Faavae Malolosi

Mauaina o le Olioli i le Auaunaga Faamusika

Ata na tusia e Emily Jones

Sa amata a’u lesona piano i le fitu o o’u tausaga. I le taimi muamua, sa faigata ona faitau nota o musika ma gauai atu i le taimi o au lesona. Ou te lei fiafia tele e faataitai le piano.

Ona fai mai lea o lo’u tina ou te taina le “Pe a Ou Papatiso” (Tusipese a Tamaiti, 53) i lo’u papatisoga. O le taimi muamua lava lea ua ou tātā i le lotu. Sa ou popole ae sa ou mitamita ia te au lava ina ua ou faia.

E lei umi ae ou pisi i le aoga ma manao e faamavae mai le piano, ae sa uunaia au e ou matua e faaauau pea ona aoao. Sa la fai mai afai ou te tātā pea, e mafai ona ou maua le olioli i le auauna atu i le Alii.

Mai lava i lena taimi, sa ou fiafia e ta le piano. Sa amata ona ou tātā i le sauniga faamanatuga, ma ina ua atoa lo’u 12, sa valaauina aloaia au e avea ma ta piano a le uarota. Sa matuai o’u fiafia lava! Sa ou tātā i sauniga a le Peraimeri ma faatasi ai ma le aufaipese a le matou uarota i taimi o konafesi ma faigalotu faaleuarota. Sa valaauina foi au o se ta piano a le aufaipese a le siteki ma tātā ai i le taimi o le konafesi a le siteki.

Ou te faafetai i ou matua mo le uunaia o au e faia le mea sili ou te mafaia. O le a faavavau ona ou faafetai i le Tama Faalelagi mo le taleni ua Ia tuuina mai ia te au. Ou te iloa o le a mafai ona ou faaaogaina a’u taleni i la’u misiona ma i isi auaunaga i se aso. Ou te maua moni lava le olioli i le auauna atu i le Alii.

Jyle S., National Capital Region, Filipaina