“Mulimuli i le Malamalama Moni,” Mo le Malosi o le Autalavou, Ian. 2023.
Sau, Mulimuli Mai ia te A’u
Mulimuli i le Malamalama Moni
O le malamalama o Iesu Keriso o loo i ai pea iina mo oe—ananafi, i le asō, ma le faavavau.
Consider the Lilies (Mafaufau i Lili), saunia e Haley Miller
A o goto ifo le la i se isi Aso Sa i le 1948, sa ou savalivali atu i tafatafa o le Vaitafe o Trent i Nottingham, Egelani. Sa avea a’u o se faifeautalai e 20 tausaga le matua i lea taimi. Sa o se aso umi, vaivai, ae sa ou fiafia ma faamalieina i le galuega.
A o ou savalivali i tafatafa o le vaitafe, sa ou faia se tatalo i lo’u loto. I le faamoemoe ai ia lagonaina sina taitaiga mai le Alii, sa ou ole atu, “O ou faia ea le mea o e finagalo ai?”
Sa faafuasei ona oo mai ia te au se lagona lofituina o le filemu ma le malamalama. I lena lava taimi, sa oo ina ou iloa na silafia au e Iesu Keriso ma alofa ia te au. Ou te lei vaai i se faaaliga pe faalogo i se leo, ae semanu e le mafai ona ou iloa le moni ma le paia o Keriso pe ana tu o Ia i o’u luma ma valaau mai i lo’u igoa.
Mai lena aso e oo mai i le asō, o faaiuga taua uma ua ou faia ua tosinaina i lo’u iloa o Iesu Keriso o le Alo o le Atua. Ou te alofa ia te Ia e sili atu le loloto ma le mamana nai lo upu e mafai ona faamatalaina. O Ia o lo’u Alii, lo’u Faaola, lo’u Togiola, ma la’u uo.
I le aluga o tausaga ma le tele o le lalolagi atoa, sa ou molimau atu ai e uiga i le Faaola. Ou te iloa o Ia o le Malamalama moni ma le faavavau lea e “pupula mai i le pouliuli” (Ioane 1:5). O se faamanuiaga mo i tatou le o mai ia te Ia, e mulimuli ia te Ia, ma lagona Lona malamalama i o tatou olaga.
O le Upumoni e uiga i le Malamalama
O itula uma e 24, e liliu atu le ao i le po ma le po e liliu atu i le ao. Pe a tatou oo i le pogisa o le po, tatou te le popole ua mou atu le la. Ua tatou iloa o le a faataamilo le lalolagi ma o le a toe susulu mai le la ia i tatou. Atonu e le mafai i taimi uma ona tatou vaai pe lagonaina le malamalama, ae o loo i ai pea iina .
E faapena foi ona moni lena mea i le faaleagaga. Sa faamanatu mai ia te au lenei mea i le tele o tausaga ua mavae, ina ua ma tilotilo atu ma lo’u toalua o Barbara ma le maofa i le lagi i le po. Sa foliga mai na tulaga ese le susulu ma le matagofie o le faitau miliona o fetu. Ona liliu atu lea o o’u manatu ma le ofo ia Iesu Keriso.
O Ia foi sa “i le Atua i le amataga” (Ioane 1:2). I lalo o le taitaiga a le Tama Faalelagi, sa Ia foafoaina ai le lalolagi ma lalolagi e le mafaitaulia (tagai Mose 1:33). O Ia o le mana e faamalamalama ai le la, le masina, ma fetu (tagai Mataupu Faavae ma Feagaiga 88:7–10). O Ia o le puna o le malamalama ma le ola o mea uma (tagai Ioane 1:3–4; Mataupu Faavae ma Feagaiga 93:10). Na Ia fetalai, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola.”(Ioane 8:12).
