“O nisi taimi ou te manatu ai ua ova faitio tele o’u matua ia te a’u. E faapefea ona ou tali atu ma le faaaloalo?,” Mo le Malosi o le Autalavou, Ian. 2023.
Fesili ma Tali
“O nisi taimi ou te manatu ai ua ova faitio tele o’u matua ia te a’u. E faapefea ona ou tali atu ma le faaaloalo?”
Faaalu Faatasi o Outou Taimi
E ofo atu e ou matua fautuaga ma faasa’oga ona latou te alolofa ia te oe ma mananao e fesoasoani ia e manuia. Pe a lagona le le talafeagai o lena faasa’oga, faaalu se taimi e talanoaina taitoatasi ai ma ou matua i se taimi tou te lagona uma ai le toafimalie. E mafai ona e maua se taimi pe a outou faia se mea tou te fiafia e fai faatasi, e pei o le kuka po o le faamalositino. E fesoasoani lea e valaaulia ai le Agaga i le talanoaga.
Rebekah M., 17, Maryland, ISA
Manatua Latou te Alolofa ia te Oe
Afai e te manatua e faasa’o oe e ou matua ma fefautuaai faatasi ma oe ona e alolofa ia te oe, e sili atu ona faigofie ona talia a latou faasa’oga. O le faia o se tatalo vave e ole atu ai mo le Agaga e fesoasoani ia te oe ia tumau i le faaaloalo ma le lotomaualalo o le a fesoasoani ia te oe e fesootai lelei ai ma i laua.
Lauren M., 16, Texas, ISA
E Faamaloloina Faamaoni
O talanoaga lelei ma faamaoni e mafai ona foia ai ituaiga uma o feteenaiga. Nonofo i lalo ma ou matua ma talanoa ia i laua. Ta’u atu ia i laua po o le a le mea o e tiga ai, ma faalogo i mea la te faanoanoa pe le fiafia ai. Faaalu le tele o le taimi faatasi, ma atiina ae le alofa ma le filemu i totonu o la outou mafutaga ma le aiga. Pe a e ita, ole atu i le Tama Faalelagi e faatoafilemu lou loto.
Rafaella P., 17, São Paulo, Pasila
Tau Atu E Te Alofa Ia i Latou
E mafai ona e tali atu ma le faaaloalo, e tusa lava pe faigata. Tau atu i ou matua e te alofa ia i laua, e te popole ia i laua, ma e te iloa e alolofa i laua ia oe. Faailoa atu ia i laua mea la te fai mai ai e faatiga i lou tulaga faalelagona, faaleagaga, ma faalemafaufau. Tatalo soo. O le a mautinoa e fesoasoani mai le Tama Faalelagi ia te oe.
Wellie S., 13, Luanda, Angola
La te Vaai i Lou Gafatia
O loo faamoemoe mai le Atua i le mea sili tatou te mafaia ma e mafai ona silasila i lo tatou gafatia moni. O le mafuaaga lea ua Ia manaomia tele ai i tatou. E vaaia foi e ou matua ou gafatia ma mananao i le mea sili mo oe ma mo oe ina ia manuia! Atonu e le atoatoa i laua i le faamalosiauina o lou alualu i luma, ma e te le atoatoa i le ausiaina. Fai se talanoaga faamaoni, ma agaalofa ma ou matua, ma o le a taiala oe e le Agaga ia maua le malamalama.
Brooke T., 18, Arisona, ISA
Ia Avea ma se Tagata e Faalogo Lotomaualalo
Talu ai nei sa ou taumafai ai e avea ma se tagata e sili atu ona faalogo. Ou te taumafai e faalogo ma le filemu i mea e fai mai ai o’u matua nai lo le fefinauai po o le e’ē atu ia i laua. E manaomia ai le tele o le onosai ma le lotomaualalo, ae o le faia o lenei mea e mafai ona faamalosia ai lou sootaga ma ou matua ma maua ai le malamalama atili i itu uma e lua.
Kami K., 18, Iuta, ISA