“O La Tatou Taiala i le Upumoni,” Mo le Malosi o le Autalavou, Ian. 2023.
Sau, Mulimuli Mai ia te A’u
O La Tatou Folafolaga e Avea ma Malamalama
O Iesu Keriso o le Malamalama o le Lalolagi. Tatou faia mea uma tatou te mafaia e faasoa atu ai Lona malamalama.
O le motu o tagata na o mai e vaai i le tamaloa i le vao o le sa ofuina lavalava na faia i fulufulu kamela ma ai sē akerise ma le meli vao. Sa latou fia faalogo i ana aoaoga e uiga i le Faaola, salamo, ma le papatisoga. Ina ua uma ona faalogo ia te ia, e toatele tagata sa mananao e papatiso. Sa ia papatisoina i latou o e na salamo. O le igoa o lenei tagata o Ioane le Papatiso.
I se tasi aso, a o papatisoina e Ioane tagata i le Vaitafe o Ioritana, sa afio mai Iesu Keriso ma talosaga ina ia papatisoina. Sa faateia Ioane. Sa ia iloa e usiusitai lava Iesu i poloaiga a le Atua ma e le manaomia ona salamo. O le mea moni, sa ia manatu e tatau ia Iesu ona papatiso ia te ia (tagai Mataio 3:14)! Sa fetalai atu Iesu na poloaiina e le Atua tagata uma ia papatisoina, o lea sa manaomia ai foi ona papatisoina o Ia e fai ma faataitaiga. Sa ioe Ioane ma papatisoina Iesu i le Vaitafe o Ioritana.
Ua aoao mai i tatou e le papatisoga o Iesu e tatau foi ona papatisoina i tatou. Ina ua papatisoina oe, sa e osia se feagaiga ma faaali atu lou naunautai e mulimuli i le faataitaiga a le Faaola, e le na o lou papatisoga ae o taimi uma lava.
O Folafolaga ma Avanoa
I le papatisoga, e te osia ai se feagaiga ma le Atua ma folafola atu e tauave i ou lava luga le suafa o Iesu Keriso (tagai Mosaea 5:8–10). Ua e folafola atu foi e tausi Ana poloaiga, tu o se molimau a le Atua “i taimi uma ma i mea uma, ma i nofoaga uma” (Mosaea 18:9), ma auauna atu ia te Ia (tagai Mosaea 18:8–10; Mataupu Faavae ma Feagaiga 20:37).
O vaiaso taitasi i le lotu, e te faafouina ai lenei feagaiga pe a e tagofia le faamanatuga (tagai i le Mataupu Faavae ma Feagaiga 20:77, 79). Ona mafai lea ona outou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20).
I le aluga o taimi, o le a e maua ai le tele o avanoa e mulimuli ai i le faataitaiga a le Faaola ma faaali atu ai lou alofa mo Ia ma mo i latou o siomiaina oe. Na saunoa mai Elder Jeffrey R. Holland o le Korama a Aposetolo e Toasefululua: “O loo iai o tatou tuaoi e ao faamanuia, o fanau ia puipuia, o e matitiva ina ia siitia i luga, ma le upumoni ina ia puipuia. E i ai sese e ao ona faasa’o, o upumoni e faasoa atu, ma mea lelei ia faia. I se aotelega, e tatau ona tatou ola e faapei o ni soo ua tuuto atu.”1
O Se Malamalama ia i Latou e Le Tagolima
O la tatou faataitaiga atoatoa, sa alofa pea le Faaola ma auauna atu i isi ma “femaliuai ma agalelei” (Galuega 10:38).
I taimi faigata, o Iesu Keriso o le Malamalama e “malamalama i le pouliuli” (Ioane 1:5). Ua Ia aoaoina foi i tatou ia avea ma se malamalama. Na ia fetalai, Faauta, o au o le malamalama lea e tatau ona outou tuu i luga—mea ia na outou vaai ua ou faia” (3 Nifae 18:24).
I le avea ai ma se vaega o lau feagaiga o le papatisoga, e te folafola atu e te “loto e tauave avega a le tasi, ina ia māmā” ma “faanoanoa faatasi ma e e faanoanoa; … ma faamafanafana atu ia te i latou o e e manaomia le faamafanafanaga” (Mosaea 18:8-9).
Pe a e tau atu i se tasi o lagona le faanoanoa po o le lotovaivai, atonu e iloa lelei le auala e fesoasoani atu ai. Peitai, e i ai isi taimi, e te le iloa ai le tala e fai atu po o le mea e fai. I na taimi, e mafai lava ona e tatalaina lou loto. E mafai ona e faalogo ia i latou ma lagolagoina i latou.
A o e alofa ma auauna atu i isi, e faateleina le malamalama o le Faaola i totonu ia te oe ma o le a faamalamalamaina le ala i ou luma. O le a tosina atu ai foi isi o loo sailia le malamalama o le Faaola. O le fetaomi atu i luma ma le tausia o folafolaga na e faia i le papatisoga, o le a e maua ai le tele o auala e mafai ona e faia ai lenei lalolagi ia sili atu ona lelei ma malamalama atili.