Sau, Mulimuli Mai ia te A’u

Luka 1, 5

O Le Vavega Sili

Saunia e Jessica Zoey Strong

Mekasini a le Ekalesia

E i ai se vavega e tasi e sili atu ona taua nai lo na vavega uma.

Aua e leai lava se mea e tasi e le mafaia e le Atua (tagai Luka 1:37; Filipi 4:13). Ae e mafai ona e tatalo mo soo se mea ma pe na taliina ea? Aisea e tupu ai i nisi tagata vavega ae foliga mai e le tupu i isi? Ma o le a le uiga moni o lenei mea ia te oe?

E tolu vavega anamua, o vavega e tolu faaonaponei, ma le vavega sili e tasi ua aoao atili ai i tatou.

1

Vavega Anamua

Ata na tusia e Camila Gray

Atonu sa sili atu le faateia o Maria ina ua ta’u atu e le agelu o Kaperielu ia te ia o le a avea o ia ma tina o le Faaola. Sa le tatau ona mafai. Ae sa faamatala e le agelu o Kaperielu o Iesu o le Alo o le Atua ma fetalai mai, “E leai lava se mea e tasi e le mafaia e le Atua” (Luka 1:37). Ma sa sao le agelu. Na fanauina e Maria le Faaola o le lalolagi.

Vavega i Ona Po Nei

Sa sopoia e ni faifeautalai se toalua sa auauna atu i Mekisiko se auala pisi i aso uma. O nisi taimi la te faatalitali ai mo le 10 minute ae la te lei maua le avanoa e sopoia ai, ma e masani lava ona la tamomoe! Ona la feiloai lea i se tagata matua lava, ma ua telegese ma le malosi. Sa manao o ia e sau i le lotu faatasi ma i la’au, ae—o le vaega pito faigata la lenei—e tatau ona ia sopoia le auala pisi. Ma e leai, sa le mafai e faifeautalai ona amoina o ia i le isi itu (e ui ina sa la mafaufau moni i ai!). Ona tupu lea o se vavega. “Ina ua matou taunuu i le auala,” na fai mai se tasi o faifeautalai, “sa leai ni taavale na o mai. Sa mafai ona matou savavali lemu lava ma le saogalemu i le isi itu.”

“E le’i mafai!? Toe mafaufau!

E leai lava se mea e tasi e le mafaia e le Atua (e oo i mea e le mafai!).

2

Vavega Anamua

Sa i ai se tagata sa “ma’i i le supa”, pe pipili. Sa talitonu o ia e mafai e le Faaola ona faamalolo o ia. Ae sa siomia Iesu e le toatele o tagata, ma sa faigata ona oo atu ia te Ia. O le a la le mea na fai e le tagata? Sa tuutuu ifo o ia e ana uo i luga o lona moega e ui atu i le taualuga o se fale ina ia taunuu atu i le Faaola. Leai, atonu sa lei faigofie tele lena mea. Ae atonu sa tele le faatuatua sa i ai ia te ia ma ana uo. Ma sa tauia—Sa faamagalo e Iesu agasala a le tagata ma faamalolo ia te ia (tagai Luka 5:17–26).

Vavega i Ona Po Nei

Sa taaalo Ella W. ma ana uo i le paka ae leiloa ai le latou fagafao pilioua. Atonu e le foliga mai o se mea tele. Ae manatua, e fesuia’i lanu o le pilioua e ogatusa ma o latou siosiomaga. Ina ua uma ona saili mo sina taimi, sa tonu ia Ella ua oo i le taimi e tatalo ai i le faatuatua. Sa lei pine ae mafai ona latou maua le pilioua i totonu o se laau! “O le taimi lava na oo ai i lima o se tasi, sa matou faia se tatalo faafetai i le Tama Faalelagi,” o le tala lea a Ella.

E Auala mai Vavega e Ala i le Faatuatua ia Iesu Keriso

O mea faigata e mafai i taimi uma i le Atua. Ae e tatau ona i ai lo tatou faatuatua i le Faaola (pe o se manao e talitonu!) ma faatino lena faatuatua ina ia tutupu vavega.

