʻe he kakaí ha ngaahi puipuituʻa kehekehe, tui, fōtunga, fonua, matakali, mo e ngaahi aʻusia kehekehe ʻokú ne ʻai ke fakaʻofoʻofa ʻa e māmaní.
Talu mei heʻeku kei siʻí mo ʻeku nofo ʻi ʻAlepea, ko ha konga lahi faka-ʻIsilami ʻo e māmaní, ʻi ha ngaahi taʻu lahi. Naʻá ku ako ʻi ha konga ʻo e taimi ko iá ʻi ha ʻapiako nofo-maʻu ʻi ʻIngilani. Naʻá ku fetaulaki ʻi he ongo feituʻú ni, ʻi ʻAlepea mo ʻIngilani, mo ha kakai kehekehe tokolahi. ʻI he kamataʻangá naʻe faingataʻa ke u feohi mo ha kakai kehekehe naʻe ʻikai tatau mo au. Ka naʻe faifai pē peá u ako mei heʻeku aʻusiá ko e lahi taha ʻo e ngaahi faikehekehé ʻoku lelei, mo fakaʻofoʻofa! Kuo tupulaki ʻeku moʻuí ʻo lelei ange ʻi heʻeku feohi mo e kakai ʻo e ngaahi anga fakafonua mo e tui fakalotu kehekehé ʻi he ngaahi feituʻu lahi ʻo e māmaní.
Ko ha ngaahi meʻa ʻeni ʻe niʻihi kuó u ako ʻe lava ʻo tokoni atu ke ke fakaʻapaʻapaʻi mo mahino kiate koe ʻa kinautolu ʻoku kehe meiate koé.
Fekumi ki he Leleí
ʻI he taimi ʻe niʻihi ʻoku ʻikai faʻa hā mahino mai ʻa e lelei ʻi he kakaí he taimi pē ko iá, ka ʻoku fakaofo ʻa e founga ʻoku tau maʻu ai ʻa e leleí ʻi heʻetau fekumi ki ai ʻi he ʻofa mo e manavaʻofá. ʻI hoʻo fakahoko iá, ʻe fakaava ho lotó ke ke ako mei he niʻihi kehé.
ʻOku tokoni ke manatuʻi ʻe lava ke ngāue ʻa e kakaí ʻi ha ngaahi founga ʻoku ʻikai mahino kiate koe koeʻuhí naʻe ʻi ai ha meʻa ne nau mamahi ai. ʻOku meimei ongoʻi tuʻu laveangofua ʻa e tokotaha kotoa pē pe ʻoku fefaʻuhi mo ha meʻa. Mahalo ʻokú ke ongoʻi pehē foki mo koe. ʻI he taimi ʻoku mahino ai ʻeni kiate koé, ʻe faingofua ange ke ke maʻu ʻa e leleí ʻi he niʻihi kehé koeʻuhí ʻoku lava ke mahino lelei ange kiate koe ʻa e ʻuhinga ʻoku pehē ai ʻa e kakaí. Te ke lava leva ʻo kumi ha ngaahi founga ke tokoniʻi mo tāpuekina ai kinautolu.
Fakafanongo Tokanga
ʻOku kamata ʻa e hala ki he fakaʻapaʻapá mo e mahinó ʻi he taimi ʻoku tau fakafanongo ai—fakafanongo moʻoni—ki he niʻihi kehé. ʻI heʻetau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau faʻa vave ke vahevahe ʻa e ongoongoleleí, pea ko ha meʻa lelei ia! Ko hono moʻoní, ko e ongoongolelei ʻo Sīsū Kalaisí ʻa e meʻaʻofa nāunauʻia mo taʻengata taha ʻe lava ke tau vahevahé. Ka ʻi he taimi ʻe niʻihi ʻoku tau vahevahe ʻetau tuí mo e niʻihi kehé kimuʻa pea mahino kiate kitautolu ha meʻa fekauʻaki mo kinautolu. ʻOku fie maʻu ke tau fakafanongo tokanga ki he niʻihi kehé pea ako meiate kinautolu. Te tau lava ʻo fakalahi ʻa e mahino ʻoku tau maʻú—mo e houngaʻia—ki he tokotaha kotoa pē ʻoku tau fetaulaki mo iá.
Fekumi ki ha Meʻa ʻOku Faitatau
Lolotonga haʻaku ʻaʻahi kimuí ni mai ki he Kūlifa ʻAlepeá, ne u fetaulaki ai mo ha kakai tokolahi ʻoku nau kehe ʻaupito meiate au. Ka ʻi he fakaʻau ke u maheni mo kinautolú, ne u ʻiloʻi ai ʻoku ʻikai fuʻu faikehekehe ʻetau ngaahi tefitoʻi tuí. Naʻe ueʻi fakalaumālie au ʻe he ngaahi meʻa ne mau faitatau aí.
