“Naʻe fakaʻofoʻofa e sākalamēniti ʻi ʻapí. Ko e hā ka finangalo ai e ʻEikí ke tau toe foki ki he lotú?,” Ki Hono Fakamālohia ʻo e Toʻu Tupú, Sepitema 2022.
Ngaahi Fehuʻí mo e Talí
“Naʻe fakaʻofoʻofa e sākalamēniti ʻi ʻapí. Ko e hā ka finangalo ai e ʻEikí ke tau toe foki ki he lotú?”
Ke Uouangataha
“ʻOku finangalo e ʻEikí ke tau foki ki he lotú koeʻuhí he ʻokú Ne finangalo ke tau toe ofi ange kiate Ia. ʻOkú Ne finangalo foki ke tau faaitaha ko ha fanga tuongaʻane mo e tuofāfine. ʻI heʻetau ʻalu ki he lotú, ʻoku tau uouangataha, fetokoniʻaki, mo fakahaaʻi kiate Ia ʻetau houngaʻia ʻi he meʻa kotoa kuó Ne fai maʻatautolú. ʻOku tau toe fakaloloto ange foki ai ʻetau tuí mo ako ha ngaahi akonaki foʻou.”
Melanie M., 13, Mekisikou
Mālohi ʻi he Tokolahí
“Naʻe fakaʻofoʻofa ʻa e sākalamēnití ʻi ʻapi koeʻuhí naʻá ne ʻomi ʻa e Laumālié ki homau ngaahi ʻapí mo tokoni ke mau fakatokangaʻi ʻoku totonu ke mau ʻomi ʻa e lotú ki homau ngaahi ʻapí kae ʻikai tokanga taha pē ki ai tuʻo taha he uike. Neongo ia, ʻoku ʻi ai ha ngaahi taimi ʻe niʻihi ʻoku lava ke ʻai ai koe ʻe he lotu ʻi ʻapí ke ke ongoʻi liʻekina. ʻOku mahuʻinga ʻa e ʻalu ki he lotú he ʻokú ne fakatupu ha mālohi ʻi he tokolahí.”
Nathan G., 15, ʻAlesona, USA
Fakatupulaki ha Ngaahi Vā Fetuʻutaki
“ʻOku ʻi ai ha ʻātakai ʻo e ʻofá ʻi he lotú. Te ke lava ai ʻo fokotuʻu ha ngaahi vā fetuʻutaki mo faitāpuekina e moʻui ʻa e niʻihi kehé lolotonga ia hono faitāpuekina pē koé. ʻOku toe mahuʻinga foki ʻa e lotú ki hono fakatupulaki hoʻo ʻilo ki he ongoongoleleí. ʻOku finangalo ʻa e ʻEikí ke tau malanga ʻaki e ongoongoleleí kiate kinautolu ʻoku tau feohí mo langa hake ʻa Saione.”
Amelia W., 16, ʻIutā, USA
Ke Mou Fepoupouʻaki
“ʻI he kamata ʻa e mahaki fakaʻauhá, naʻá ku hohaʻa naʻa ʻikai ke mau lava ʻo maʻu ʻa e sākalamēnití, ka naʻe fakaʻatā ʻe he pīsopé ke mau maʻu ia ʻi ʻapi! ʻOku fifili ha kakai ʻe niʻihi pe ko e hā ʻoku totonu ai ke tau foki ki he lotú, ka ʻoku ou tui kuo pau ke tau foki ʻo fakamaamaʻi e niʻihi kehé—ke talanoa pe tokoniʻi ha taha. Kuo pau ke tau ō ki he lotú ke foaki ʻetau ʻofá mo vahevahe ʻetau ngaahi aʻusiá.
Tamara M., 17, Mekisikou
Fakafoʻou e Ngaahi Fuakavá
“ʻOku finangalo ʻa e ʻOtuá ke tau foki ki he lotú koeʻuhí kuo ʻikai lava ʻe he tokotaha kotoa pē ʻo maʻu ʻa e sākalamēnití ʻi honau ngaahi ʻapí. Naʻe talamai ʻe heʻeku kui tangatá, ʻi heʻeku hoko ko e taha maʻu lakanga fakataulaʻeikí, ʻoku totonu ke u fakapapauʻi ʻoku maʻu ʻe he tokotaha kotoa pē ʻa e faingamālie ko ʻení. ʻOku mahuʻinga ke tau ʻalu ki he lotú ka tau lava kotoa ʻo fakafoʻou ʻetau ngaahi fuakavá.”
Esteban M., 16, ʻĀsenitina