3

Vavega Anamua

Sa faaipoipo Elisapeta ma Sakaria i le tele o tausaga ae sa leai se fanau. O nisi taimi, atonu na lagona ai e pei e lei taliina mai a la tatalo faamaoni. Ma mulimuli ane, ua matutua tele i la’ua mo le mauaina o ni fanau. Ae na faaali se agelu ia Sakaria ma ta’u atu o le a fanau e Elisapeta le tama. (Mea malie moni: na iu lava ina avea le pepe ma Ioane le Papatiso!) I le iuga, na mafai mea na le mafai. Ae sa tatau ia Elisapeta ma Sakaria ona faatalitali mo se taimi umi lava (tagai Luka 1).

Vavega i Ona Po Nei

Sa puapuagatia Lindsey M. mai le maimaliu. “O taeao uma lava, ou te aioi atu ai i lo’u Tama Faalelagi e aveese ma’ilili,” o le tala lea a Lindsey. Ae e le’i alu ese. A o faatalitali Lindsey ina ia faamaloloina, sa ia maua faamanuiaga faaleperisitua, lea na aumaia ia te ia le filemu. Ma o lena filemu o se vavega lava. “Pe a tatou liliu atu i lo tatou Tama Faalelagi, o le a i ai o Ia iina ma le le masalomia mo i tatou, e faasalalauina vavega ma ofoina atu le faamafanafanaga,” o lana tala lea. Na iu lava ina maua e Lindsey se taotoga lea na fesoasoani i lona ma’ilili.

E Oo Mai Vavega e Tusa ai ma le Finagalo o le Atua

E mafaia mea uma e le Atua. Atonu e tele lou faatuatua. Ae e oo mai vavega e tusa ai ma le taimi ma le finagalo o le Tama Faalelagi ma i Lana lava ala. Vaavaai mo isi vavega i le ala, e pei o le filemu ma le malosi e tumau ai.

O Le Vavega Sili

Ua tatou talanoa soo e uiga i vavega. Ae e i ai se vavega e tasi e tele atu ma sili atu ona taua nai lo na vavega uma. O lena vavega o le taimi na afio mai ai le Alo o le Atua i le lalolagi o se pepe, mulimuli ane na aoao atu ma faia faamalologa, ona ofo atu lea o Lona lava ola. Sa tauaveina e Iesu Keriso i Ona lava luga a tatou agasala, tiga, ma vaivaiga. O Lana vavega e aofia ai aso e tolu i se tuugamau ona sosoo ai lea ma se toetu lea na aumaia ai le ola pe a mavae le oti mo i tatou uma. O lena vavega ua suia ai mea uma.

E faigofie ona maua i le taumafai e maua le faatuatua i se vavega patino. Ma e mafai ona faigata lena mea pe a tatou le iloa le finagalo o le Tama Faalelagi. Nai lo le taulai atu o lou faatuatua i se vavega e te manao ai, ia taulai atu i le vavega o le Togiola a le Faaola. Ia faatuatua e leai se mea e le mafaia e le Atua, e aofia ai mea o loo e tatalo atu ai. Ae ia i ai foi le faatuatua o Lona finagalo e sili atu nai lo lou lava loto. Afai e le taliina au tatalo i le ala e te faamoemoe i ai, o le a Ia faamalosia oe ma fesoasoani ia te oe ia tumau.

O Le Mea Sili o le a Aoaoina

A o e taulai atu lou faatuatua ia Iesu Keriso, o le a e malamalama i le uiga o le mafaia o mea uma i le Atua. O le a e talitonu e mafai ona tali mai le Tama Faalelagi i au tatalo, ma o le a e faatuatuaina Lona finagalo ma maua Lona filemu pe a le ogatusa mea e pei ona fuafuaina. Ia tuu lou faatuatuaga ia Iesu Keriso. O Ia o le vavega. Ma e mafai mea uma ia te Ia.