Ngaahi Makatuʻunga Mālohí

Ko hono langa hake ʻe he toʻu tupu ʻo e Siasí ʻenau moʻuí ʻi he Maka ʻo Sīsū Kalaisí (vakai, Hilamani 5:12).

Ko e Palopalema ʻo e Toutou Fehikitakí

Naʻe lahi e toutou fehikitaki hoku fāmilí lolotonga ʻeku tupu haké. Naʻe faingataʻa ʻa e fakaangaanga ki he ngaahi feituʻu foʻoú, ka ʻi hoku taʻu ʻuluaki ʻi he akoʻanga māʻolungá, naʻá ku saiʻia ʻi he feituʻu ne mau nofo aí. Ka naʻe liliu ʻa e meʻa kotoa pē, ʻi he mālōlō ʻeku kui tangatá pea fakakaukau ʻeku ongomātuʻá ke mau ʻunu ke ofi ange ki heʻeku kui fefiné. Naʻá ku manavasiʻi ke toe hiki. Naʻá ku ngāue mālohi ke u kau he ngaahi polokalama ʻa e akó mo fakakaungāmeʻa.

Naʻe kamata ke u loto-mamahi peá u fakakikihi mo ʻeku ongomātuʻá fekauʻaki mo e hikí. Naʻe poupouʻi au ʻe heʻeku ongomātuʻá ke u lotua ia. Naʻá ku feinga ka naʻe ʻikai ke u maʻu ha tali. Neongo ʻeku loto-foʻí, ka naʻá ku fakakaukau ke u toe lotu pē. Kimuʻa peá u kamatá, naʻá ku fanongo ki ha leʻo mahino ʻi hoku ʻatamaí ʻoku pehē mai, “Lesieli, ʻoku ʻikai te ke maʻu ha talí koeʻuhí ʻoku ʻikai ke ke fie maʻu ʻe koe ha tali.” Ne u ʻohovale. Hili ha taimi siʻi, naʻe kamata ke kehe ʻeku lotú. Ne u fakahā hoku lotó ki he Tamai Hēvaní mo fehuʻi pe ko e hā naʻá Ne finangalo ke u fakahokó.

Ko e ongo naʻá ku maʻú naʻe fie maʻu ke hiki hoku fāmilí. Hili ʻeku fakavaivaiʻi au mo tali e finangalo ʻo e Tamai Hēvaní, naʻá ku ongoʻi nonga. Naʻe ʻikai ke faingofua maʻu pē, ka naʻá ku ʻiloʻi naʻa mau ʻi he feituʻu naʻe finangalo ʻe he ʻEikí ke mau ʻi aí. Naʻe tokoni ʻa e aʻusia ko ʻení ke u toe ofi ange ai ki hoku Fakamoʻuí pea ʻunu ke ofi ange ki he tuʻunga ʻokú Ne finangalo ke u aʻusiá.

Rachel H., Uāsingatoni, USA