“Ko Hano Siviʻi ʻo e ʻUlungāngá,” Ki Hono Fakamālohia ʻo e Toʻu Tupú, Sepitema 2022.
Ngaahi Makatuʻunga Mālohí
Ko hono langa hake ʻe he toʻu tupu ʻo e Siasí ʻenau moʻuí ʻi he Maka ʻo Sīsū Kalaisí (vakai, Hilamani 5:12).
Ko Hano Siviʻi ʻo e ʻUlungāngá
Tā fakatātaaʻi ʻe Katie Payne
Naʻe ʻikai ko e meʻa ʻeni naʻá ku fakakaukau ʻe hokó. Ne u loto-fiemālie feʻunga ke tokoni ʻi hono vali e ʻā ʻo ʻeku kui fefine hono uá ʻaki ha lolo faitoʻo (linseed) ke tokoni ki hono maluʻí. Ka ʻi he ʻalu ʻa e ʻahó, naʻe tafe hifo e pupuhá ʻi hoku matá pea naʻe liliu ʻeku loto-fiemālié ki ha ongosia ʻi he vela ʻa e ʻeá.
Naʻe fokotuʻu mai ʻe heʻeku faʻeé ke u kiʻi mālōlō mo inu kimuʻa peá u toki hoko atú, ka naʻá ku fakafulofula, mo ngāue fakaʻiteʻita pē.
Naʻá ne pehē mai, “Tāleni, ʻoku ʻikai ha pale moʻoni ia ki hono maʻu ha ʻulungaanga lelei ʻi he taimi ʻoku lelei ai e meʻa kotoa pē ʻi he moʻuí. ʻOku hoko mai ʻa e sivi moʻoni ʻo e ʻulungāngá pea mo e pale moʻoní ʻi he taimi te ke lava ai ʻo maʻu ha ʻulungaanga ʻoku leleí neongo e ngali fakamamahi ʻa e meʻa hono kotoa peé.”
Hili ha uike ʻe taha mei ai, naʻe kole mai ʻeku kui tangatá pe ʻe lava ke u vali hono ʻaá ʻaki ʻa e lolo faitoʻó. Naʻe lōloa ange hono ʻaá, pea naʻe pau ke mau vali ʻa e ongo tafaʻakí fakatouʻosi.
ʻI he taimi ko ʻení, ne u fakapapauʻi ke fakaleleiʻi hoku ʻulungāngá neongo kapau ʻe faingataʻa ʻa e ngāué. Ne ma kamata pongipongia, ka naʻe ʻikai fuoloa kuó ma velahia ʻi he laʻaá. Naʻe hangē ne ʻikai ha toe ngataʻanga ʻo ʻema ngāué, ʻi heʻema taki e ngaahi fuʻu kane lolo mamafa, pikipiki mo nanamú. Naʻe mahuhuhuhu homa vaʻé ʻi he ʻulu ʻakau talatala he ʻaá. Ka ʻi heʻeku manatu ki he meʻa naʻe lea ʻaki ʻe heʻeku faʻeé, naʻe ʻikai ke u lāunga. Naʻe ʻikai ke u foʻi. Naʻá ku ngāue tokanga mo feinga ke u kei maʻu pē ha ʻulungaanga lelei.
ʻI he ʻosi ʻema valí, ne u vakai atu ki he ʻā ne toki vali foʻoú peá u ongoʻi laukau ʻaki e meʻa ne ma fakahokó. Naʻá ku helaʻia mo pikipiki, ka naʻá ku ʻiloʻi te u lavaʻi foki mo ha sivi mahuʻinga ʻo e ʻulungāngá. Naʻá ku ʻiloʻi te u lava ʻo maʻu ha ʻulungaanga lelei neongo ʻa e ngali fakamamahi ʻa e meʻa kotoa peé.
Dallin H., ʻOkalahoma, USA