“Ako ʻia Sīsū Kalaisi pea Maʻu Hono Mālohí,” Ki Hono Fakamālohia ʻo e Toʻu Tupú, Sepitema 2022.
Lea Fakaʻosí
Ako ʻia Sīsū Kalaisi pea Maʻu Hono Mālohí
ʻOku ou fie vahevahe atu e founga te tau lava ai ʻo tohoakiʻi mai ki heʻetau moʻuí e mālohi hotau ʻEiki mo e Pule ko Sīsū Kalaisí.
ʻOku tau kamata ʻaki ʻetau ako fekauʻaki mo Ia.1 “ʻOku ʻikai lava ke fakamoʻui [kitautolu] ʻi he taʻeʻiló” [Tokāteline mo e Ngaahi Fuakava 131:6). Ko e lahi ange e mahino ʻoku tau maʻu ki he tokāteline ʻo e Fakamoʻuí mo e meʻa naʻá Ne fuesia maʻatautolú, ko e lahi ange ia ʻetau ʻilo te Ne lava ʻo ʻomi ʻa e mālohi ʻoku tau fie maʻu ki heʻetau moʻuí.
ʻI heʻetau hoko ko e Kau Māʻoniʻoni ʻi he Ngaahi ʻAho Kimui Ní, ʻoku tau ui ai e misiona ʻo Sīsū Kalaisí ko ʻEne Fakaleleí, ʻa ia naʻe hoko ʻa e toetuʻú ko ha meʻa moʻoni ki he taha kotoa pea fakafaingamālieʻi ai ʻa e moʻui taʻengatá maʻanautolu ʻoku fakatomala mei heʻenau ngaahi angahalá pea maʻu mo tauhi e ngaahi ouau mo e ngaahi fuakava mahuʻingá.
ʻI he malumalu ʻo e palani maʻongoʻonga taʻengata ʻa e Tamaí, ko e Fakamoʻuí naʻe mamahí. Ko e Fakamoʻuí naʻá Ne maumauʻi e ngaahi haʻi ʻo e maté. Ko e Fakamoʻuí naʻá Ne totongi huhuʻi ʻetau ngaahi angahalá mo e maumaufonó pea toʻo ia ʻo makatuʻunga ʻi he tuʻunga ʻo ʻetau fakatomalá. Ko e Fakamoʻuí ʻokú Ne fakahaofi kitautolu mei he mate fakatuʻasino mo fakalaumālié.
ʻOku fakamatalaʻi ʻe he ngaahi foʻi lea toputapu hangē ko e Fakaleleí mo e Toetuʻú ʻa e meʻa ne fakahoko ʻe he Fakamoʻuí, ʻo fakatatau mo e palani ʻa e Tamaí, ka tau lava ʻo moʻui mo ha ʻamanaki lelei ʻi he moʻuí ni pea maʻu mo e moʻui taʻengatá ʻi he maama kahaʻú.