Ko e meʻa ʻe taha ne u ʻilo ʻoku mau faitatau aí ko ha holi ke tokoniʻi e kau kumi hūfanga kuo nau tukuhausia mo uesia ʻi he fekeʻikeʻí. Naʻe fakaofo ʻaupito ʻeku ʻiloʻi ʻa e faitatau ko iá. Naʻá ku fiefia ʻi he meʻá ni pea naʻá ku ongoʻi ha ʻofa lahi ki he kakai naʻá ku fetaulaki mo iá.
ʻI heʻemau maʻu pē ʻa e meʻa ʻoku mau faitatau aí, naʻa mau lava ʻo talanoa fekauʻaki mo homau ngaahi faikehekehé, pea pehē ki he ngaahi meʻa ʻoku mau mahuʻingaʻia aí, ʻi ha loto fie feakoʻaki moʻoni. Naʻe fakamanatu mai ʻe he aʻusia ko ʻení kiate au ʻoku feinga ʻa e kakai lelei ʻi he feituʻu kotoa pē ke fai lelei ʻo fakatatau ki he meʻa ʻoku nau tui ki aí.
Fakatokangaʻi Lelei
ʻOku kau ʻi he ngaahi founga lelei ke fengāueʻaki ai mo e niʻihi kehé ʻa e tokanga mo e fekumi ki ha founga ke kamataʻi ʻaki ha fepōtalanoaʻakí. Hangē ko ʻení, kapau ʻokú ke fakatokangaʻi ha taha ʻoku ʻi ai haʻane pasikala fakaʻofoʻofa, pehē ange, “Mani, ʻoku ou saiʻia ʻi hoʻo pasikalá!” pea fehuʻi ange leva fekauʻaki mo ia.
ʻE lava ke tokoni atu ha fehuʻi faingofua hangē ko e “ʻOku fēfē ho ʻahó?” ke ke fetuʻutaki ai mo ha taha. Mahalo te ke ongoʻi taʻefiemālie ʻi he kamataʻangá. ʻE fie maʻu ke toutou akoako, ka ʻoku fakafiefia ʻi he taimi pē kuó ke maʻu ai ha ngaahi aʻusia lelei ʻi hono fakahoko iá.
Vakai ʻo Ope Atu ʻIate Koe Pē
Naʻe feʻiloaki ʻa e Fakamoʻuí mo ha kakai tokolahi mei ha ngaahi anga fakafonua kehe. Naʻá Ne toe mafao atu foki ʻo tokoniʻi kinautolu naʻe fakaʻehiʻehi mei ai ʻa e niʻihi kehé. Naʻá Ne feinga makehe ke tokonia siʻi kau mahakí mo e liʻekiná. Naʻá Ne fefolofolai mo kinautolu pea naʻá Ne fakamoʻui kinautolu.
Kapau te tau muimui ʻi Heʻene founga taʻesiokitá, ʻe hoko ʻa e māmaní ko ha feituʻu lelei ange. Tokoni ki he niʻihi kehé ʻi ha ngaahi founga lalahi pe iiki. ʻOatu ha pōpoaki telefoni ʻoku lea ʻofa, vahevahe ha kiʻi fakaneifua, fakakau atu ha taha ʻoku liʻekina ʻe he niʻihi kehé. ʻE tokoni e ngaahi ngāue angaʻofa pehení ke ke fetuʻutaki ai mo kinautolu ʻoku mou feohí. Ko e meʻa fakaofó, ʻoku ʻai ʻe he ngaahi ngāué ni ke tau ongoʻi lelei ange foki mo kitautolu.
ʻOua Naʻá Ke Tō
Ko e fekau lahi hono uá ko e “ʻofa ki ho kaungāʻapí ʻo hangē pē ko koé” (Mātiu 22:39). Manatuʻi ko e fānau kotoa kitautolu ʻa e ʻOtuá. ʻOku tupulaki ʻeku vakai ki he māmaní pea ʻoku ou hoko ʻo lelei ange ʻi he taimi ʻoku ou feʻiloaki ai mo e niʻihi kehé—hoku ngaahi kaungāʻapí—ʻa ia ʻoku nau kehe meiate aú. ʻOua naʻá ke tō ʻi he meʻa te ke lava ʻo ako mei he niʻihi kehé.
Kapau te ke alanima atu peá ke ako ke ʻofa mo fakaʻapaʻapaʻi e faikehekehe ʻo e tokotaha kotoa pē ʻoku mou feohí, te ke ofo ʻi he maama mo e fakaʻofoʻofa ʻe lava ke maʻu ʻe he māmaní.