“O Le Nofoaga E Sili Ona Ou Fiafia i ai … e Mafaufau Loloto ai” Mo le Malosi o le Autalavou, Ian. 2023.
O Le Nofoaga e Sili Ou Fiafia …
E Mafaufau Loloto Ai
E i ai se nofoaga e sili ona e fiafia i ai e te manao e mafaufau loloto ai?
Pe a e mafaufau loloto, e te maua se vaaiga sili atu e faavavau. E mafai foi ona fesoasoani ia te oe e faaleleia ai lou soifua maloloina faalemafaufau e ala i le aveesea o le le mautonu ma atugaluga mai lou mafaufau lea e sau mai faaosoosoga ma faalavefau o le olaga i lea aso ma lea aso. O nisi tagata e i ai foi se nofoaga faapitoa latou te fiafia e mafaufau loloto ai. Siaki nisi o nei nofoaga e mafaufau loloto ai na faasoa mai e isi talavou!
Mafaufau Loloto: O le mafaufau loloto o lona uiga o le tatalaina o lou mafaufau ma lou loto i uunaiga a le Agaga Paia a o e suesue ma mafaufau e uiga i le talalelei. O le mafaufau loloto moni, lea e mafai ona tupu i soo se mea, e manaomia ai lou faia o se galuega faaleagaga a o e sailia faaaliga.
I luga o Vai
O le nofoaga e sili ona ou fiafia i ai e mafaufau loloto ai o soo se ituaiga o vai, e pei o se vaituloto po o le sami. I le ata lenei sa ou i ai i luga o le vaa a lo’u tamamatua. Ou te fiafia e i ai iina aua ou te lagona ai le latalata atu i le Agaga, aemaise lava i le oso ae po o le goto ifo o le la. E tele lava ina ou maua musumusuga ma maua uma ai o’u manatu sili ona lelei iina.
Macey M., 16, Texas, ISA
Saili le Taimi o le Tuuatoatasi
O le nofoaga sili e mafaufau loloto ai mo au o le taimi e tuuatoatasi ai. Ou te mafaufau loloto i taimi uma, i le taelega po o se nofoaga filemu e pei o le fale i le taimi o a’u suesuega o tusitusiga paia. Ou te alu i tietiega uila, ma o nisi taimi ou te faalogologo ai i se faasalalauga o le Sau, Mulimuli Mai ia te Au. Ou te tuuina atu ia te au lava le taimi e nofo ai i se natura matagofie ma mafaufau loloto ai foi.
Grant R., 14, Texas, ISA