“ʻE Lava ʻe Sīsū Kalaisi ʻo …,” Ki Hono Fakamālohia ʻo e Toʻu Tupú, Sepitema 2022.
Haʻu, ʻo Muimui ʻIate Au
Ngaahi Lea Fakatātā; Tangata Malanga; ʻĪsaia
ʻE Lava ʻe Sīsū Kalaisi ʻo …
ʻOku akoʻi atu ʻe he ngaahi moʻoni kuo hiki he taʻu ʻe lauiafe kuohilí ʻa e meʻa ʻe lava ke fakahoko ʻe he ʻEikí maʻau he ʻaho ní.
Finisher of Faith [Ngataʻanga ʻo e Tuí], tā fakatātā ʻa J. Alan Barrett
ʻOku ʻikai ha ʻaho ke ngata ki ai e ʻaonga ʻo e moʻoni mei he ʻOtuá. Ko hono ʻuhingá ko ha ʻilo ia fekauʻaki mo e “ngaahi meʻa ʻo hangē ko honau angamoʻoní, pea ki he ngaahi meʻa ʻo hangē ko honau angamoʻoni ʻe ʻi aí” (Sēkope 4:13).
ʻOku kei moʻoni pē he taimí ni ʻa e ngaahi moʻoni naʻe hiki he taʻu ʻe lauiafe kuohilí ʻi he Fuakava Motuʻá. Pea ʻoku tokoni honau niʻihi ke ke ʻiloʻi ai ʻa e meʻa ʻe lava ke fakahoko ʻe he ʻEikí maʻau he ʻaho ní. Ko ha niʻihi ʻeni ʻo e ngaahi moʻoni pehē mei he tohi Lea Fakatātaá, Tangata Malangá, mo ʻĪsaiá (ʻa ia te mou ako ki ai he māhina ní). ʻOku nau fakahaaʻi atu ʻe lava ʻe Sīsū Kalaisi ʻo …
Tataki Ho Ngaahi Halá
ʻI he taimi ʻe niʻihi, ʻoku tau ongoʻi puputuʻu, hē, pe fie maʻu ha fakahinohino. Kapau te ke foaki kakato ki he ʻEikí hoʻo falalá, loto-fakatōkilaló, mo e houngaʻiá, “ʻe fakatonutonu ʻe ia ho ngaahi ʻalungá” (vakai, Lea Fakatātā 3:5–6).
Kapau te ke tauhi ʻEne ngaahi fekaú, te Ne “tataki koe ʻi he hala ʻoku totonu ke ke ʻalu aí” pea ʻai ke “hangē ko e vaitafé hoʻo fiemālié” (ʻĪsaia 48:17–18).
Meeting the Savior [Feʻiloaki mo e Fakamoʻuí], tā fakatātaaʻi ʻe Jen Tolman
ʻOatu ha Fakakaukau
ʻE ngali fakaʻofoʻofa pe fakafiefia ʻa e ngaahi ʻulungaanga mo e tōʻonga moʻui ʻi he māmaní. Ka ʻe lava ke tokoniʻi koe ʻe he ngaahi akonaki ʻa Sīsū Kalaisí ke ke sio ki he mamaha mo e taʻeʻaonga ʻa e ngaahi founga ʻa e māmaní.
Ko e ngaahi meʻa kotoa pē ʻoku “fai ʻi he lalo laʻaá … ko e vaʻinga … moe fakamamahi [ia] ki he laumālié” (Tangata Malanga 1:14). ʻI hono fakalea ʻe tahá, ʻoku ʻomi ʻe he founga ʻo e māmaní ʻa e loto-foʻí. ʻOku hangē ia hano tuli e matangí pea feinga ke puke iá. ʻOku maʻu ʻa e fiefiá ʻi he taimi ʻoku tau foaki ai ha fakaʻapaʻapa mo ha loto-ʻapasia ki he ʻOtuá mo tauhi ʻEne ngaahi fekaú (vakai, Tangata Malanga 12:13).
