Agai atu i Aso Susulu

Saunia e Marissa Widdison

O Mekasini a le Ekalesia

O loo maua le faamoemoe, fesoasoani, ma le faamalologa mo i latou o e na sao mai le sauaina.

O le taimi lava na ou lele ese ai mai se eria na faatumulia i le asu mai se afisosolo lata ane. A o alu ese atu le vaalele, sa matou sao atu mai se puao o asu i se lagi manino ma le la. Sa ou iloaina o le la susulu ma le ea mama sa i ai iina i le taimi atoa, ae o lou tomai e olioli ai sa polokaina e se mea e le mafai ona ou puleaina. O le afisosolo e le o so’u sese, ae sa aafia ai pea lo’u olaga.

E faapena le sauaina. O i latou o e aafia i sauaga faatautala e le tuuaia lava, ae e tatau lava ona latou taulimaina pea mea ua tuanai. O le sauaina e mafai ona puaoa ai lo tatou lagona o le taua faaletagata lava ia ma faigata ai ona lagona le alofa o le Atua. E ono umi se taimi e gausia ai e na faasaoina mai puaoa o pepelo a Satani e toe fesootai ma upumoni e faavavau. Ae o le faamoemoe, fesoasoani, ma le faamalologa o loo maua i laasaga uma o le ala!

Tasi le Tala

Sa saua le¹ tama o Stacie. Sa ia tau atu ia te ia o le a le lelei o ia i soo se mea pe a matua o ia. Sa ia faia ia ona lagona le leai o sona taua.

Ina ua siitia ese atu Stacie mo le kolisi, sa mafai ona ia mafaufau manino atili. Sa amata ona ia toe alu i le lotu ma lagonaina le alofa o le Atua mo ia ma lona aiga. I le aluga o taimi, sa ia maua ai le faateleina o le filemu i le talalelei ma lana sootaga ma le Faaola.

E tusa ma le tasi piliona tamaiti i le lalolagi atoa o le a oo i ni ituaiga o sauaga faatautala i lenei tausaga.² Atonu o oe po o isi e te iloa o loo feagai ma se aafiaga e pei o Stacie. E mafai ona fesoasoani punaoa nei.

Pe Afai o Loo E Aafia i Sauaga Faatautala

Afai o loo e tiga, faamolemole tau atu i se tasi le mea o loo tupu ia te oe. Ia iloa e alofa le Atua ia te oe! Ma e faapena foi tagata amiotonu o le aiga, uo, ma tagata o le Ekalesia i lou olaga. O le a latou tutu i ou tafatafa ma fesoasoani ia te oe ia e sao mai i lenei mea.

Ma faamolemole ia manatua, “O le sauaina sa le o, e leai, ma o le a lē o oe e mafua ai. … E le o oe le tagata e tatau ona salamo; e le o oe le mafuaaga.”³

Fai mai Dr. Sheldon Martin, o se fomai i le Tautua mo Aiga o le Ekalesia, e mafai ona fesoasoani mo i latou e faasaoina mai le taulai atu i upumoni e faavavau o o latou olaga ua tuanai, taimi nei, ma le lumanai.

Tuanai: “E toatele atu tagata nai lo e ua e iloa e popole ia te oe,” na fai mai ai Dr. Martin, ma ta’u mai o le mea aupito taua o oe o se afafine/atalii o ni matua faalelagi. O lou aiga e faavavau e sili mamao atu nai lo a outou sootaga faalelalolagi. Ma e faaopoopo atu i le malosi ma le mafanafana mai le Tama Faalelagi, Iesu Keriso, ma le Agaga Paia, ua ia te oe ni tuaa alolofa i le isi itu o le veli o e popole ia te oe ma e mafai ona auauna atu ia te oe.
Taimi nei: “E le afaina le alofa i lou tagata o i ai nei,” o le tala lea a Dr. Martin, e tusa po o fea o e i ai i le gasologa o le faamalologa. O se mea masani le lagona o le ita, nutimomoia, po o le le mautonu. Ia onosai ia te oe lava ia.
Lumanai: “O le a lelei mea uma,” o le tala lea a Dr. Martin. “Ua ou iloa lenei mea ona ua ou iloa le Faaola. E popole o Ia ia te oe.” Fai le mea e te mafaia e faalatalata atu ai ia te Ia. A o e faia lena mea, o le a mafai ona e faataumamao oe lava mai sootaga le lelei ma faateleina ai le mafai ona lagonaina Lona filemu ma le alofa.

Pe Afai E Te Manatu o loo Feagai se Uo ma Sauaga Faatautala

Fesili sao atu ia i latou, “O faatiga se tasi ia te oe?”
Faalogo totoa i mea latou te ta’u mai. Faaali atu ia i latou le agalelei ma le agaalofa.
Ta’u atu i se tasi e mafai ona fesoasoani, e pei o se faiaoga, matua, faufautua i le aoga, po o se taitai o le Ekalesia.
Faaauau pea ona avea ma a latou uo. Ia taulimaina i latou i tulaga masani. Fesoasoani ia i latou e faia isi faauooga maloloina.

Faaauau Pea ona Agai i Luma

O le asō, o Stacie o se tagata tomai faapolofesa faamanuiaina ma sona aiga alofa. O nisi aso e faigata lava, ae na te lagonaina le tele o le fiafia ma le faamagaloga a isi.

“Ou te iloa e mafai e Iesu Keriso ona faamalolo o tatou manu’a uma,” o le tala lea a Stacie. Afai e i ai se mea se tasi o le a ia faasoa atu i isi tagata na sao mai, o le tumau lea i le faamoemoe.

“E i ai lava le faamoemoe ia Keriso,” na ia fai mai ai, “e oo lava i le lotolotoi o tofotofoga e foliga mai o le a le muta lava.”

Po o a lava luitau o loo feagai ma oe, ia agai pea i luma. Faatumu lou olaga i le lelei ma le faatuatua i soo se auala e te mafaia. O loo i o outou luma aso susulu!