“O Meaalofa o le Talalelei i Guam,” Mo le Malosi o le Autalavou, Ian. 2023.
O Meaalofa o le Talalelei i Guam
I se motu o le sami, na maua ai e Franchesca le faauooga ma le mafanafana e ala i le talalelei.
Ata na pueina e Cody Bell
Faatasi ai ma ona matafaga, vai toafimalie, ma ana anamua, o le motu o Guam e foliga mai o se tafaoga na moe miti iai, ae o se aso masani i le olaga o Franchesca N. e 15 tausaga le matua! E fiafia o ia i matafaga matagofie. “E manaia le o atu ma saili le natura.”
Sa fanau ma ola ae i Guam, e fiafia o ia e faifai mea i fafo. “O au o se tagata e fiafia i fafo, o lea ou te le fiafia ai e nofo i totonu,” o lana tala lea. E fiafia o ia i alo laupapa i luga o le vasa, moulu, ma savaliga sopo faatasi ma ona matua ma ona uso e toalua. E faapitoa lava lo latou fiafia e savali sopo i se nofoaga e i ai ana anamua.
“Ou te matua latalata lava i ou uso. O i latou o au uo mamae,” o lana tala lea. O lona uso matua o loo aoga i le aoga i Hawaii. “O ala o faasalalauga faaleagafesootai o se vaega tele lea e fesoasoani matou te fesootai ai,” o le tala lea a Franchesca. E fiafia o ia e faalatalata ma fesootai.
O Se Faataitaiga i Isi
O Franchesca o se tausaga lua i se aoga teine Katoliko, lea e na o ia lava le tagata o O Le Ekalesia a Iesu Keriso o le Au Paia o Aso e Gata Ai. I le avea ai ma tagata e toatasi o le Ekalesia i lana aoga sa fai si taufaafefe i le taimi muamua, ae ua masani ai. Ma le isi, o isi e siomia o ia e manatu e manaia le avea o ia ma se vaega o se tapuaiga ese.
Mo se faataitaiga, sa inu e ana uo le kofe i le malologa i se tasi aso, ma sa mafai e Franchesca ona faamatala atu le Upu o le Poto ia i latou.
E filifili foi Franchesca e aua nei palauvale e ui ina faia e isi tagata i le aoga. Fai mai o ia, “Sa faaosoosoina a’u i le tele o taimi muamua, ae o se mea e faatumauina ai lo’u malosi o la’u sootaga patino lea ma le Tama Faalelagi e ala i le tatalo.” Sa ia faaopoopo mai, “E le tatau ona ou faia nei mea, aua e sese ma ona ou te alofa i le Tama Faalelagi ma Iesu Keriso.”
Sailia o Uo
O nisi taimi e mafai ona tuuatoatasi le avea ai ma le tagata toatasi o le Ekalesia i lana aoga. A o avea o ia ma se tagata tausaga muamua, sa lagona e Franchesca le tuuatoatasi i le taimi o le faama’i pipisi ma sa lei tele ni ana uo. Sa popole o ia e talanoa i ona matua e uiga i ai, ae ina ua ia tatalo, sa ia lagona le uunaiga e ta’u atu ia i laua ona lagona.
I le avea ai o se aiga, sa latou filifili ai e tatalo mo ia ina ia mafai ona maua ni uo e mafai ona ia faalagolago i ai. O se vavega lava, o le taimi lava na uma ai le latou tatalo, sa latou faalogoina ai se tuitui i le faitotoa. Na iloa ai o se tasi o ana uo mai se isi uarota, ma sa ia aumaia ni kuki! Na iloa e Franchesca sa faafofogaina e le Tama Faalelagi la latou tatalo.
O le siteki a Franchesca e aofia ai tagata mai Guam ma isi motu. O lana uarota e na o se vaega toalaiti o le autalavou, ae o lana uarota e pei o se aiga. E vavalalata le au paia, ma o lenei mea e uunaia ai o ia e alu i le lotu i Aso Sa taitasi. O ni faatosinaga tetele ma ni faataitaiga lelei i lona olaga.
