“O Auala e 4 e Faamalosia ai Oe e Iesu Keriso,” Mo le Malosi o le Autalavou, Ian. 2023.
O Auala e 4 e Faamalosia Oe e Iesu Keriso
Ou te mafaia mea uma lava i le faamalosi mai o Keriso.
Filipi 4:13
I le salafa o le lalolagi, e olioli le au Kerisiano i lenei mau: “Ou te mafaia mea uma lava i le faamalosi mai o Keriso ia te a’u” (Filipi 4:13).
Pe a faalogo tagata i lenei mea, atonu e manatu nisi o i latou o lona uiga e mafai ona latou pasia soo se suega, manumalo i soo se taaloga, ma taunuu moomooga uma. Ae e le o le mea lena o loo aoao mai e lenei mau.
Sa tusia e le Aposetolo o Paulo a o i ai o ia i le falepuipui. I le avea ai ma se pagota, sa tele mea sa le mafai e Paulo ona fai, ae sa ia iloa e mafai e Iesu Keriso ona faamalosia o ia e fai le mea e sili ona taua.
E moni foi lena mea mo oe!
1 Ua Faamalosia Oe e Keriso ia Iloa
Ua tuuina atu e Iesu Keriso ia te oe ni auala taua e mafai ona e iloa ai le mea moni. Ua Ia aoaoina i tatou uma ia tatalo e le aunoa (tagai 3 Nifae 18:18) ma ole atu ia iloa le mea moni (tagai Moronae 10:4–5). E mafai foi ona e maua ma iloa le mea moni e ala i au suesuega o tusitusiga paia.
O le tatalo ma le suesueina o tusitusiga paia e aumaia ai le Agaga i lou olaga. E mafai ona fetalai atu le Agaga i “lou mafaufau ma … o lou loto” (Mataupu Faavae ma Feagaiga 8:2), “faatumuina ai lou agaga i le olioli,” ma “faapupula ai lou mafaufau” (Mataupu Faavae ma Feagaiga 11:13).
I nei auala, e mafai ona e “faalogo ia te Ia”—faalogo i afioga a le Faaola ma mulimuli i mea ua Ia fetalai mai ai. Na aoao Peresitene Russell M. Nelson e faapea “o se mamanu mo le manuia, fiafia, ma le olioli i lenei olaga.”1
2 Ua Faamalosia Oe e Keriso e Fai
E oo mai le malosi ia te oe a o e taumafai e tausi poloaiga ma faia filifiliga lelei e taitai atu ai i le filemu ma le fiafia. Ua faamalosia oe e Iesu Keriso e faia lenei mea e tusa lava pe faigata ona fai na filifiliga. O nisi taimi atonu e te faia ai se filifiliga leaga. O le mea e faafetai ai, o le Togiola a le Faaola ua mafai ai ona salamo. Ona o Iesu Keriso, e mafai ai ona e mama ma maua le olioli. E mafai ona Ia faamalosia oe ia “faia ia lelei atu ma ia lelei atu”2 i aso taitasi.
3 Ua Faamalosia Oe e Keriso e Faatoilalo
A o i ai i le falepuipui, na tusia e Paulo: “Aua ua aoaoina a’u ia to’a filemu lo’u loto i mea ua ia te au.
“Ua ou iloa le mativa, ua ou iloa foi le mauoa: o i mea uma lava ou te i ai, ma mea uma e oo ia te au ua aoaoina ai au” (Filipi 4:11–12).
I se isi faaupuga, sa aoao ai e Paulo e faapea, e ala ia Keriso, e mafai ai ona ia manumalo ma aoao mai ona tofotofoga ma luitau. E mafai e Iesu Keriso ona faamalosia oe ia faia foi faapea.
Na puapuagatia le Faaola i “tiga ma mafatiaga ma faaosoosoga o ituaiga eseese uma.” Sa Ia tauaveina i Ona lava luga o tatou vaivaiga ina ia “mafai ai ona ia silafia … le ala e fesoasoani ai i ona tagata, e tusa ma o latou vaivaiga” (Alema 7:11–12). E tusa lava po o a mea o feagai ma oe, e mafai e Iesu Keriso ona faamalosia oe e onosaia ma ausia mea o le a le mafai ona e faia na o oe.
4 Ua Faamalosia Oe e Keriso ia Avea ai
Ua faia e Iesu Keriso le toetu o se mea moni mo i tatou uma, ma ua Ia faia le ola e faavavau ia mafai e i latou o e salamo, maua sauniga e tatau ai, ma osia ma tausia feagaiga e o faatasi ma i latou. A aunoa ma Keriso, e le mafai ona tatou faataunuuina le mea e sili ona finagalo ai le Tama Faalelagi—mo i tatou ia avea atili e faapei o Ia ma Lona Alo, o Iesu Keriso, ma mau faatasi ma i Laua e faavavau.
E mafai ona e avea atili e pei o Iesu Keriso a o e aoao e uiga ia te Ia, faalagolago ma faamoemoe ia te Ia, ma mulimuli i Ana faataitaiga. O lenei mea o le a taitai atu ai oe ia ola faatuatua atili, faamoemoe, alofa mama, onosai, lotomaualalo, mama a’ia’i, ma le usiusitai. O uiga uma nei o le Faaola.
A o e taumafai e mulimuli ia Iesu Keriso, o le a avea o Ia ma ou faamoemoe ma lou malamalama o le a taialaina oe ia avea ma tagata atoa ua Ia silafia e mafai ona avea ai oe. Ma, faatasi ai ma Paulo, o le a mafai ona e faapea atu, “Ou te mafaia mea uma lava i le faamalosi mai o Keriso ia te au.”