ʻOku ui ʻe ha kakai tokolahi ʻi he māmaní ʻa e “koví ko e lelei, mo e leleí ko e kovi; ʻoku ui ʻa e poʻulí ko e maama, mo e māmá ko e poʻuli; ʻoku ui ʻa e koná ko e melie, mo e melié ko e kona!” (ʻĪsaia 5:20). Ka ʻoku fakahā mai ʻe he ʻEikí ʻa e moʻoní kiate kitautolu. ʻI heʻetau muimui ʻi Hono halá mo ʻEne folofolá, te tau lava ai ʻo “ʻalu atu ʻi he fiefia, pea ʻe taki atu ʻa [kitautolu] ʻi he fiemālie” (vakai, ʻĪsaia 55:8–12).
(Vakai foki, ʻĪsaia 40:6–8; 51:7–8.)
Fakamolemoleʻi Hoʻo Ngaahi Angahalá
ʻOku tau fai kotoa pē ha ngaahi fehalaaki. Kuo tau angahala kotoa. Ka ʻo kapau te tau fakatomala mo feinga ke tauhi e ngaahi fekau ʻa e ʻOtuá, ʻe lava ʻe Sīsū Kalaisi ʻo ngaohi kitautolu ke tau maʻa mo kakato. “Te Ne ʻaloʻofa kiate [kitautolu]; … he te Ne fakamolemole ʻo lahi ʻaupito” (ʻĪsaia 55:7). Kuó Ne folofola:
“Neongo ʻa e tatau ʻo hoʻomou angahalá mo e kula ʻahoʻaho, ʻe hoko ia ke hinehina ʻo hangē ko e ʻuha hinaekiakí; kapau ʻoku kulokula ia ʻo hangē ko e kulamumū, ʻe tatau ia mo e fulufuluʻi sipi” (ʻĪsaia 1:18).
“Ko au, ʻio ko au ia, ʻa ia ʻoku tamateʻi hoʻo ngaahi hiá … pea ʻe ʻikai te u manatu [ki] hoʻo ngaahi angahalá” (ʻĪsaia 43:25).
Faitaaʻi ʻe Mark Mabry
Fakamālohia Koe
ʻOku tau ongoʻi vaivai pe ongosia kotoa he taimi ʻe niʻihi. ʻE lava ke ʻoatu ʻe Sīsū Kalaisi ha mālohi kiate koe. “ʻI he ʻEiki ko Sihová ʻa e mafimafi taʻengatá” (ʻĪsaia 26:4). Kapau ʻokú ke loto-fakatōkilalo mo falala kiate Ia, te Ne lava ʻo tokoniʻi koe ke ke matuʻuaki e ʻahiʻahí, fakahoko ha ngaahi fili faingataʻa, pe laka ki muʻa neongo e ngaahi faingataʻá. Kuó Ne folofola:
“ʻOua naʻá ke manavahē; he ʻoku ou ʻiate koe: ʻoua ʻe loto vaivai; he ko au ko ho ʻOtuá: te u fakamālohia koe; ʻio, te u tokoniʻi koe” (ʻĪsaia 41:10).
ʻIkai Teitei Fakangaloki Koe
Naʻe feilaulauʻi ʻe he Fakamoʻui ko Sīsū Kalaisí Ia maʻau koeʻuhí he ʻokú Ne ʻofa ʻi heʻetau Tamai Hēvaní—pea koeʻuhí ʻokú Ne ʻofa ʻiate koe. Koeʻuhí ko ʻEne feilaulaú te ke lava ai ʻo toetuʻu pea maʻu ha faingamālie ke hoko ʻo hangē ko e Tamai Hēvaní. He ʻikai te Ne teitei liʻaki koe pe fakangaloki koe. Kuó Ne folofola:
“ʻE faʻa fakangalongaloʻi ʻe ha fefine ʻene tama ʻoku huhú … ? ʻio, te nau faʻa fakangaloki …, ka ʻe ʻikai te u fakangalongaloʻi koe.
“Vakai, kuó u tohi tongi koe ʻi hoku ʻaofinimá” (ʻĪsaia 49:15–16).
Koeʻuhí kuó Ne fakahoko ha meʻa lahi maʻatautolu pea he ʻikai te Ne teitei fakangaloki kitautolu, ʻoku totonu foki ke tau feinga ke “manatu maʻu ai pē kiate Ia” (Tokāteline mo e Ngaahi Fuakava 20:77, 79).