Ua maua foi e Franchesca le malosi i lana vasega seminare. “O le seminare o se tasi o faatumutumuga o lo’u vaiaso,” o lana tala lea. “Pe a ou auai i le seminare, e foliga mai ua mou atu uma o’u popolega.”
E fiafia o ia e auai i le seminare, pe i luga o le initoneti pe auai faaletagata lava ia, ma e le misi lava se vasega sei vagana ai ua tatau ai. Fai mai o ia e sili atu ona lelei ona vaiaso ona ua ia filifili e i ai i le seminare. Afai sa i ai sona vaiaso faigata, na te faamautinoa e alu i le seminare aua na te lagonaina le filemu iina.
E i ai foi gaoioiga a le autalavou pe a ma le faalua i le faatolu i le masina. Sa fuafuaina foi e Franchesca se tasi o gaoioiga—o se po taalo ma le tele o taaloga laupapa malie ma se taaloga o mau. E lei tele ni a latou feiloaiga i le taimi o le faama’i pipisi, o lea la pe a latou feiloai, e matuai fiafia lava.
Sa faia foi e tamaitai talavou se vitio faamusika e pese na’o laugutu mo i latou lava i le pese a le autalavou o le Ekalesia “Good Day” ma tuu i luga e faasoa atu ai le alofa ma siitia ai isi. “O faasalalauga faaleagafesootai e mafai ona aumaia faatasi ai tagata uma, aemaise lava taimi e le mafai ai ona tatou vaai moni i tagata uma.”
Tulimatai Atu i se Malumalu
I le konafesi aoao ia Oketopa 2018, sa fofogaina mai ai le Malumalu o Yigo Guam. Fai mai Franchesca, “Sa matuai fiafia le autalavou—sa matou tatalo uma mo lena mea.” Ina ua mavae lena, sa ia matamata ma le naunautai i le fauga ma faatalitali mo lo latou lava malumalu, lea na faamaeaina ia Me 2022.
E masani lava ona latou malaga i Filipaina mo malaga i le malumalu i le taimi ua tuanai. Ina ia totogi mo malaga, latou te faatau atu meaai tao ma fufulu taavale. Ona o se malaga tele, latou te fuafuaina ai ia oo atu i se vaiaso. Ua fiafia lava Franchesca i le mafai ona alu soo i le malumalu ma maua faamanuiaga e oo mai mai le papatisoina mo ona tuaa.
O le Faamafanafanaga e ala i le Tatalo
Fai mai Franchesca e tele lava ina popole tele o ia, ae ua fesoasoani le tatalo ia te ia. “O le tatalo e matuai mamana lava. O le talanoa atu i le Tama Faalelagi e faamafanafanaina ai au. E faafofoga mai ma e mafai ona Ia fesoasoani.”
“Pe a ou tatalo, e le vave oo mai i taimi uma le tali,” o lana tala lea. “Ua na o se lagona o le taitaiga e fesoasoani ia te au; lena lagona o Lona faatasi mai ma Lona alofa. E faamafanafanaina ai au ma ou maua ai se lagona lelei sili atu.”
O lana fautuaga i isi talavou o le: “Tatalo i le Tama Faalelagi. Talanoa ia te Ia. E fesoasoani tele lena mea.”
Fai mai o ia o lona tina o se tagata popole foi ae o se lagolago tele foi. “O lo’u tina o se faamanuiaga mai le Tama Faalelagi, ma ua ia taialaina soo au.”
“O le aiga o se faamanuiaga tele,” o lana tala lea. “Ou te manatu o le talanoa atu i lou aiga po o se uo pe afai o loo e feagai ma se tofotofoga e taua.”
E manao Franchesca ia vaai tagata uma i faamanuiaga a le Alii i aso uma. “O faamanuiaga i aso taitasi e mafai ona faigofie tele. O le alu i le aoga o se faamanuiaga tele. E anoanoai vavega mananaia pe afai tatou te faaaluina le taimi e matau ai. Ou te matua faafetai lava i le i ai o le talalelei i lou olaga.”