I o tatou aso, o loo galue malosi Satani e tape le malamalama o le Faaola. Ae e le mafai lava ona e i ai se nofoaga pogisa lava lea e le mafai e le malamalama o Iesu Keriso ona susulu atu i ai mo oe pe afai o le a e sau ia te Ia. E i ai pea iina le malamalama.
Ata na tusia e Adam Nickel
Na te Faamalamalamaina o Tatou Ala
I le avea ai ma Alo o le Atua, sa i ai ia Iesu Keriso le mamalu faatasi ma le Atua le Tama “a o lei faia le lalolagi” (Ioane 17:5). Sa usiusitai atoatoa o Ia i Lona Tama (tagai Ioane 5:30) ma na afio mai ma le naunautai i le lalolagi. Sa Ia lafoai Lona mamalu ina ia fanau mai i se fale maualalo lea na faia ai e Lona tina ia “aui ia te ia i le ie, ma faataoto ia te ia i le fale povi” (Luka 2:7).
I le taimi o Lona talavou, sa i ai o Ia i le “fale o [Lona] Tama” (Luka 2:49) ma maofa ai i latou sa faalogo i Ana aoaoga. I Lana galuega, sa ia te Ia le mana e faatino ai vavega, e faamanuia ma faamalolo ai e mama’i, ia aumaia e ua oti i le ola, ma iu ai ina saunia le Togiola e le iu.
I mea uma lava na fetalai ma faia e le Faaola, aemaise lava i Lana taulaga togiola, ua Ia faaali mai ai ia i tatou le ala i lo tatou Tama oi le Lagi. O Ana faataitaiga ma aoaoga e faamalamalama ai le ala e tatau ona tatou mulimuli ai e toe foi atu ai i lo tatou aiga faalelagi.
Faasoa Atu Lona Malamalama
O le taimi lava tatou te lagonaina ai le malamalama o le Alo o le Atua i o tatou olaga, e tatau ona tatou taumafai e faasoa atu lena malamalama i isi. Sa ou fiafia e avea ma se faifeautalai i Egelani. Sa ou fiafia i le avea ai ma se peresitene o le misiona i Kanata. Ma ou te fiafia i lo’u valaauga o i ai nei o se uso o le Korama a Aposetolo e Toasefululua, lea e mafai ai ona ou molimau atu ia Iesu Keriso i le lalolagi atoa.
Na aoao mai le Faaola, “Faauta, o au o le malamalama lea e tatau ona outou tuu i luga—mea ia na outou vaai ua ou faia” (3 Nifae 18:24).
E susulu mai le malamalama o le Faaola i totonu o i tatou i taimi uma tatou te tatalo ai ma saili Lana afioga i tusitusiga paia. E susulu atu Lona malamalama pe a tatou alolofa e pei ona Ia alofa mai, faasoa atu a tatou molimau, ma tuuina atu auaunaga le manatu faapito. O lenei mea ua aveesea ai le pogisa mai o tatou olaga ma tosina mai ai isi o loo sailia Lona malamalama.
O Lona Malamalama e Tumau e Faavavau
O le malamalama o Iesu Keriso o loo i ai pea iina mo oe. E leai lava se mea—e matua leai lava se mea—e mafai ona faatoilaloina pe tape ai Lona malamalama. O le a tumau pea e faavavau. O Iesu Keriso “o le malamalama ma le ola o le lalolagi; … o se malamalama e le gata, e le mafai lava ona faapouliuligia” (Mosaea 16:9).
Ou te faafetai e faavavau mo le aafiaga na ou maua o se faifeautalai talavou ina ua ou iloa lenei mea mo au lava ia. Ua ou iloa moni lava lenei mea i le asō a o ou iai i le olaga faatasi ai ma ona tofotofoga ma olioliga uma.
Afai e te le iloa po o fea e alu i ai po o le a le mea e fai, vaai i le malamalama moni o le Alo o le Atua. Afai ua e naunau e sau ia te Ia ma mulimuli i Lona malamalama, o le a Ia faamalamalamaina lou ala.