“O ai le au makoi?,” Mo le Malosi o le Autalavou, Ian. 2023.
Tuusao i le Mataupu
O ai le Au Makoi?
Ua tau mai e tusitusiga paia ia i tatou o “makoi [na o mai] mai sasa’e” (Mataio 2:1) e saili le Faaola. O le upu makoi e sau mai se upu Peresia, magi. E ui e le o ta’u mai ia i tatou po o ai tonu nei alii, ae e i ai ni nai mea e mafai ona tatou fai atu tatou te iloa e uiga ia i latou mai mea ua ta’u mai ia i tatou.
E masani lava ona manatu tagata e toatolu le Au Makoi aua na latou aumaia ni meaalofa se tolu. Ae e le o manino mai tusitusiga paia pe toafia ni Au Makoi sa i ai moni lava. Ua tatou malamalama foi sa latou asiasi atu ia Iesu a o tamaitiiti ae le o se pepe (tagai Mataio 2:11).
Sa manino lava le amiotonu o le Au Makoi ma sa iloa nisi o valoaga e uiga i le soifua mai o le Mesia. Atonu sa latou o mai mai se lala o le nuu o le Alii. Sa latou sailia ma le filiga le Alo o le Atua ma sa taitaiina atu i latou ia te Ia e le Agaga. Sa latou aumaia ia te Ia meaalofa ona toe foi atu ai lea e molimau atu e uiga i Lona soifua mai i o latou tagata. Sa lapataia foi i latou i se miti e aua nei ta’u atu ia Herota le mea sa i ai le tamaitiiti.
O lo latou faamaoni ma le filiga e mafai ona avea ma se faataitaiga musuia ia i tatou i a tatou malaga patino e faalatalata atili atu ai i le Faaola.